Respect for Olketa wea Garem Paoa​—Why Hem Barava Important?

HU NAO no hapi long wei wea police garem paoa for arrestim criminal wea stealim eni samting bilong hem or laek spoelem famili bilong hem? And waswe, iumi no tinghae long kot wea garem paoa for panisim criminal for protectim community?

Maet iumi tingim tu olketa nara gud samting wea helpem pablik, olsem wei for fixim road, klin living, and education—wea planti taem tax wea gavman markem nao peim selen for olketa samting. Olketa tru Christian nao main wan wea luksavve hao respect for olketa wea garem paoa hem barava important. Bat, hao big nao man mas showim respect? And long wanem part long living nao iumi mas showim respect long olketa wea garem paoa?

Olketa wea Garem Paoa Insaed Long Community

Bible hem talem evri pipol, nomata man wea biliv or no biliv, for respectim olketa wea garem paoa long kantri, wea diswan for helpem community. Christian aposol Paul raet abaotem diswan long olketa Christian long Rome, and hem gud for lukim wanem hem talem, long Romans 13:1-7.

Paul hem citizen bilong Rome, and Rome nao world paoa long datfala taem. Leta bilong Paul, wea hem raetem long samting olsem 56 C.E., kaonselem olketa Christian for kamap olketa gudfala citizen. Hem raet olsem: “Letem evri soul stap anda long olketa hae paoa, from no eni paoa bae stap sapos God hem no letem; olketa paoa bilong distaem stap long ples wea God letem olketa for stap.”

Long hia Paul minim hao eni man wea garem paoa bae no stap sapos God hem no letem. Long datfala wei nao olketa hae paoa stap long ples wea God letem insaed plan bilong hem. Dastawe hem sei moa “man wea againstim disfala paoa hem againstim datfala arrangement bilong God.”

Nomata olketa citizen wea duim gud samting maet kasem praise from olketa hae paoa, olketa hae paoa hia garem paoa tu for panisim pipol wea duim rong samting. Olketa wea duim nogud samting garem planti reason for fraetem wei wea gavman garem paoa for “pei bak,” bikos hem waka olsem “minister bilong God.”

Paul finisim toktok bilong hem olsem: “Dastawe, strongfala reason stap for iufala stap anda, no from datfala kros nomoa, bat from conscience bilong iufala tu. From dastawe iufala tu peim olketa tax; from olketa olketa pablik servant bilong God wea duim disfala samting.”

Responsibility for markem tax hem bilong olketa hae paoa, no bilong man wea peim tax. Olsem wanfala honest citizen, wanfala Christian keepim gudfala conscience. Hem savve hao taem hem stap anda long olketa hae paoa and peim tax wea hem mas givim, hem no just saportim standard bilong community wea hem stap insaed bat hem live followim mark bilong God tu.

Famili and Paoa

Waswe long paoa insaed famili? Taem baby just born, planti taem hem bae krae or singaot taem hem laekem samting. Bat wise dadi or mami bae luksavve wanem nao baby barava needim and no disaed followim kros bilong baby nomoa. Samfala pikinini, taem olketa growap kam, olketa free for duim eni samting nomoa and dadi and mami letem olketa for putim rul for olketa seleva. From pikinini no garem savve, maet olketa duim crime or nara rong samting, wea spoelem famili and community, olsem planti wea garem paoa distaem savve gud long diswan.

“Dadi and mami disciplinem pikinini taem hem leit tumas,” Rosalind Miles hem talem wea raetem buk Children We Deserve. “Taem for start hem from taem baby hem born.” Sapos from start, dadi and mami tok long kaenfala wei, showim kea and wan mind long samting tufala duim, pikinini bae kwiktaem lane for acceptim datfala paoa and loving discipline wea kam from datwan.

Bible garem planti information abaotem paoa insaed famili. Insaed long buk bilong Proverbs, wise man Solomon tok abaotem wan mind wea dadi and mami wea fraet long God showim front long pikinini, taem hem sei: “Lisin, son bilong mi, long discipline bilong dadi bilong iu, and no lusim law bilong mami bilong iu.” (Proverbs 1:8) Taem dadi and mami keepim datkaen wan mind front long pikinini, pikinini savve wanem nao dadi and mami laekem hem for duim. Maet hem trae for mekem dadi or mami againstim narawan mekem hem kasem wanem hem laekem, bat sapos dadi and mami wan mind long paoa bilong tufala, diswan bae protectim pikinini.

Bible minim hao hasband nao garem main responsibility for spiritual saed bilong no pikinini nomoa bat waef tu. Bible storyim diswan olsem waka bilong hed. Hao nao hem mas duim waka bilong hed? Paul talem hao olsem Christ hem Hed bilong kongregeson, man hem hed bilong waef tu. Then Paul hem sei moa: “Olketa hasband, go ahed for lovem waef bilong iufala, olsem Christ tu hem lovem kongregeson [spiritual waef bilong hem] and givim laef bilong hem for kongregeson.” (Ephesians 5:25) Taem wanfala man followim example bilong Jesus and duim waka bilong hed long loving wei, hem bae kasem “bigfala respect” from waef. (Ephesians 5:33) Pikinini insaed diskaen famili bae lukim tu gud samting wea kamaot from paoa wea God givim and hem encouragem olketa for acceptim.—Ephesians 6:1-3.

Hao nao singol dadi or mami, witim eniwan wea partner bilong hem dae, savve deal witim disfala problem? Nomata hem dadi or mami, hem savve ask stret for paoa bilong Jehovah God and Jesus Christ. Evritaem Jesus story witim paoa—bilong Dadi bilong hem and bilong olketa Scripture.—Matthew 4:1-10; 7:29; John 5:19, 30; 8:28.

Bible givim planti nambawan principle saed long problem wea pikinini feisim. Taem dadi or mami faendem olketa principle hia and followim, hem bae fit for givim loving kaonsel wea bae helpem pikinini. (Genesis 6:22; Proverbs 13:20; Matthew 6:33; 1 Corinthians 15:33; Philippians 4:8, 9) Dadi and mami savve luk long information insaed olketa Bible buk wea olketa wakem for helpem olketa trainim pikinini for luksavve why hem gud for respectim paoa bilong Bible.a

Christian Kongregeson and Paoa

“Diswan hem Son bilong mi, wea mi lovem, wea mi appruvim; lisin long hem.” (Matthew 17:5) Toktok hia wea Jehovah God nao talem, saportim Jesus olsem man wea toktok witim paoa from God. Toktok bilong hem stap insaed fofala story long Gospel wea isi for iumi lukim.

Just bifor Jesus go ap long heven, hem talem olketa disaepol: “Evri paoa nao mi kasem long heven and long earth.” (Matthew 28:18) Olsem Hed bilong kongregeson bilong hem, Jesus no lukluk gud nomoa long step bilong olketa anointed follower bilong hem long earth, bat start long taem hem pourimaot holy spirit long Pentecost 33 C.E., hem iusim olketa tu olsem wei for givimaot truth, olsem wanfala “faithful and wise slave.” (Matthew 24:45-47; Acts 2:1-36) Wanem nao hem duim for fulfillim evri samting hia for strongim Christian kongregeson? “Taem hem go ap long hae . . . , hem givim olketa present olsem man.” (Ephesians 4:8) Olketa “present olsem man” hia hem olketa Christian elder, wea holy spirit appointim and wea kasem paoa for lukaftarem spiritual saed bilong olketa brata bilong olketa.—Acts 20:28.

For disfala reason Paul givim kaonsel: “Tingim olketa wea leadim iufala, wea talem word bilong God long iufala, and taem iufala lukim fasin bilong olketa, followim faith bilong olketa.” From olketa faithful man hia barava followim step bilong Jesus, hem wise for followim faith bilong olketa. Then Paul sei moa: “Obeyim olketa wea lead long iufala and stap anda long olketa, [“go ahed for luksavve long paoa wea olketa garem ovarem iufala,” The Amplified Bible] from olketa lukaftarem soul bilong iufala olsem olketa wea bae givim ansa; mekem olketa duim diswan witim hapi and no witim sorre, from datwan bae spoelem iufala.”—Hebrews 13:7, 17.

Wanem nao happen taem samfala no followim disfala instruction? Samfala member bilong first Christian kongregeson duim datwan and kamap apostate. Bible storyim Hymenaeus and Philetus olsem man wea spoelem faith bilong samfala and wea rabis toktok bilong olketa “spoelem holy samting.” Wanfala samting tufala talem hem hao resurrection happen finis, maet spiritual wan or tokpiksa wan, and so no eni resurrection need for kamap moa long future anda long Kingdom bilong God.—2 Timothy 2:16-18.

Olketa wea garem paoa stretem disfala problem. Olketa Christian elder pruvim hao olketa reason hia hem rong bikos olsem olketa wea tok for Jesus Christ, olketa iusim paoa bilong Scripture. (2 Timothy 3:16, 17) Hem semsem tu distaem insaed Christian kongregeson, wea Bible kolem olsem “wanfala post and saport bilong truth.” (1 Timothy 3:15) Iumi bae nating letem false teaching for spoelem “plan bilong healthy toktok,” wea stap for iumi olsem gudfala trust insaed olketa page bilong Bible.—2 Timothy 1:13, 14.

Nomata respect for olketa wea garem paoa hem gogo daon kwiktaem long world, olsem olketa Christian iumi luksavve olketa stretfala paoa insaed community, insaed famili, and insaed Christian kongregeson hem stap for helpem iumi. Hem important for respectim olketa wea garem paoa for iumi stap gud long physical wei, long feeling, and spiritual wei. Taem iumi acceptim and respectim olketa hia wea kasem paoa from God, iumi bae kasem protection from tufala nambawan man wea garem paoa—Jehovah God and Jesus Christ—for gudfala samting for iumi for olowe.—Psalm 119:165; Hebrews 12:9.

[Footnote]

[Blurb long page 5]

Bible garem planti information abaotem paoa insaed famili

[Piksa long page 6]

Singol dadi or mami savve ask stret for paoa bilong Jehovah God and Jesus Christ

[Piksa long page 7]

Olketa Christian luksavve hao stretfala paoa insaed famili, insaed Christian kongregeson, and insaed community hem stap for helpem olketa

[Piksa Credit Line long page 4]

Photo by Josh Mathes, Collection of the Supreme Court of the United States