LESON 49
Wat Nao Iu Savve Duim for Famili Hapi?—Part 1
Tufala wea just marit hapi tumas lo wedding day, and tufala expectim bae tufala gohed hapi for olowe. Olketa Christian wea marit for longtaem finis and wea waka hard for followim advaes lo Bible, luksavve iu savve hapi lo marit blo iu.
1. Wat nao advaes wea Bible talem for olketa hasband?
Jehovah appointim hasband for hed blo famili. (Readim Ephesus 5:23.) Jehovah laekem hem for mekem olketa disison wea bae helpem famili. Bible sei for olketa hasband “gohed for lovem waef bilong iufala.” (Ephesus 5:25) Hao nao hasband savve followim datwan? Hasband wea lovem waef blo hem bae treatim gud waef lo haos and taem hem stap witim pipol. Hem protectim waef, duim samting for mekem hem hapi, and provaedem wanem hem needim. (1 Timothy 5:8) Important samting hem for hasband helpem waef for fren gud witim Jehovah. (Matthew 4:4) For example, hem savve prea and readim Bible witim waef blo hem. Taem hasband lukaftarem gud waef, bae hem gohed fren gud witim Jehovah.—Readim 1 Peter 3:7.
2. Wat nao advaes wea Bible talem for olketa waef?
Bible sei waef “mas barava respectim hasband bilong hem.” (Ephesus 5:33) Hao nao waef savve followim datwan? Hem savve tinghae lo olketa gudfala wei blo hasband, and hao hasband waka hard for lukaftarem hem and olketa pikinini. And tu, nomata hasband no wanfala Witness, waef savve sapotim olketa disison blo hasband, story kaen lo hem, and talem olketa gud samting abaotem hem.
3. Wat nao wanfala couple savve duim for strongim marit blo tufala?
Bible sei olsem abaotem tufala wea marit: “Datfala man and woman bae kamap wanfala body nomoa.” (Matthew 19:5) Datwan minim tufala mas waka hard for no letem eni samting spoelem love wea tufala garem for each other. So tufala mas evritaem spendem taem tugeta and feel free for storyim tingting and feeling blo tufala lo each other. Tufala shud no letem eniting or eniwan hem important winim hasband or waef, bat Jehovah nomoa shud important lo tufala winim eniting or eniwan. Tufala mas careful for no klos tumas lo eniwan wea no marit partner blo tufala.
DIG GO MOA
Bae iumi storyim olketa Bible principle wea savve strongim marit blo iu.
4. Hasband lovem and lukaftarem gud waef
Bible sei “olketa hasband mas lovem waef bilong olketa long sem wei wea olketa lovem body bilong olketa seleva.” (Ephesus 5:28, 29) Wat nao datwan minim? Pleim VIDEO, then discussim tugeta disfala kwestin.
Wat nao samfala samting hasband savve duim for showim hem lovem and tingim waef blo hem?
Readim Colossae 3:12, then discussim tugeta disfala kwestin:
Hao nao hasband savve showim olketa wei hia lo marit blo hem?
5. Waef lovem and respectim hasband
Bible sei for waef respectim hasband blo hem, nomata hem no worshipim Jehovah. Readim 1 Peter 3:1, 2, then discussim tugeta olketa kwestin hia:
If hasband blo iu no wanfala Witness, bae iu laekem hem for worshipim Jehovah. Wat nao best wei for helpem hem? For preach lo hem evritaem, or for kaen and respectim hem? Why nao olsem?
Hem gud for hasband and waef mekem disison tugeta. Bat samfala taem, maet waef no agree lo disison blo hasband. If olsem, waef showim hem respectim hasband taem hem story kaen and talem tingting blo hem lo hasband. Bat hem mas luksavve Jehovah givim responsibility for mekem disison for famili lo hasband. Waef shud traem best for sapotim disison blo hasband. Datwan bae mekem famili hapi. Readim 1 Peter 3:3-5, then discussim tugeta disfala kwestin:
Hao nao feeling blo Jehovah taem waef respectim hasband blo hem?
6. Iu savve deal witim olketa problem lo marit blo iu
No eni marit hem perfect. Dastawe, tufala wea marit mas waka hard for deal witim olketa problem lo marit blo tufala. Pleim VIDEO, then discussim tugeta olketa kwestin hia.
Olsem iumi lukim lo video, wat nao samfala samting wea showim datfala couple no klos lo each other?
Wat nao tufala duim for strongim marit blo tufala?
Readim 1 Corinth 10:24 and Colossae 3:13. Bihaen iufala readim each scripture, discussim tugeta disfala kwestin:
Taem iu followim advaes hia, hao nao datwan savve strongim marit blo iu?
Bible sei iumi shud respectim each other. Iumi duim datwan taem iumi treatim gud narawan. Readim Rome 12:10, then discussim tugeta olketa kwestin hia:
Hao, hasband or waef mas kasem respect from marit partner firstaem bifor hem respectim hem? Why nao olsem?
SAMFALA SAVVE TALEM: “Mi and marit partner no fren gud nao olsem bifor.”
Iu tingim eni scripture for helpem tufala?
MAIN POINT
Hasband and waef savve hapi if tufala lovem and respectim each other, and followim olketa Bible principle.
Review
Wat nao hasband savve duim for famili hapi?
Wat nao waef savve duim for famili hapi?
If iu marit, which Bible principle nao savve helpem marit blo iu?
FAENDAOT MOA
Read abaotem samfala samting wea iu savve duim for famili hapi.
Watchim music video wea showim olketa blessing wea man kasem, if hem followim advaes blo God lo marit blo hem.
Read abaotem olketa reason waef mas stap anda lo hasband.
“Why Nao Olketa Woman Mas Stap Anda?” (Wastaoa, May 15, 2010)
Wat nao wanfala couple duim for winim olketa big problem wea tufala garem and kam bak tugeta bihaen tufala divorce?