Jehovah Mekem Samson for Strong

Staka Israelite go bak moa for worshipim olketa idol, so Jehovah letem olketa Philistine kontrolem olketa. Bat samfala Israelite stap wea lovem Jehovah. Wanfala nao hem Manoah. Hem and waef blo hem no garem eni pikinini. Wanday Jehovah sendem angel go lo waef blo Manoah. Datfala angel sei lo hem: ‘Bae iu garem wanfala son. Hem bae sevem Israel from olketa Philistine. Hem bae kamap wanfala Nazirite.’ Iu savve hu nao olketa Nazirite? Hem olketa spesol servant blo Jehovah. Olketa Nazirite mas no katem hair blo olketa.

Gogo, son blo Manoah hem born nao, and hem nemim hem lo Samson. Taem Samson growap, Jehovah mekem hem for strong fogud. Hem savve killim dae wanfala lion witim hand blo hem. Wantaem, Samson killim dae 30-fala Philistine seleva. Olketa Philistine heitim Samson and faendem wei for killim hem dae. Wanfala naet, taem Samson hem go sleep lo Gaza, olketa Philistine go lo gate blo taon and weit lo there for olketa savve killim hem dae lo morning. Bat lo midol naet, Samson getap, go lo gate blo taon and pullimaot datfala gate. Hem liftim gate hia lo shoulder blo hem and karem go ap lo maunten klosap lo Hebron!

Bihaen, olketa Philistine go lo gelfren blo Samson wea nem blo hem Delilah, and sei: ‘Mifala bae peim iu wan thousand silver shekel, sapos iu faendaot wanem nao mekem Samson strong. Mifala laek holem hem and putim hem lo prison.’ Delilah laekem selen, so hem agree for duim datwan. Firstaem, Samson no laek talem Delilah why nao hem strong olsem. Bat Delilah gohed askem Samson, gogo Samson talem lo hem wat nao mekem hem strong. Hem sei lo Delilah: ‘No enitaem olketa katem hair blo mi bikos mi wanfala Nazirite. Sapos mi katem short lo hair blo mi, strong wea stap lo mi bae lus nao.’ Iu tingse Samson mekem wanfala big mistek taem hem duim datwan?

Semtaem nomoa, Delilah sei lo olketa Philistine: ‘Hem talem mi evri samting!’ Delilah mekem Samson for sleep lo knee blo hem, and then hem kolem kam wanfala man for katem hair blo Samson. Delilah singaot olsem: ‘Samson, olketa Philistine lo hia nao!’ Samson wekap and paoa blo hem go aot. Olketa Philistine holem hem, aotem tufala eye blo hem and putim hem lo prison.

Wanday, staka thousand Philistine hipap lo temple blo god blo olketa Dagon, and singaot olsem: ‘God blo iumi givim Samson lo hand blo iumi! Tekem kamaot Samson! For hem duim samfala samting for iumi laf lo hem.’ Olketa mekem hem standap between tufala post and olketa mekfani lo hem. Samson singaot olsem: ‘O Jehovah, plis strongim mi wanfala taem moa.’ Lo datfala taem, hair blo Samson hem grow bak moa. Hem pushim tufala post blo temple witim full strong blo hem. And datfala full building foldaon and killim dae evriwan insaed lo datfala temple, and Samson tu.