Olketa Gud Example​—Iu Kasem Gud Samting From Olketa?

“IUFALA kamap wanfala example for evriwan wea biliv long Macedonia and long Achaia.” Aposol Paul raetem toktok hia go long olketa faithful Christian long Thessalonica. Olketa showimaot barava gudfala example for olketa wea garem sem biliv. Bat olketa bilong Thessalonica seleva tu go ahed for followim example bilong Paul and olketa wea kaban witim hem. Paul hem sei: “Gud nius wea mifala preachim hem no kam long iufala thru long toktok nomoa bat witim paoa and witim holy spirit and strongfala biliv, olsem iufala savve tu wanem kaen man nao mifala kamap for helpem iufala; and iufala followim example bilong mifala.”—1 Thessalonians 1:5-7.

Yes, Paul duim moa samting winim wei for tok aot long pablik. Laef bilong hemseleva tok aot long pablik—wanfala example bilong faith, wei for go ahed strong, and for sakrifaesim seleva. From diswan, Paul and olketa wea kaban witim hem barava affectim laef bilong olketa bilong Thessalonica, wea muvim olketa for acceptim truth nomata olketa anda long “planti trabol.” Bat no Paul and olketa kaban bilong hem nomoa affectim olketa wea biliv hia long gudfala wei. Example bilong olketa narawan wea go ahed strong anda long trabol tu encouragem olketa. Paul raet olsem long olketa long Thessalonica: “Iufala followim example, olketa brata, bilong olketa kongregeson bilong God wea stap long Judea wea wan mind witim Christ Jesus, bikos iufala tu start for safa from pipol bilong iufala seleva olketa sem samting wea olketa tu safa long hem from olketa Jew.”—1 Thessalonians 2:14.

Christ Jesus—Datfala Main Example

Nomata Paul showimaot gud example for followim, hem point go long Jesus Christ olsem datfala main example wea olketa Christian shud followim. (1 Thessalonians 1:6) Christ hem main Example long bifor and long distaem tu. Aposol Peter hem raet: “Hem kolem iufala for followim disfala wei, from Christ hem safa for iufala, and leavim wanfala example for iufala for followim gud olketa step bilong hem.”—1 Peter 2:21.

Bat, Jesus finisim laef bilong hem olsem wanfala man samting olsem 2,000 year bifor. Distaem hem “stap long barava braet laet” olsem wanfala spirit wea kanduit dae. From diswan, “no eni man lukim finis or savve lukim” hem. (1 Timothy 6:16) So, hao nao iumi savve followim hem? Wanfala wei hem for studyim fofala Bible buk wea storyim laef bilong Jesus. Olketa Gospel givim savve abaotem fasin, living, and “tingting” bilong hem. (Philippians 2:5-8) Iumi savve kasem moa savve taem iumi studyim buk Nambawan Man Wea Winim Evri Otherfela Man, wea storyim laef bilong Jesus long barava klia wei and followim taem wea olketa samting happen.a

Example bilong Jesus for sakrifaesim seleva hem barava affectim aposol Paul. Hem talem olketa Christian long Corinth: “Long saed bilong mi bae mi hapi for give and givim miseleva evribit for soul bilong iufala.” (2 Corinthians 12:15) Barava tingting olsem Christ! Taem iumi ting raonem perfect example bilong Christ, iumi tu shud kasem strong for followim hem long living bilong iumi.

Olsem example, Jesus teachim iumi for depend long promis bilong God for provaed for iumi long material wei. Bat hem duim moa samting winim diswan. Hem showimaot faith and trust long Jehovah evriday. Hem sei: “Olketa fox garem ples for sleep and olketa bird garem ples for sleep tu, bat Son bilong man no garem eni ples for putim hed bilong hem for sleep.” (Matthew 6:25; 8:20) Waswe, olketa wari long material samting nao bossim tingting and samting wea iu duim? Or laef bilong iu showimaot iu lukaotem Kingdom firstaem? And waswe long wei wea iu tingim service for Jehovah? Hem olsem datfala Nambawan Example bilong iumi, Jesus? Bible showimaot hao Jesus hem no preach witim strong nomoa bat hem showimaot bigfala strong staka taem. (John 2:14-17) And tu, Jesus showimaot gudfala example long saed long love! Hem sakrifaesim laef bilong hem for olketa disaepol bilong hem! (John 15:13) Waswe, iu followim Jesus thru long wei for showimaot love for olketa Christian brata bilong iu? Or iu letem wei for no perfect stopem love bilong iu for pipol?

Taem iumi trae for followim example bilong Christ, bae iumi fail staka taem. Bat tru tumas Jehovah hem hapi for lukim iumi trae hard for “havem Lord Jesus Christ.”—Romans 13:14.

“Example Long Olketa Sheep”

Waswe, iumi garem samfala insaed kongregeson wea savve olsem gudfala example for iumi distaem? Yes! Olketa brata wea olketa appointim for garem responsibility mas showimaot example. Paul talem Titus, wea servem olketa kongregeson long Crete and wea appointim olketa overseer, hao evri elder wea olketa appointim mas “no garem blame.” (Titus 1:5, 6) Long wei olsem tu aposol Peter hem kaonselem “olketa older man” for kamap “example long olketa sheep.” (1 Peter 5:1-3) Waswe olketa wea serve olsem olketa ministerial servant? Olketa tu mas kamap “olketa man wea minister long gudfala wei.”—1 Timothy 3:13.

Bat hem tru, hem no balance for expectim evri elder or ministerial servant for savve tumas for duim evri part bilong Christian ministry. Paul talem olketa Christian long Rome: “Iumi garem olketa difren present thru long kaeness wea no fitim wea hem givim long iumi.” (Romans 12:6) Olketa difren brata savve gud long difren samting. Hem no fitim gudfala tingting for expectim olketa elder for duim and talem evriting long perfect wei. “Iumi evriwan mistek planti taem,” Bible hem sei long James 3:2. “Sapos eniwan no mistek long toktok, hem wanfala perfect man, wea fit for bossim tu full body bilong hem.” Bat nomata olketa no perfect, olketa elder, olsem Timothy, “kamap example long olketa faithful wan long toktok, long fasin, long love, long faith, long wei for klin.” (1 Timothy 4:12) Taem olketa elder duim olsem, olketa sheep bae willing for followim kaonsel bilong Hebrews 13:7: “Tingim olketa wea leadim iufala, . . . and taem iufala lukim fasin bilong olketa, followim faith bilong olketa.”

Olketa Nara Example Bilong Distaem

Insaed planti year wea go pas, staka moa showimaot gud example. Waswe long olketa thousand missionary wea sakrifaesim seleva, wea “lusim olketa haos or brata or sista or dadi or mami or pikinini or land” for fulfillim Christian assignment long difren kantri? (Matthew 19:29) Tingim tu olketa traveling overseer and olketa waef bilong olketa, olketa man and woman wea serve olsem olketa volunteer long olketa office bilong Watch Tower Society, and olketa pioneer wea minister long kongregeson. Waswe, olketa example olsem savve muvim olketa narawan? Wanfala Christian man for talemaot gud nius long Asia hem tingim bak wanfala missionary from mek-eit class bilong Watchtower Bible Skul Bilong Gilead. Hem sei datfala faithful brata hem “willing for feisim staka mosquito and barava hot weather. . . . Bat winim diswan hem wei wea hem savve story long Chinese and Malay languis nomata hem kam from England.” Samting wea kamaot from disfala gudfala example? Datfala brata hem sei: “Kwaet fasin and trust bilong hem muvim mi for want for kamap wanfala missionary taem mi growap.” Iumi nating sapraes hao disfala man hem kamap missionary.

Watch Tower Publications Index garem list bilong olketa laef story wea stap insaed olketa Wastaoa and Wekap! magasin. Olketa story bilong olketa man wanwan wea lusim wei for waka for world and olketa goal bilong olketa, winim olketa wik point, mekem olketa bigfala change, go ahed for keepim gudfala tingting anda long persecution, waka hard evritaem, go ahed strong, loyal, hambol, and sakrifaesim seleva. Abaotem olketa story hia, wanfala reader raet olsem: “Taem mi read abaotem wanem olketa narawan kasem, olketa mekem mi moa hambol and garem wei for thankiu olsem wanfala Christian, and olketa helpem mi for no ting long miseleva tumas or for selfish.”

No forgetim tu olketa gudfala example insaed kongregeson bilong iu: olketa famili hed wea no givap for kea for material and spiritual need bilong famili bilong olketa; olketa sista—insaed diswan olketa single mami—wea feisim olketa hevi for bringimap pikinini seleva and semtaem olketa busy insaed ministry; olketa olo and cripple wea go ahed faithful nomata olketa kamap moa wik and garem nogud health. Waswe, olketa example olsem no muvim iu?

Hem tru, world hem fulap witim olketa nogud example. (2 Timothy 3:13) Nomata olsem, tingim encouragement bilong Paul for olketa Christian wea stap long Judea. Bihaen hem storyim gudfala example bilong staka man and woman bilong faith bifor kam, aposol Paul encouragem olketa olsem: “So, from iumi garem bigfala cloud bilong olketa witness raonem iumi, iumi tu . . . ran witim fasin for go ahed strong long datfala resis wea stap front long iumi, taem iumi lukluk gud long Chief Wan and Man Wea Mekem Perfect faith bilong iumi, Jesus.” (Hebrews 12:1, 2) Olketa Christian distaem tu garem “bigfala cloud” bilong olketa gudfala example raonem olketa—from bifor kam and distaem tu. Waswe, iu really kasem gud samting from olketa? Iu savve kasem sapos iu disaed strong for kamap “man wea followim, no nogud samting, bat gudfala samting.”—3 John 11.

[Footnote]

[Blurb long page 20]

Hem no balance for expectim evri elder or ministerial servant for savve tumas for duim evri part bilong Christian ministry

[Piksa long page 21]

Olketa elder mas kamap “example long olketa sheep”