Samting Muvim Olketa for Serve
WANEM nao bae muvim 24 hasband and waef long best taem bilong laef bilong olketa for lusim olketa famili, fren, and ples wea olketa savve gud long hem for go duim missionary waka long olketa nara kantri? Why nao bae olketa hapi tumas for go long olketa ples olsem Papua New Guinea and Taiwan, and tu olketa kantri long Africa and Latin-America? From olketa laek traem niu samting? Nomoa. Samting wea muvim olketa hem trufala love for God and neiba.—Matthew 22:37-39.
Hu nao pipol hia? Olketa wea graduate from mek-109 class bilong Watchtower Bible Skul Bilong Gilead. Long Saturday, September 9, 2000, total bilong 5,198 hipap long Watchtower Educational Center—wea stap long Patterson, New York—and olketa nara ples for lisin long loving kaonsel wea savve helpem olketa student for win olsem olketa missionary.
Chairman bilong program hem Stephen Lett, wanfala member bilong Teaching Komiti bilong Governing Body bilong Olketa Jehovah’s Witness. For startim tok bilong hem, hem iusim Matthew 5:13, “Iufala nao salt bilong earth.” Brother Lett minim wei wea olketa toktok bilong Jesus barava fitim olketa student wea graduate. Olsem example, salt savve mekem samting teist gud. Olsem tu, from gudfala waka bilong olketa for preach, olketa missionary olsem salt long tokpiksa wei.
Encouragement Taem Olketa Go
Then Brother Lett introducem samfala wea servem Jehovah for longtaem and olketa givim samfala Bible tok wea short bat garem paoa. First wan nao John Wischuk, wea serve long Raeting Department. Theme bilong hem, “Barava Short Psalm Encouragem Missionary Spirit,” hem kam from Psalm 117. Distaem need stap evriwea long world for givim witness long olketa “nation” and “tribe” abaotem Jehovah and Kingdom bilong hem. Olketa student kasem encouragement for fulfillim wanem Psalm 117 talem long wei for muvim narawan for “Praisem Jah.”
Then chairman introducem Guy Pierce bilong Governing Body. Hem tok long subject “Mas Willing for Change, bat Strong.” Word bilong God hem strong. Deuteronomy 32:4 kolem Jehovah God datfala Rok, bat Word bilong hem savve fitim evri languis grup and kastom—yes, for evri man. Olketa student kasem encouragement for preachim Word bilong God, letem datfala message affectim heart and conscience bilong pipol. (2 Corinthians 4:2) Brother Pierce encouragem olketa for “strong for olketa stretfala principle, bat willing for change. No luk daonem olketa long assignment bilong iu from olketa garem difren kastom.”
Karl Adams, wanfala Gilead instructor, wea serve long world hedquarter for klosap 53 year, storyim theme wea mekem man tingting “Wea Nao Bae Iu Go From Hia?” Hem tru, 24 hasband and waef hia kasem olketa missionary assignment long 20 difren kantri raonem world, bat kwestin hem kamap, taem iu kasem ples and iu lukim finis, then bae hao? Iumi stap long world wea garem fasin for nating satisfae. Pipol want for go long olketa niu ples and duim niu samting for mekem olketa seleva hapi. Long narasaed, olketa student kasem assignment from Jehovah long ples wea hem wantem olketa for stap for kea long wei wea no selfish for olketa “sheep” bilong hem. Olketa shud no olsem olketa long Israel bifor wea thru long selfish fasin missim chance for Jehovah iusim olketa for blessim evri man. Bat, olketa shud copyim Jesus Christ, wea evritaem obey and no selfish for duim will bilong Dadi bilong hem.—John 8:29; 10:16.
“Barava Tinghae long Olketa Deep Samting Bilong God” hem nao theme bilong Wallace Liverance, registrar bilong Gilead Skul. Planti taem olketa Scripture storyim Word bilong God olsem olketa riches, ston wea garem hae price, spesol metal, and olketa samting wea pipol barava tinghae long hem and lukaotem. Proverbs 2:1-5 showimaot hao for faendem “barava savve bilong God,” iumi mas lukaotem hem olsem “riches wea haed.” Datfala speaker encouragem olketa student for go ahed digdig long olketa deep samting bilong God taem olketa serve long olketa niu assignment. Brother Liverance explainim olsem: “Diswan hem gudfala samting, from hem buildimap faith and trust long Jehovah and bae strongim moa wei wea iufala barava disaed for hol strong long assignment bilong iufala. Hem bae helpem iufala for toktok witim strong biliv and for kamap olketa beta teacher taem iufala minim olketa purpose bilong God long nara pipol.”
Taem hem iusim setting olsem classrum, narafala teacher bilong Gilead Skul reviewim hao Jehovah blessim field service bilong olketa student for faevfala month wea go pas finis. Lawrence Bowen point go long toktok bilong aposol Paul long Acts 20:20 abaotem pablik ministry bilong hem long Ephesus, and mekhae long wei wea Paul iusim evri chance for givim wanfala witness. Olketa experience bilong olketa student givim example hao, olsem aposol Paul, olketa long distaem wea love for God and neiba muvim olketa nating hol bak for talemaot truth and letem paoa bilong Word bilong God duim samting long nara pipol. Diswan givim richfala blessing bilong Jehovah.
Toktok Bilong Olketa wea Garem Experience
Taem Skul go ahed, olketa student long disfala class bilong Gilead kasem spesol samting long wei wea olketa kaban witim olketa Branch Komiti Member from 23 kantri, wea kam long Patterson Educational Center tu for spesol training. Leon Weaver and Merton Campbell bilong Service Department conductim olketa interview witim difren member bilong olketa Branch Komiti, samfala long olketa hia olketa wea graduate tu from Gilead bifor. Hem barava encouragem olketa student and olketa famili and fren bilong olketa for herem toktok bilong olketa missionary hia wea garem bigfala experience.
Advaes for datfala class wea graduate for helpem olketa getius long niu assignment hem olketa koment olsem: “Tingim gud saed. Sapos iu experiencem samting wea difren evribit or wea iu hard for minim, no givap. Depend long Jehovah”; “lane for hapi witim wanem stap for iu iusim, and trust long Jehovah for givim olketa samting wea iu needim for laef.” Olketa nara koment targetim wei for helpem olketa student for keepim hapi long assignment bilong olketa. Samfala toktok hia hem olsem: “No markem assignment bilong iu witim ples wea iu kam from”; “lanem gud lokol languis and hao for talem long stretfala wei mekem iu savve story witim pipol”; “lanem olketa kastom and wei bilong pipol, bikos diswan bae helpem iu for hol strong long assignment bilong iu.” Olketa koment hia barava encouragem olketa niufala missionary.
Bihaen long olketa interview, David Splane, wanfala missionary bifor wea graduate from mek-42 class bilong Gilead and distaem serve olsem member bilong Governing Body bilong Olketa Jehovah’s Witness, mekem grow main tok raonem theme wea mekem pipol ting strong, “Olketa Student or Olketa Graduate—Which Wan?” Hem askem class wea graduate: “Hao nao bae iufala tingim iufala seleva taem iufala go long missionary assignment? Olsem olketa wea graduate wea savve finis long evriting or olsem olketa student wea garem staka samting for lanem yet?” Brother Splane showimaot hao man wea graduate wea wise hem tingim hemseleva olsem wanfala student. Olketa missionary shud garem tingting hao evriwan wea olketa meetim long missionary assignment bilong olketa fit for teachim samting long olketa. (Philippians 2:3) Olketa student kasem encouragement for waka tugeta witim olketa nara missionary, branch office and lokol kongregeson. Brother Splane strong for advaes, “Iufala pasim olketa lastfala exam, bat iufala olketa student yet. Mekem evriwan savve hao iufala stap long there for lane.”
Bihaen disfala tok, olketa student kasem olketa diploma and olketa announcem evri assignment bilong olketa long audience. Hem barava affectim feeling bilong olketa student wea graduate taem wanfala student wea stand for class readim wanfala leta wea storyim hao olketa wea graduate disaed strong for letem wanem olketa lanem from Word bilong God for muvim olketa for duim bigfala samting moa long holy service.
Evriwan wea attend agree hao olketa kaonsel wea olketa kasem strongim wei wea olketa hia wea graduate disaed finis for showim love long God and neiba. And tu hem mekem olketa disaed strong winim bifor for helpem pipol long spiritual wei long missionary assignment bilong olketa.
[Box long page 25]
INFORMATION ABAOTEM CLASS
Haomas kantri olketa kam from: 10
Haomas kantri olketa bae go long hem: 20
Haomas student: 48
Average age: 33.7
Average year insaed truth: 16.2
Average year insaed full-taem ministry: 12.5
[Piksa long page 26]
Mek-109 Class Bilong Watchtower Bible Skul Bilong Gilead wea Graduate
List long daon start long front and go bihaen, and olketa nem start long left go long raet saed bilong each laen.
(1) Collins, E.; Miles, L.; Alvarado, A.; Lake, J. (2) Van Dusen, L.; Biharie, A.; Heikkinen, H.; Koós, S.; Smith, H. (3) Ashford, J.; Ashford, C.; Boor, C.; Richard, L.; Wilburn, D.; Lake, J. (4) Chichii, K.; Chichii, H.; Ramirez, M.; Baumann, D.; Becker, G.; Biharie, S.; Ramirez, A. (5) Van Dusen, W.; Lemâtre, H.; Pisko, J.; Cutts, L.; Russell, H.; Johnson, R. (6) Becker, F.; Baumann, D.; Johnson, K.; Pifer, Á.; Madsen, C.; Lemâtre, J.; Heikkinen, P. (7) Smith, R.; Russell, J.; Collins, A.; Pisko, D.; Wilburn, R.; Koós, G. (8) Cutts, B.; Boor, J.; Madsen, N.; Pifer, S.; Richard, E.; Miles, B.; Alvarado, R.