Jehovah Givim Paoa Long Man wea Taed
“[Jehovah] givim paoa long man wea taed; and man wea no garem bigfala strong, hem mekem full paoa stap long hem.”—ISAIAH 40:29.
1. Storyim paoa wea stap insaed evri samting wea God creatim.
PAOA bilong Jehovah no garem end. And bigfala strong stap long olketa samting wea hem creatim! Smolfala atom—wea hem nao faondeson bilong evri samting—hem smol fogud dastawe wan drop wata garem wan handred billion billion atom insaed.a Evri laef long disfala earth depend long paoa wea kam from olketa atomic fire long sun. Bat haomas paoa bilong sun nao iumi needim for laef go ahed long earth? Earth hem kasem barava smol haf bilong energy wea kamaot from sun. Nomata olsem, datfala smol haf bilong energy bilong sun wea kasem earth hem barava moa big winim energy wea evri big bisnis long world iusim.
2. Wanem nao Isaiah 40:26 sei abaotem paoa bilong Jehovah?
2 Nomata sapos iumi ting raonem atom or lukluk long bigfala universe, iumi sapraes long barava bigfala paoa bilong Jehovah. Dastawe hem sei: “Luk go ap and lukim. Hu nao creatim evri samting hia? Hem nao Datwan wea tekem kam army bilong olketa and nambarem tu, and kolem evriwan long nem bilong olketa. From hem garem staka akson paoa, and hem iusim tumas paoa tu, no eniwan long olketa hia hem lus”! (Isaiah 40:26) Yes, Jehovah hem “iusim tumas paoa tu” and hem Start bilong “akson paoa” wea hem iusim for mekem full universe kamap.
Needim Paoa wea Winim Wanem Iumi Garem
3, 4. (a) Wanem nao samfala samting wea savve mekem iumi taed tumas? (b) Wanem kwestin nao iumi need for lukluk long hem?
3 Hem tru, paoa bilong God no savve finis, bat man savve kamap taed. Evriwea iumi kasem, iumi lukim pipol wea taed. Olketa wekap taed, go long waka or skul taed, kam bak long haos taed, and go sleep taem olketa no just taed nomoa bat barava taed. Samfala laek for go samwea for kasem lelebet rest wea olketa barava needim. Olsem olketa servant bilong Jehovah, iumi tu savve taed, from laef bilong iumi wea followim wei for lovem God needim hard waka. (Mark 6:30, 31; Luke 13:24; 1 Timothy 4:8) And planti nara samting savve isisi tekem awe paoa bilong iumi.
4 Nomata iumi olketa Christian, iumi tu savve kasem olketa problem wea savve kasem olketa nara pipol. (Job 14:1) Sik, problem saed long selen, or samfala difren trabol wea kasem living maet mekem iumi feel nogud, and iumi wikdaon. For join witim olketa challenge olsem hem olketa test wea kasem olketa wea kasem persecution for saed bilong raeteous fasin. (2 Timothy 3:12; 1 Peter 3:14) From evriday iumi kasem olketa hevi bilong disfala world and olketa againstim Kingdom-preaching waka bilong iumi, samfala long iumi maet taed fogud and tingting for slow daon long service bilong Jehovah. And tu, for trae brekem faithful service bilong iumi long God, Satan datfala Devil iusim evri samting wea hem fit for kasem. From diswan, hao nao iumi savve kasem spiritual strong wea iumi needim for winim wei for taed evribit and givap?
5. Why nao iumi needim strong wea winim wanem man garem for duim Christian ministry?
5 For spiritual strong, iumi mas depend long Jehovah, datfala Creator wea garem bigfala paoa. Aposol Paul showimaot hao Christian ministry bae needim moa paoa winim wanem wanfala man wea no perfect hem garem. Hem raet olsem: “Iumi garem disfala riches long olketa clay pot, wei wea paoa wea winim wanem iumi garem hem bilong God and no bilong iumiseleva.” (2 Corinthians 4:7) Olketa anointed Christian go ahed for duim “ministry for fren bak moa” witim help bilong olketa fren bilong olketa wea garem hope for stap long earth. (2 Corinthians 5:18; John 10:16; Revelation 7:9) From iumi olketa man wea no perfect feisim persecution taem iumi duim waka bilong God, iumi kanduit depend long strong bilong iumiseleva. Jehovah helpem iumi thru long holy spirit bilong hem, so wei wea iumi wik mekhae long paoa bilong hem. And iumi kasem comfort from promis wea sei “Jehovah bae saportim olketa wea raeteous”!—Psalm 37:17.
‘Jehovah Nao Paoa wea Iumi Needim’
6. Hao nao olketa scripture helpem iumi for bilivim Jehovah hem Start bilong strong?
6 Father bilong iumi long heven hem “iusim tumas paoa tu” and hem isi tumas for strongim iumi bak. For tok stret, iumi herem hao: “[Jehovah] givim paoa long man wea taed; and man wea no garem bigfala strong, hem mekem full paoa stap long hem. Olketa boy bae feel wiki and kamap taed, and olketa youngfala man bae stambol, bat olketa wea hope long Jehovah bae kasem paoa moa. Olketa bae garem wing and flae olsem olketa eagle. Olketa bae ran and no kamap taed; olketa bae wakabaot and no wikdaon.” (Isaiah 40:29-31) From olketa hevi go ahed for kamap moa big, iumi maet samfala taem feel olsem wanfala man wea ranran wea taed tumas and olsem leg bilong hem no fit for karem hem eniwea moa. Bat end long resis bilong laef hem stap front long iumi, and iumi mas no givap. (2 Chronicles 29:11) Enemy bilong iumi, datfala Devil, hem wakabaot “olsem wanfala lion wea singaot strong,” and hem laek for stopem iumi. (1 Peter 5:8) Letem iumi no forget hao ‘Jehovah hem strong and shield bilong iumi,’ and hem provaedem staka samting for “givim paoa long man wea taed.”—Psalm 28:7.
7, 8. Wanem pruv nao stap hao Jehovah strongim David, Habakkuk, and Paul?
7 Jehovah givim David strong wea hem needim for go ahed nomata hem feisim olketa hardfala samting. Witim bigfala faith and trust, David fit for sei: “Thru long God nao iumi bae kasem paoa wea iumi needim, and hemseleva nao bae purubutim olketa wea againstim iumi.” (Psalm 60:12) Jehovah givim paoa long Habakkuk mekem hem fit for finisim assignment bilong hem olsem profet. Habakkuk 3:19 hem sei: “Jehovah datfala Sovereign Lord nao paoa wea mi needim, and hem bae mekem leg bilong mi olsem wanfala deer, and long olketa haefala ples bilong mi hem bae mekem mi wakabaot.” Hem gud tu for tingim example bilong Paul, wea raet: “Long evri samting mi kasem strong from [God] wea givim paoa long mi.”—Philippians 4:13.
8 Olsem David, Habakkuk, and Paul, iumi shud showimaot faith long wei wea God savve strongim iumi and paoa wea hem garem for sevem iumi. From iumi luksavve hao Sovereign Lord Jehovah hem Start bilong ‘paoa wea iumi needim,’ distaem letem iumi lukluk long samfala wei for kasem spiritual strong from staka samting wea God provaedem.
Provaedem Spiritual Samting for Strongim Iumi
9. Wanem waka nao olketa Christian pablikeson duim for feedim iumi?
9 Sapos iumi waka hard for studyim olketa Scripture witim help bilong olketa Christian pablikeson, datwan savve strongim and keepim iumi gud. Man wea raetem Psalm sing olsem: “Hapi nao man . . . [wea] hem hapi long law bilong Jehovah, and hem read smol long law bilong Hem day and naet. And hem bae kamap olsem wanfala tree wea olketa plantim klosap long planti stream bilong wata, wea garem frut long taem bilong hem and wea leaf bilong hem no savve dae, and evri samting wea hem duim bae win.” (Psalm 1:1-3) Olsem iumi mas kaikai for keepim body strong, iumi needim spiritual kaikai wea God provaedem thru long Word bilong hem and olketa Christian pablikeson for keepim spiritual strong bilong iumi. Hem nao, study wea garem mining and wei for ting raonem hem important tumas.
10. Long wanem taem nao maet iumi faendem taem for study and ting raonem?
10 Man kasem nambawan samting taem hem ting raonem “olketa deep samting bilong God.” (1 Corinthians 2:10) Bat long wanem taem nao bae iumi fit for garem taem for ting raonem? Son bilong Abraham, Isaac “wakabaot go aotsaed mekem hem savve ting raonem long field klosap long end long day.” (Genesis 24:63-67) Man for raetem Psalm David ‘insaed long taem bilong naet gard hem ting raonem God.’ (Psalm 63:6) Iumi savve studyim Word bilong God and ting raonem long morning, long evening, long naet—yes, long enitaem. Study olsem and wei for ting raonem lead go long nara spiritual samting wea Jehovah provaedem—prea.
11. Why nao iumi shud tinghae long wei for prea evritaem?
11 Prea long God wea iumi duim evritaem hem help for strongim iumi. So hem gud for “go ahed for prea.” (Romans 12:12) Samfala taem, iumi need for ask stret for wisdom and strong wea iumi needim for deal witim wanfala test. (James 1:5-8) Letem iumi sei thankiu and givim praise long God tu taem iumi lukim wei wea olketa purpose bilong hem fulfill or lukim hao hem strongim iumi for go ahed long service bilong hem. (Philippians 4:6, 7) Sapos iumi stap klosap long Jehovah long prea, hem bae nating lusim iumi. Olsem David hem singim: “Lukim! God hem helper bilong mi.”—Psalm 54:4.
12. Why nao iumi shud askem God for holy spirit bilong hem?
12 Father bilong iumi long heven mekem iumi feel gud and strongim iumi thru long holy spirit or active force bilong hem. Paul raet olsem: “Mi bendim knee bilong mi long Father . . . mekem hem savve givim iufala fitim olketa richfala samting bilong glory bilong hem for kamap strongfala man witim paoa thru long spirit bilong hem.” (Ephesians 3:14-16) Iumi shud prea for holy spirit, and trust hao Jehovah bae blessim iumi witim datwan. Jesus minim olsem: Sapos wanfala pikinini askem dadi for wanfala fish, bae wanfala loving dadi givim hem wanfala snek? Nomoa nao. So hem sei olsem: “Sapos iufala, nomata iufala [sinner and olsem] wicked pipol, savve hao for givim gudfala present long olketa pikinini bilong iufala, Father bilong iufala long heven bae barava givim holy spirit long olketa wea askem hem!” (Luke 11:11-13) Letem iumi prea witim trust olsem and remember evritaem hao olketa faithful servant bilong God savve “kamap strongfala man” witim paoa thru long spirit bilong hem.
Kongregeson—Help for Strongim Iumi
13. Hao nao iumi shud tingim olketa Christian meeting?
13 Jehovah strongim iumi thru long olketa meeting bilong Christian kongregeson. Jesus hem sei: “Taem tufala or thrifala hipap tugeta long nem bilong mi, mi stap midolwan long olketa.” (Matthew 18:20) Taem Jesus mekem datfala promis, hem storyim samfala samting wea olketa wea lead long kongregeson need for lukluk long hem. (Matthew 18:15-19) Bat, toktok bilong hem fitim evri meeting, assembly, and convention bilong iumi, wea start and finis witim prea long nem bilong hem. (John 14:14) So hem wanfala privilege for attendim kaen Christian hipap olsem, nomata sapos tu-thri stap or staka thousand stap. Dastawe letem iumi showimaot iumi tinghae long olketa taem olsem wea goal bilong olketa hem for strongim iumi long spiritual wei and muvim iumi for showimaot love and gudfala waka.—Hebrews 10:24, 25.
14. Wanem gud samting nao iumi kasem from hard waka bilong olketa Christian elder?
14 Olketa Christian elder provaedem spiritual help and encouragement. (1 Peter 5:2, 3) Paul helpem and encouragem olketa kongregeson wea hem servem, olsem olketa traveling overseer duim distaem. Yes, hem barava laek for stap witim olketa wea biliv olsem hem, mekem wei for givimaot encouragement wea buildimap man kamap. (Acts 14:19-22; Romans 1:11, 12) Letem iumi evritaem showimaot iumi tinghae long olketa elder long kongregeson bilong iumi and olketa nara Christian overseer, wea duim bigfala waka for strongim iumi long spiritual wei.
15. Hao nao olketa wea biliv olsem iumi insaed long kongregeson savve kamap “help for strongim” iumi?
15 Olketa wea biliv olsem iumi, hem nao kongregeson bilong iumi, savve “help for strongim” iumi. (Colossians 4:10, 11) Olsem ‘olketa trufala fren,’ olketa savve helpem iumi long taem bilong trabol. (Proverbs 17:17) Olsem example, taem 220 servant bilong God kamaot from Sachsenhausen concentration camp anda long gard bilong olketa Nazi long 1945, olketa mas wakabaot 200 kilometer. Olketa travel olsem wanfala grup, and olketa wea strong lelebet pullim olketa wea wik tumas long samfala smol trailer. Wanem nao kamaot from diswan? Long disfala wakabaot bilong dae wea winim 10,000 long datfala concentration camp dae long hem, no eni Jehovah’s Witness dae. Kaen story olsem wea kamap insaed long olketa Watch Tower pablikeson, wea insaed diswan hem Yearbook of Jehovah’s Witnesses and Jehovah’s Witnesses—Proclaimers of God’s Kingdom, pruvim hao God givim paoa long pipol bilong hem, mekem olketa no savve givap.—Galatians 6:9.b
Field Ministry Strongim Iumi
16. Hao nao wei for duim ministry evritaem strongim iumi long spiritual wei?
16 Wei for duim Kingdom-preaching waka evritaem hem strongim iumi long spiritual wei. Kaen waka olsem helpem iumi for tinghae long Kingdom bilong God and tingim evritaem laef olowe and olketa blessing bilong hem. (Jude 20, 21) Olketa promis long Bible wea iumi storyim long ministry bilong iumi givim iumi hope and savve mekem iumi strong olsem profet Micah, wea sei: “Iumi . . . bae wakabaot long nem bilong Jehovah, God bilong iumi go kasem longfala taem, yes for olowe.”—Micah 4:5.
17. Wanem idea nao stap saed long hom Bible study?
17 Taem iumi iusim moa and moa olketa Scripture for teachim narafala pipol, datwan savve strongim wei wea iumi fren witim Jehovah. Olsem example, taem iumi conductim Bible study long buk Savvy Wea Lead Go long Laef Olawe, hem gud for readim and storyim samfala long olketa scripture wea stap. Diswan helpem student and strongim spiritual wei bilong iumi for minim samting. Sapos student garem problem for minim wanfala idea bilong Bible or wanfala tokpiksa, iu savve iusim winim wan study for finisim wanfala chapter long Savvy buk. Iumi hapi tumas for prepare gud and trae hard for helpem narawan for kam klosap long God!
18. Storyim hao nao iumi iusim Savvy buk long gudfala wei.
18 Evri year, iumi iusim Savvy buk long gudfala wei for helpem staka thousand for kamap servant bilong Jehovah wea dedicate, and insaed diswan hem planti wea no savve long Bible bifor. Olsem example, taem hem wanfala pikinini, wanfala Hindu man long Sri Lanka herem wanfala Witness storyim Paradaes. Samfala year bihaen man hia go lukim disfala Witness, and no longtaem bihaen hasband bilong disfala Witness startim wanfala Bible study witim disfala man. For tok stret, datfala young man kam for wanfala study evriday, and Savvy buk hem finis insaed long short taem nomoa. Hem start for attendim evri meeting, finis from religion bilong hem bifor, and kamap wanfala Kingdom pablisa. Kasem taem hem baptaes, hem start for conductim finis wanfala study witim wanfala fren bilong hem.
19. Taem iumi lukaotem Kingdom firstaem, iumi savve trust long wanem?
19 Wei for lukaotem Kingdom firstaem bae mekem iumi kasem hapi wea strongim iumi. (Matthew 6:33) Nomata iumi experiencem olketa difren test, iumi go ahed for talemaot gud nius witim hapi and strong. (Titus 2:14) Planti long iumi kasem mark bilong full-taem pioneer service, and samfala serve long ples wea needim moa pipol for preach. Nomata sapos iumi hapi for mekhae long samting bilong Kingdom long olketa wei olsem or nara difren wei moa, iumi trust hao Jehovah bae no forgetim waka and love bilong iumi wea iumi showim for nem bilong hem.—Hebrews 6:10-12.
Go Ahed Long Strong Bilong Jehovah
20. Hao nao iumi savve showimaot iumi depend long Jehovah for strong?
20 Yes, letem iumi showimaot hao iumi hope long Jehovah and depend long hem for strong. Iumi savve duim olsem long wei wea iumi iusim olketa spiritual samting wea hem provaedem thru long datfala ‘faithful slave.’ (Matthew 24:45) Wei for studyim Word bilong God seleva and long kongregeson witim help bilong olketa Christian pablikeson, prea wea kam from heart, spiritual help from olketa elder, gudfala faithful example bilong olketa wea garem sem biliv olsem iumi, and wei for join insaed long ministry evritaem, olketa nao samfala samting wea strongim wei wea iumi fren witim Jehovah and strongim iumi for go ahed for duim holy service bilong hem.
21. Hao nao aposol Peter and Paul talemaot need for kasem strong wea kam from God?
21 Nomata iumi olketa man wea wik, Jehovah bae strongim iumi for duim will bilong hem sapos iumi depend long hem for help. Aposol Peter luksavve long need for help olsem, taem hem raet: “Sapos eniwan hem serve, letem hem serve long wei for depend long strong wea God givim.” (1 Peter 4:11) Paul tu showimaot hem depend long strong wea kam from God taem hem sei: “Mi hapi long olketa wik point, long toktok wea spoelem mi, long taem bilong need, long persecution and hard samting, for Christ. Bikos taem mi wik, hem nao taem wea mi garem paoa.” (2 Corinthians 12:10) Letem iumi showimaot semkaen strong biliv and givim glory long Sovereign Lord Jehovah, wea givim paoa long man wea taed.—Isaiah 12:2.
[Olketa Footnote]
a Disfala namba, followim U.S. wei for kaont, hem 1 wea garem 20-fala zero bihaenem hem.
b Watchtower Bible and Tract Society of New York, Inc. nao pablisim.
Hao Nao Bae Iu Ansa?
• Why nao pipol bilong Jehovah needim paoa wea winim wanem man garem?
• Wanem Bible pruv nao stap hao God strongim olketa servant bilong hem?
• Wanem nao samfala spiritual samting wea Jehovah provaedem for strongim iumi?
• Hao nao iumi savve showimaot iumi depend long God for strong?
[Piksa long page 12]
Taem iumi iusim olketa Scripture for teachim narafala pipol, diswan savve strongim wei wea iumi fren witim Jehovah