Waswe, Iu Remember?

Waswe, iu hapi for readim olketa Wastaoa long olketa month wea go pas finis? Sapos olsem, trae for ansarem olketa kwestin long daon:

• Why nao hem fitim iumi tuday for ting raonem olketa kwestin wea kamap insaed Job chapter 38?

Olketa scientist distaem no savve minim evribit staka long olketa nambawan waka wea God duim. Insaed long diswan hem wei wea gravity hem keepim earth bilong iumi long ples bilong hem, wanem nao laet and hao staka difren kaen snowflake stap, hao nao rain kamap, and wei wea paoa join witim olketa thunderstorm.—4/15, page 4-11.

• Olketa wanem example long Bible nao savve helpem iumi for deal witim olketa nogud feeling?

Asaph, Baruch, and Naomi feisim olketa taem wea olketa wik daon or kasem nara nogud feeling, and Bible record wea storyim hao olketa deal witim and winim olketa problem savve helpem iumi.—4/15, page 22-4.

• Wanem nao samfala gudfala wei for helpem olketa Christian widow?

Olketa fren savve offer for help long kaenfala and kliafala wei. Sapos olketa fit for duim, olketa famili member or samfala narawan maet help long wei for givim selen or material samting, taem olketa lukim really need stap. Samfala nara Christian savve help tu taem olketa frenim olketa and givim spiritual saport and comfort.—5/1, page 5-7.

• Why nao hem important for marit “only insaed long Lord,” olsem 1 Corinthians 7:39 hem talem?

Staka taem olketa wea maritim samwan wea no biliv savve safa from diswan. And tu, wei for followim disfala toktok from God showimaot loyal fasin long Jehovah God. Taem iumi obeyim Word bilong God, heart bilong iumi no savve judgem iumi. (1 John 3:21, 22)—5/15, page 20-1.

• From Jehovah nomoa savve forgivim olketa sin bilong iumi, why nao olketa Christian mas konfesim olketa serious sin long olketa elder insaed kongregeson?

Hem tru, wei bilong Jehovah for forgivim olketa serious sin nao olketa Christian need for lukaotem. (2 Samuel 12:13) Bat olsem profet Nathan givim help long David, olketa mature elder insaed kongregeson savve helpem olketa wea repent from sin. For go long olketa elder hem followim toktok long James 5:14, 15.—6/1, page 31

• Wanem nao pruvim iumi shud lukaftarem olketa pikinini wea no garem dadi or mami and olketa widow woman wea garem need?

Olketa record bilong history showimaot hao wei for lukaftarem olketa hem wanfala mark bilong tru worship midolwan olketa Hebrew bifor and olketa first Christian. (Exodus 22:22, 23; Galatians 2:9, 10; James 1:27) Aposol Paul putim insaed olketa Scripture kliafala instruction for olketa Christian for lukaftarem olketa widow woman wea garem need. (1 Timothy 5:3-16)—6/15, page 9-11.

• Wanem nao key for kasem laef wea hapi and garem mining?

Iumi mas mekem grow and keepim wei for fren gud witim Jehovah, Dadi bilong iumi long heven. Wei for studyim Bible hem wanfala important samting for help for duim datwan.—7/1, page 4-5.

• Waswe, evri man garem wanfala spirit wea go ahed for laef bihaen man dae?

Nomata samfala bilivim hao wanfala spirit—no wanfala soul—hem kanduit dae, Bible no saportim disfala tingting. Hem showim hao taem man hem dae, hem go bak long dust and hem no stap nao. Bat God savve mekem hem laef bak, so eni hope for laef long future, thru long resurrection, hem depend long God. (Ecclesiastes 12:7)—7/15, page 3-6.

• Wea nao Daniel stap taem thrifala Hebrew kasem test long level ples bilong Dura?

Bible hem no talem. Maet Daniel no need for stap long there bikos long haefala position wea hem garem, or maet hem go duim samfala waka bilong gavman. Bat iumi savve sure hem nating brekem faithful fasin bilong hem long Jehovah.—8/1, page 31.