Olketa Gilead Student Kasem Encouragement for Talemaot “Olketa Nambawan Samting”
WANFALA crowd bilong 6,635 pipol from 52 kantri stap long graduation program bilong mek-115 class bilong Watchtower Bible Skul Bilong Gilead long September 13, 2003.
Olketa herem encouragement wea 48 student bilong class kasem for talemaot “olketa nambawan samting bilong God” long pipol bilong 17 kantri. (Acts 2:11) Long there nao olketa student hia go ahed distaem for duim missionary waka.
For startim program, Stephen Lett, wea hem member bilong Governing Body bilong Olketa Jehovah’s Witness and wea chairman bilong graduation, hem remindim olketa student olsem: “Taem iufala go long assignment, nomata wea nao iu go or wanem iu kasem, staka nao bae stap witim iu winim olketa wea againstim iu.” Brata Lett storyim chapter 6 bilong Mek-Tu King for remindim olketa student hao Jehovah God and staka angel bae saportim olketa for talemaot “olketa nambawan samting bilong God.” (2 Kings 6:15, 16) Olketa first-century Christian kasem persecution and wei wea pipol nating laek herem olketa taem olketa preach and teach. Bat, olketa kasem saport from heven and from organization bilong Jehovah long earth tu.—Psalm 34:7; Matthew 24:45.
Storyim “Olketa Nambawan Samting Bilong God”
Bihaen introduction bilong chairman, Harold Corkern bilong United States Branch Komiti givim tok long theme “Wei for No Ova Tumas Long Wanem Iu Expectim—Key for Hapi and Win Long Service.” Brata Corkern talem hao wei wea samting man expectim hem no happen savve mekem man feel wikdaon, olsem Proverbs 13:12 hem talem. Bat, staka taem wei for expectim samting wea ova tumas nao savve mekem man feel wikdaon. Olketa student need for no ova tumas long wei wea olketa tingim olketa seleva and nara pipol. Olketa shud luksavve hao olketa bae mek mistek, bat diswan shud no mekem olketa wikdaon taem olketa trae for helpem pipol minim “olketa nambawan samting bilong God.” Brata Corkern encouragem olketa niu missionary for depend long Jehovah, “datwan wea givim reward long olketa wea barava luk aotem hem.”—Hebrews 11:6.
Next long program hem Daniel Sydlik, member bilong Governing Body, wea storyim theme “Christian Hope—Hem Wanem?” Hem sei: “Hope hem fasin wea wanfala Christian shud garem. Hem wanfala mark bilong stret samting wea mekem man fren gud witim God. Man wea no Christian kanduit garem hope olsem iumi.” Brata Sydlik go ahed for storyim olketa difren saed bilong Christian hope wea helpem man keepim gudfala tingting nomata hem kasem hard living. “Hope savve mekem iumi feisim living witim moa strong and feeling for savve winim eniting.” Hope bilong wanfala Christian helpem hem for lukim Jehovah olsem God bilong purpose and for hapi for servem hem.—Romans 12:12.
Wallace Liverance, registrar bilong Gilead Skul, encouragem olketa student for “Go Ahed for Wakabaot Followim Spirit.” (Galatians 5:16) Hem showimaot hao Baruch, secretary bilong Jeremiah, klosap lusim wei for wakabaot followim spirit. Wantaem Baruch kamap taed and start for aftarem bignem for hemseleva. (Jeremiah 45:3, 5) Then Brata Liverance mekhae long point hao samfala stop for followim Jesus and rejectim spiritual truth, wea man needim for salvation. Datwan hem bikos olketa no minim wanem hem teachim, and olketa feel nogud taem wanem olketa expectim no happen. (John 6:26, 27, 51, 66) Wanem nao olketa missionary, wea waka bilong olketa hem for pullim interest bilong pipol go long Creator and purpose bilong hem, lanem from olketa story hia? Olketa student kasem encouragement for no warim position, for no aftarem praise from pipol, or iusim theocratic assignment for kasem samting for seleva.
“Bae Iu Man for Give or Man for Tek?” hem kwestin wea Gilead teacher Mark Noumair givim tok abaotem. Tok bilong hem kam from Judges 5:2, wea olketa Israelite wanwan kasem praise for wei wea olketa no selfish for volunteer for serve long army bilong Barak. Olketa Gilead student kasem praise for willing wei wea olketa ansarem kol bilong Bigfala Barak, Jesus Christ, for share long bigfala wei moa insaed spiritual faet. Olketa soldia bilong Christ shud interest for mekem wan wea kolem olketa hapi. Brata Noumair remindim olketa student olsem: “Taem iumi start for duim samting for mekem iumiseleva hapi, iumi stop nao for faetem datfala enemy. . . . Missionary service hem no for saed bilong iu. Hem for saed bilong Jehovah, rul bilong hem, and wei for duim will bilong hem. Iumi no duim missionary waka bikos iumi laekem Jehovah for mekem iumi hapi, iumi servem hem bikos iumi lovem hem.”—2 Timothy 2:4.
Gilead teacher Lawrence Bowen hem leadim next part: “Mekem Olketa Kamap Holy Thru Long Truth.” (John 17:17) Hem talem hao olketa student bilong mek-115 class olketa holy minister bilong God. Taem olketa skul, olketa share tu long field ministry for luk aotem pipol wea lovem truth wea garem honest heart. Olsem Jesus and olketa firstfala disaepol bilong hem, olketa student no talem samting wea ‘olketa seleva tingim.’ (John 12:49, 50) Olketa strong for talemaot word bilong truth wea kam from God, wea givim laef. Olketa demonstration and experience bilong olketa student showimaot strongfala wei wea Bible affectim pipol olketa story witim.
Kaonsel and Experience Givim Encouragement
Anthony Pérez and Anthony Griffin, tufala member bilong Service Department bilong United States branch, interviewim olketa Branch Komiti member from olketa difren kantri. Olketa storyim olketa challenge wea olketa niu missionary savve feisim and givim samfala gud kaonsel wea kam from experience bilong olketa. Samfala challenge nao hem difren kastom, hot weather wea no mas change for full year, or saed long religion and politik bilong kantri wea difren tumas from wanem olketa getius long hem. Wanem nao savve helpem olketa niu missionary for deal witim niu kaen living? Love for Jehovah, love for pipol, no tingting bak, and no duim samting kwiktaem. Wanfala branch komiti member sei: “Pipol long assignment bilong mifala bin stap long there staka handred year bifor mifala. For sure mifala savve getius and stap long there. Evritaem mitufala feisim hard samting, mitufala ting long diswan olsem chance for mekem fasin bilong mitufala kamap moabeta. Iu depend long prea and long spirit bilong Jehovah, and iu bae lukim hao toktok bilong Jesus kamap tru, ‘mi stap witim iufala.’ ”—Matthew 28:20.
Samuel Herd, wanfala member bilong Governing Body, givim main tok bilong program, “Go Ahed for Talemaot Olketa Nambawan Samting Bilong God.” Wei wea holy spirit hem pour aot long Pentecost 33 C.E. hem strongim olketa disaepol bilong Jesus for talemaot “olketa nambawan samting bilong God.” Wanem nao savve helpem olketa niu missionary distaem for tok aot witim sem strong abaotem Kingdom bilong God? Datfala sem holy spirit. Brata Herd encouragem olketa student for “shaen witim spirit,” for showimaot bigfala interest long niu assignment bilong olketa, for no forgetim training wea olketa kasem finis. (Romans 12:11) Brata Herd hem sei: “Bible hem wanfala nambawan samting bilong God. No enitaem ting smol long hem. Message bilong hem laef. Hem savve kat go kasem important saed bilong samting. Iusim for stretem living bilong iu. Letem hem changem wei for tingting bilong iu. Protectim gudfala tingting bilong iu thru long wei for studyim, readim, and ting raonem olketa Scripture . . . Disaed strong and mekem hem goal bilong iu for iusim Gilead training wea iu kasem for go ahed for talemaot ‘olketa nambawan samting bilong God.’”
Bihaen olketa readim greetings from olketa difren kantri and olketa student kasem diploma bilong olketa, wanfala student readim leta from datfala class wea showimaot thankiu bilong olketa for training olketa kasem. Then Brata Lett endim disfala hapi hipap long wei for storyim 2 Chronicles 32:7 and Deuteronomy 20:1, 4. For joinim disfala last tok bilong hem witim tok wea hem startim program witim, hem sei: “So olketa dear student, remember, taem iufala go aot, taem iufala march go insaed long spiritual faet long niu assignment bilong iufala, Jehovah bae march witim iufala. Nating forgetim hao staka nao bae stap witim iu winim olketa wea againstim iu.”
[Box long page 25]
INFORMATION ABAOTEM CLASS
Haomas kantri olketa kam from: 7
Haomas kantri olketa bae go long hem: 17
Haomas student: 48
Average age: 33.7
Average year insaed truth: 17.8
Average year insaed full-taem ministry: 13.5
[Piksa long page 26]
Mek-115 Class Bilong Watchtower Bible Skul Bilong Gilead wea Graduate
List long daon start long front and go bihaen, and olketa nem start long left go long raet bilong each laen.
(1) Brown, T.; Goller, C.; Hoffman, A.; Bruzzese, J.; Trahan, S. (2) Smart, N.; Cashman, F.; Garcia, K.; Lojan, M.; Seyfert, S.; Gray, K. (3) Beckett, M.; Nichols, S.; Smith, K.; Gugliara, A.; Rappenecker, A. (4) Gray, S.; Vacek, K.; Fleming, M.; Bethel, L.; Hermansson, T.; Hermansson, P. (5) Rappenecker, G.; Lojan, D.; Dickey, S.; Kim, C.; Trahan, A.; Washington, A.; Smart, S. (6) Goller, L.; Burghoffer, T.; Gugliara, D.; Nichols, R.; Washington, S.; Kim, J. (7) Beckett, M.; Dickey, J.; Smith, R.; Garcia, R.; Hoffman, A.; Seyfert, R.; Brown, H. (8) Fleming, S.; Bruzzese, P.; Burghoffer, W.; Bethel, T.; Cashman, J.; Vacek, K.