Serve Witim Man for Lukaot

“Antap long taoa for lukaot, O Jehovah, mi go ahed for standap long daytaem, and long ples bilong mi for lukaot, mi go ahed for stap long naet.”—ISAIAH 21:8.

1. Wanem nao olketa nambawan promis wea Jehovah seleva witnessim?

JEHOVAH hem Nambawan Man Bilong Purpose. Bighed angel wea kamap Devil Satan no savve duim eni samting for stopem nambawan purpose bilong Hem for mekem nem bilong Hem holy and putim wanfala Kingdom rul ovarem paradaes earth. (Matthew 6:9, 10) Anda long datfala rul, olketa man bae kasem blessing. God “bae finisim dae evribit, and Sovereign Lord Jehovah bae aotem evri wata from eye bilong olketa.” Olketa man wea garem wan mind bae kasem peace and gud living for olowe. (Isaiah 25:8; 65:17-25) Jehovah nao witness bilong hemseleva long olketa nambawan promis hia!

2. Hu nao olketa man wea Jehovah iusim for witness?

² Bat, Creator garem olketa man wea witness tu. Bifor taem bilong olketa Christian wanfala “bigfala cloud bilong olketa witness,” start witim Abel, ran long resis bilong wei for go ahed strong, nomata olketa feisim barava hard samting. Olketa nambawan example bilong datfala sekson encouragem olketa loyal Christian distaem. Christ Jesus nao main example bilong wanfala witness wea no fraet. (Hebrews 11:1–12:2) Olsem example, tingim lastfala witness wea hem givim front long Pontius Pilate. Jesus sei: “For diswan nao mi born kam, and for diswan nao mi kam insaed long world, for mi mas witness abaotem truth.” (John 18:37) Start long 33 C.E. kam kasem disfala year bilong 2000 C.E., olketa strongfala Christian followim example bilong Jesus and go ahed for witness, witim wei for no fraet for talemaot “olketa nambawan samting bilong God.”—Acts 2:11.

Wei for Divaed wea Kam From Babylon

3. Hao nao Satan againstim olketa wea witness abaotem Jehovah and will bilong hem?

³ Insaed planti thousand year, bigfala enemy, Devil Satan, hem trae hard for spoelem samting wea olketa witness bilong God talem. Olsem “dadi bilong laea fasin,” disfala “bigfala dragon, snek bilong firstaem,” hem “giamanim olketa man long earth.” Hem no givap long faet bilong hem againstim olketa wea “obeyim evri komandment bilong God,” especially long olketa last day distaem.—John 8:44; Revelation 12:9, 17.

4. Hao nao Babylon the Great hem start?

⁴ Samting olsem 4,000 year go finis, bihaen Flood long taem bilong Noah, Satan mekem Nimrod kamap “wanfala maeti man for hunting wea againstim Jehovah.” (Genesis 10:9, 10) Barava big taon bilong Nimrod, Babylon (Babel), kamap main ples bilong religion bilong olketa demon. Taem Jehovah mixim languis bilong pipol wea buildim taoa bilong Babel, olketa pipol go evriwea long earth, and tekem giaman religion witim olketa. So Babylon kamap start bilong world rul bilong giaman religion, and buk bilong Revelation kolem diswan Babylon the Great. Datfala buk talem profesi abaotem judgment bilong disfala system bilong religion from bifor.—Revelation 17:5; 18:21.

Wanfala Nation Bilong Olketa Witness

5. Wanem nation nao Jehovah organizem for kamap witness bilong hem, bat why nao hem letem olketa for lusim land bilong olketa?

⁵ Samting olsem 500 year bihaen taem bilong Nimrod, Jehovah organizem wei for laen bilong faithful Abraham for kamap nation bilong Israel for olsem Witness bilong Hem long earth. (Isaiah 43:10, 12) Planti man wanwan bilong datfala nation servem Jehovah long loyal wei. Bat, insaed planti handred year, giaman biliv bilong olketa nation wea stap klosap hem spoelem Israel, and covenant pipol bilong Jehovah tanawe from hem for worshipim olketa giaman god. So, long 607 B.C.E., army bilong Babylon, wea King Nebuchadnezzar leadim, hem distroem Jerusalem and temple bilong hem and tekem planti Jew olsem prisoner go long Babylon.

6. Wanem gud nius nao man bilong Jehovah for lukaot hem talem, and wanem taem nao hem fulfill?

⁶ Giaman religion win long big wei nao! Bat, win bilong Babylon hia hem for short taem nomoa. Samting olsem 200 year bifor hem happen, Jehovah givim disfala komand: “Go, putim wanfala man for lukaot mekem hem talem evri samting wea hem lukim.” Wanem nius nao disfala man for lukaot hem garem? “Hem foldaon finis! Babylon hem foldaon finis, and evri image bilong god bilong hem, hem brekem kasem earth!” (Isaiah 21:6, 9) So, long 539 B.C.E., datfala profesi toktok kamap tru. Maeti Babylon hem foldaon, and covenant pipol bilong God fit for go bak long homland bilong olketa.

7. (a) Wanem nao olketa Jew lanem from discipline bilong Jehovah? (b) Wanem nao olketa trap wea olketa Jew wea kam bak from Babylon foldaon insaed, and wanem nao kamaot from diswan?

⁷ Olketa Jew wea kam bak lanem finis samting wea mekem olketa fit for lusim wei for worshipim idol and religion bilong spiritism. Bat, gogo, olketa foldaon long olketa nara trap. Trap bilong Greek tingting nao kasholem samfala. Olketa narawan mekhae long kastom bilong olketa man winim Word bilong God. Wei for mekhae long nation tu pullim samfala. (Mark 7:13; Acts 5:37) Taem Jesus born long earth, datfala nation tanawe moa from klin worship. Nomata samfala Jew wanwan acceptim gud nius wea Jesus talemaot, olsem wanfala sekson datfala nation rejectim hem so God rejectim olketa tu. (John 1:9-12; Acts 2:36) Israel no go ahed olsem witness bilong God, and long year 70 C.E., army bilong Rome barava spoelem Jerusalem and temple bilong hem.—Matthew 21:43.

8. Hu nao kamap witness bilong Jehovah, and why nao warning bilong Paul long disfala witness hem kam long barava taem?

⁸ Long semtaem, wanfala Christian “Israel bilong God” hem born, and hem serve olsem witness bilong God long olketa nation. (Galatians 6:16) Kwiktaem nomoa, Satan plan for spoelem disfala niu, spiritual nation. Long end bilong first century, olketa idea bilong man kam insaed olketa kongregeson. (Revelation 2:6, 14, 20) Warning bilong Paul kam long barava taem: “Lukaot: maet samwan hem kasholem iufala thru long olketa idea and giaman trik wea followim kastom bilong man, wea fitim olketa samting bilong world and wea no fitim Christ.”—Colossians 2:8.

9. Olsem warning wea Paul givim, wanem nao happen wea lead go for startim Christendom?

⁹ Go-go, olketa Greek tingting, olketa idea bilong religion from Babylon, and bihaen “wisdom” bilong man olsem teaching bilong evolution and wei for tokdaonem Bible hem spoelem religion bilong planti wea sei olketa Christian. Hem olsem wanem Paul talem: “Mi savve bihaen mi go olketa wild dog wea putim bigfala hevi bae kam insaed midolwan long iufala and bae no deal witim sheep long kaenfala wei, and from midolwan long iufala seleva samfala man bae start for talem olketa giaman samting for pullim olketa disaepol for followim olketa seleva.” (Acts 20:29, 30) From disfala wei for apostate, Christendom hem start.

10. Wanem samting wea happen showimaot no evriwan followim dirty worship wea Christendom duim?

¹⁰ Olketa wea barava loyal long klin worship need for “faet hard for disfala faith wea olketa givim wantaem and for olowe long olketa holy wan.” (Jude 3) Waswe, datfala witness bilong klin worship and bilong Jehovah bae finis from earth? Nomoa nao. Klosap long taem wea Satan and evri waka bilong hem redy for finis, evri samting showimaot klia hao no evriwan followim apostate worship wea Christendom duim. Klosap long end bilong mek-19 century, long Pittsburgh, Pennsylvania, U.S.A., wanfala sekson bilong olketa honest Bible student organize and kamap start bilong witness sekson bilong God distaem. Olketa Christian hia point go long pruv insaed Bible hao end bilong world distaem hem klosap tumas. Olsem Bible profesi talem, “taem bilong end” bilong disfala world start long 1914 and first world war nao markem start bilong diswan. (Matthew 24:3, 7) Strong pruv showimaot wei wea olketa torowem Satan and olketa demon bilong hem from heven bihaen datfala year. Mek-20 century wea fulap witim trabol hem givim klia pruv bilong waka bilong Satan and kliafala wei wea saen bilong taem wea Jesus stap long Kingdom paoa long heven hem fulfill.—Matthew, chapter 24 and 25; Mark, chapter 13; Luke, chapter 21; Revelation 12:10, 12.

11. Wanem nao Satan trae for duim, bat hao nao samting hem duim fail?

¹¹ Long June 1918, Satan barava trae hard for finisim olketa Bible student hia, wea long datfala taem preach long samfala difren kantri. Hem trae tu for distroem legal corporation bilong olketa, datfala Watch Tower Bible and Tract Society. Olketa bilong Society wea garem responsibility go long prison, from pipol giaman for accusim olketa for againstim gavman, olsem pipol duim long Jesus long first century. (Luke 23:2) Bat long 1919, olketa releasem sekson hia, wea mekem olketa fit for go ahed long ministry bilong olketa. Bihaen, gavman aotem evri giaman toktok againstim sekson hia.

“Man for Lukaot” Hem Lukluk Gud

12. Hu distaem nao hem insaed long sekson bilong Jehovah for lukaot, or “man for lukaot,” and hao nao tingting bilong olketa?

¹² So, long taem wea “taem bilong end” start, Jehovah garem moa wanfala man for lukaot, wea talem pipol abaotem olketa samting wea happen wea fulfillim olketa purpose bilong Hem. (Daniel 12:4; 2 Timothy 3:1) Kam kasem distaem, datfala sekson for lukaot—olketa anointed Christian, Israel bilong God—duim samting fitim profesi toktok bilong Isaiah abaotem datfala man for lukaot: “Hem barava lukluk gud and lisin gud tumas. And hem go ahed for singaot olsem wanfala lion: ‘Antap long taoa for lukaot, O Jehovah, mi go ahed for standap long daytaem, and long ples bilong mi for lukaot, mi go ahed for stap long naet.’” (Isaiah 21:7, 8) Disfala man for lukaot hem tinghevi tumas long waka bilong hem!

13. (a) Wanem message nao man bilong Jehovah for lukaot hem talem? (b) Hao nao iumi savve sei Babylon the Great hem foldaon finis?

¹³ Wanem nao disfala man for lukaot hem lukim? Man bilong Jehovah for lukaot, sekson bilong hem for witness, sei olsem moa: “Hem foldaon finis! Babylon hem foldaon finis, and evri image bilong god bilong hem, hem [Jehovah] brekem kasem earth!” (Isaiah 21:9) Distaem, bihaen World War I, Babylon the Great nao, world rul bilong giaman religion, hem foldaon long saed bilong paoa wea hem garem. (Jeremiah 50:1-3; Revelation 14:8 ) Dastawe! Datfala war, wea olketa kolem Great War long datfala taem, hem start insaed Christendom, wea olketa bigman bilong religion long tufala saed mekem war kamap moa big taem olketa pullim olketa strong young man for faet. Bigfala shame! Long 1919, Babylon the Great no savve stopem olketa Bible Student, hem nao nem bilong Olketa Witness Bilong Jehovah long datfala taem, for kamaot from wei for no duim waka and startim wanfala witnessing campaign evriwea long world wea go ahed yet. (Matthew 24:14) Datwan hem showimaot klia wanfala wei wea Babylon the Great hem foldaon, olsem hao taem wea Israel kamap free long mek-six century B.C.E. hem markem wei wea Babylon bifor hem foldaon.

14. Wanem magasin nao sekson bilong Jehovah for lukaot olketa iusim long big wei, and hao nao Jehovah blessim diswan?

¹⁴ Datfala sekson for lukaot hem evritaem duim waka bilong hem witim strong and feeling for barava laek for duim stret samting. Long July 1879, olketa Bible Student start for pablisim disfala magasin, long datfala taem olketa kolem Zion’s Watch Tower and Herald of Christ’s Presence. Evri issue from 1879 kasem December 15, 1938, garem toktok hia long front kava “‘Man for Lukaot, Hao Nao Long Naet?’—Isaiah 21:11.”a For 120 year, Wastaoa hem faithful for lukluk long olketa samting wea happen long world and talemaot profesi mining bilong olketa. (2 Timothy 3:1-5, 13) Sekson bilong God for lukaot and “nara sheep” fren bilong olketa, olketa iusim disfala magasin for barava talemaot long olketa man hao wei for vindicatem olmaeti rul bilong Jehovah thru long Kingdom bilong Christ hem klosap. (John 10:16) Waswe, Jehovah blessim disfala witness? Start long firstfala issue bilong 6,000 copy long 1879, Wastaoa hem grow for kasem 22,000,000 copy insaed 132 languis evriwea long world—121 nao olketa pablisim long semtaem. Hem barava fitim for magasin wea namba bilong hem winim evri magasin bilong religion long earth hem nao datwan wea mekhae long nem bilong tru God, Jehovah!

Klining wea Go Ahed

15. Wanem klining wea go ahed nao start bifor 1914?

¹⁵ Insaed samting olsem 40 year go kasem taem wea rul bilong Christ hem start long heven long 1914, olketa Bible Student kamap free from planti teaching bilong Christendom wea no kam from Bible, olsem wei for baby baptaes, soul bilong man no savve dae, purgatory, safa long hellfire, and wanfala Trinity God. Bat olketa needim moa taem for aotem evri rong idea. Olsem example, long olketa year bilong 1920 planti Bible Student werem wanfala pin wea garem cross and crown, and olketa celebratem Christmas and narafala heathen holiday. Bat, for worship mas klin, evri part long wei for worshipim idol mas aot. Holy Bible, Word bilong God nao mas only faondeson for Christian faith and wei bilong laef. (Isaiah 8:19, 20; Romans 15:4) Hem rong for addim eni samting long Word bilong God or tekaotem eni samting.—Deuteronomy 4:2; Revelation 22:18, 19.

16, 17. (a) Wanem rong idea nao sekson for lukaot garem for samfala year? (b) Wanem nao stretfala mining bilong “altar” and “post” long “Egypt”?

¹⁶ Wanfala example bae showimaot wei wea disfala principle hem important tumas. Long 1886 taem C. T. Russell pablisim wanfala buk wea garem nem The Divine Plan of the Ages, hem garem wanfala chart wea joinim samfala sekson long taem bilong man witim Great Pyramid bilong Egypt. Olketa tingse disfala samting wea Pharaoh Khufu buildim hem nao post wea Isaiah 19:19, 20 storyim: “Long datfala day wanfala altar bilong Jehovah bae stap midolwan long land bilong Egypt, and wanfala post bilong Jehovah saed long spialaen bilong hem. And hem mas kamap wanfala saen and wanfala witness for Jehovah bilong olketa army long land bilong Egypt.” Hao nao datfala pyramid hem join witim Bible? Olsem wanfala example, olketa tingse long bilong samfala pasis wea stap insaed long datfala Great Pyramid hem showimaot taem for start long “great tribulation” long Matthew 24:21, long wei wea olketa minim long datfala taem. Gogo samfala Bible Student busy tumas for measurem olketa difren part bilong datfala pyramid for luksavve wanem day nao olketa bae go long heven!

¹⁷ Olketa tinghae tumas long disfala Great Pyramid for samfala year, go kasem taem wea Wastaoa bilong November 15 and December 1, 1928, talemaot klia hao Jehovah no needim stone building wea olketa heathen pharaoh buildim wea garem olketa demon saen bilong wei for studyim olketa star for pruvim witness wea stap insaed Bible. Bat, profesi bilong Isaiah garem spiritual mining. Olsem long Revelation 11:8, “Egypt” hem piksarem world bilong Satan. Datfala “altar bilong Jehovah” hem mekem iumi tingim olketa sakrifaes wea God acceptim from olketa anointed Christian taem olketa stap for lelebet taem insaed disfala world. (Romans 12:1; Hebrews 13:15, 16) Datfala post “saed long spialaen bilong [Egypt]” hem point go long kongregeson bilong olketa anointed Christian, wea hem “wanfala post and saport bilong truth” and wea standap olsem wanfala witness long “Egypt,” datfala world wea olketa klosap for lusim.—1 Timothy 3:15.

18. (a) Hao nao Jehovah go ahed for mekem samting kamap moa klia for olketa honest Bible student? (b) Sapos wanfala Christian no minim evribit wanfala scripture, wanem nao hem wise for duim?

¹⁸ Taem olketa year go pas, Jehovah go ahed for mekem truth kamap moa klia, insaed diswan tu hem kliafala mining abaotem profesi toktok bilong hem. (Proverbs 4:18) Insaed olketa year wea just go pas, iumi lukluk deep moa long mining bilong genereson wea bae no finis bifor end kam, parabol abaotem sheep and goat, and datfala barava rabis samting and wanem taem hem bae standap long wanfala holy ples, datfala niu covenant, taem wea Jesus change and kasem glory, and vision abaotem temple long buk bilong Ezekiel. Samfala taem maet hem hard for minim olketa niufala savve hia, bat reason for diswan kamap klia bihaen. Sapos wanfala Christian no minim evribit mining bilong wanfala scripture, hem gud for followim disfala toktok bilong profet Micah: “Mi bae showimaot fasin for weit long God bilong salvation bilong mi.”—Micah 7:7.

19. Hao nao anointed remnant and nara sheep showimaot strong olsem lion long olketa last day distaem?

¹⁹ Tingim hao datfala man for lukaot “go ahed for singaot olsem wanfala lion: ‘Antap long taoa for lukaot, O Jehovah, mi go ahed for standap long daytaem, and long ples bilong mi for lukaot, mi go ahed for stap long naet.’” (Isaiah 21:8) Anointed remnant garem strong olsem lion taem olketa showimaot klia giaman religion and showim pipol wei for kamap free. (Revelation 18:2-5) Olsem “faithful and wise slave,” olketa provaedem olketa Bible, magasin, and narafala pablikeson long planti languis—“kaikai long proper taem.” (Matthew 24:45) Olketa lead for hipimap “great crowd . . . from evri nation and tribe and pipol and languis.” Olketa hia tu kamap klin long ransom blood bilong Jesus and showimaot wei wea olketa garem heart olsem lion taem olketa duim ‘holy service day and naet’ long God. (Revelation 7:9, 14, 15) Wanem frut nao kamap long year wea go pas bilong olketa anointed Witness bilong Jehovah wea stap yet and olketa fren bilong olketa? Next article bae showim iumi.

[Footnote]

Waswe, Iu Remember?

• Hu nao olketa witness wea Jehovah garem insaed olketa year wea go pas?

• Hao nao Babylon the Great hem start?

• Why nao Jehovah letem Jerusalem, kapitol taon bilong nation bilong olketa witness bilong hem, for finis long 607 B.C.E.? long 70 C.E.?

• Wanem spirit nao sekson bilong Jehovah for lukaot and olketa fren bilong olketa showimaot?

[Piksa long page 7]

“Antap long taoa for lukaot, O Jehovah, mi go ahed for standap”

[Piksa long page 10]

Sekson bilong Jehovah for lukaot tinghevi tumas long waka bilong olketa