LESON 51
Hao for Mekem Jehovah Hapi lo Toktok blo Iumi
Taem Jehovah creatim iumi, hem givim iumi wanfala naes present wea hem nao for toktok. Iu tingse hao iumi iusim datfala present hem important lo Jehovah? Yes, hem important! (Readim James 1:26.) So hao nao iumi savve mekem Jehovah hapi lo toktok blo iumi?
1. Hao nao iumi savve iusim gud disfala present for toktok?
Bible sei for iumi “gohed for encouragem and strongim narawan.” (1 Thessalonica 5:11) Iu tingim samfala wea needim encouragement? Wat nao iu savve duim for helpem olketa? Hem nao for talem hao iu tingim olketa. Maet iu talem olketa, iu tinghae lo olketa. Iu tingim eni scripture for encouragem samwan wea iu savve lo hem? Staka scripture stap wea iu savve iusim. Hem gud for tingim toktok wea iumi talem savve encouragem narawan, so iumi mas trae for story kaen evritaem.—Provebs 15:1.
2. Wat kaen toktok nao iumi mas no talem?
Bible sei: “Iufala mas no talem eni nogud toktok.” (Readim Ephesus 4:29.) Diswan minim iumi mas no swear or talem toktok wea mekem narawan feel nogud. And tu, iumi mas no gossip and tok spoelem narawan.—Readim Provebs 16:28.
3. Wat nao savve helpem iumi for talem toktok wea bae encouragem narawan?
Staka taem samting iumi talem hem showim wat hem stap lo heart blo iumi. (Luke 6:45) Iumi mas waka hard for tingim nomoa olketa samting wea raeteous, klin, wea mekem man garem love, and olketa samting wea fit for kasem praise. (Philippi 4:8) For duim datwan, iumi mas chusim gud entertainment and olketa fren blo iumi. (Provebs 13:20) Diswan helpem iumi tu for tingting gud firstaem bifor iumi talem samting. Tingim hao toktok blo iumi savve helpem or spoelem narawan. Bible sei: “Nogud toktok kat olsem sap naef, waes toktok mekem man helti.”—Provebs 12:18.
DIG GO MOA
Bae iumi storyim wat iumi savve duim for talem toktok wea mekem Jehovah hapi and encouragem narawan.
4. Kontrolem toktok blo iu
Samfala taem iumi savve talem toktok wea mekem iumi regret. (James 3:2) Readim Galatia 5:22, 23, then discussim tugeta olketa kwestin hia:
Which wan lo olketa wei hia nao iu savve prea for garem mekem iu kontrolem toktok blo iu? Hao nao maet olketa wei hia helpem iu?
Readim 1 Corinth 15:33, then discussim tugeta kwestin hia:
Hao nao olketa fren blo iu and entertainment wea iu chusim influencim hao iu story?
Wat nao olketa samting wea maet influencim hao iumi story?
Readim Eklesiastes 3:1, 7, then discussim tugeta disfala kwestin:
Wat taem nao hem gud for stap kwaet and for toktok?
5. Story gud abaotem narawan
Wat nao savve helpem iumi for no talem toktok wea spoelem narawan? Pleim VIDEO, then discussim tugeta olketa kwestin hia.
Olsem iumi lukim lo video, why nao datfala brata laek for changem hao hem story abaotem olketa narawan?
Wat nao hem duim for changem wei blo hem?
Readim Eklesiastes 7:16, then discussim tugeta disfala kwestin:
Wat nao iumi shud tingim if iumi laek storyim nogud samting abaotem narawan?
Readim Eklesiastes 7:21, 22, then discussim tugeta disfala kwestin:
Hao nao scripture hia savve helpem iu for no feel nogud taem samwan talem nogud samting abaotem iu?
6. Mas kaen taem iu story lo famili
Jehovah laekem iumi for kaen taem iumi story lo famili blo iumi. Pleim VIDEO, then discussim tugeta disfala kwestin.
Wat nao bae helpem iu for story kaen lo famili blo iu?
Readim Ephesus 4:31, 32, then discussim tugeta disfala kwestin:
Wat kaen toktok nao savve mekem famili stap gud?
Jehovah talem feeling blo hem abaotem Son blo hem, Jesus. Readim Matthew 17:5, then discussim tugeta kwestin hia:
Hao nao iu savve followim example blo Jehovah taem iu story witim olketa lo famili?
Lukaotem chance for praisem narawan
SAMFALA SAVVE TALEM: “Hu nao warim olketa. Mi talem tingting blo mi ia.”
Iu tingse tingting olsem hem stret? Why nao olsem?
MAIN POINT
Toktok blo iumi savve helpem or spoelem narawan. So iumi need for tingting gud abaotem wanem for talem, wat taem for talem, and hao for talem.
Review
Hao nao iumi savve iusim gud disfala present for toktok?
Wat kaen toktok nao iumi mas no talem?
Wat nao savve helpem iumi for talem toktok wea bae encouragem narawan?
FAENDAOT MOA
Wat nao savve helpem iumi for talem toktok wea bae encouragem narawan?
Read abaotem samting wea savve helpem iumi for no talem nogud toktok.
“Hao, Hem Olraet for Talem Olketa Rabis Toktok?” (Article lo jw.org)
Lukim samting wea savve helpem iumi for no gossip.
Read abaotem hao Jehovah helpem wanfala man for stop for swear.
“Mi Start for Tingting Abaotem Wanem Mi Duim Long Laef Bilong Mi” (Wastaoa, September 1, 2013)