Devil No Wanfala Kastom Story Nomoa
“Insaed full Niu Testament iumi savve lukim wanfala bigfala faet wea wansaed hem olketa paoa bilong God wea gud, and long narasaed hem olketa wicked paoa wea Satan nao leadim. Diswan hem no just tingting bilong wan or tufala man wea raetem Bible, bat hem samting wea olketa evriwan bilivim. . . . Pruv insaed Niu Testament showaot klia. Satan really stap, and evritaem hem againstim God and pipol bilong God.”—“The New Bible Dictionary.”
SAPOS olsem, why nao planti wea sei olketa Christian—and wea sei olketa bilivim Bible—rejectim idea hao Devil hem stap? Bikos, for tok stret, olketa nating acceptim Bible olsem Word bilong God. (Jeremiah 8:9) Olketa sei olketa man wea raetem Bible followim idea bilong olketa savveman bilong olketa nation wea stap raonem olketa and no really talemaot truth from God. Olsem example, Catholic savveman Hans Küng, raet olsem: “Olketa kastom story abaotem Satan witim bigfala army bilong olketa demon . . . start kam from olketa kastom story bilong Babylon and go insaed long firstfala Jew religion and then from there hem go insaed long Niu Testament.”—On Being a Christian.
Bat Bible hem no just toktok bilong man; hem really Word bilong God. So iumi bae wise, sapos iumi tinghevi long wanem hem sei abaotem Devil.—2 Timothy 3:14-17; 2 Peter 1:20, 21.
Wanem Nao Tingting Bilong Jesus?
Jesus Christ hem biliv hao Devil hem really stap. Jesus no kasem temptation from wicked fasin insaed hemseleva. Wanfala really man nao attakim hem, wea bihaen hem kolem hem “ruler bilong disfala world.” (John 14:30; Matthew 4:1-11) Hem bilivim tu hao olketa nara spirit creature saportim olketa wicked plan bilong Satan. Jesus healim pipol wea “garem demon.” (Matthew 12:22-28) Nomata disfala buk A Rationalist Encyclopædia wea hem bilong olketa wea no biliv long God, hem luksavve long diswan taem hem sei: “Wei wea olketa Gospel showaot Jesus hem acceptim biliv long olketa devil evritaem mekem olketa savveman bilong religion for stambol.” Taem Jesus tok abaotem Devil and olketa demon bilong hem, hem no just talem moa olketa kastom story wea kam from Babylon. Hem savve olketa really stap.
Iumi savve lanem staka samting abaotem Devil taem iumi ting raonem toktok wea Jesus talem long olketa teacher bilong religion long taem bilong hem: “Iufala kam from dadi bilong iufala datfala Devil, and iufala laek duim samting wea dadi bilong iufala laekem. Hem nao man for killim dae man from taem wea hem first start, and hem no hol strong long truth, from truth no stap long hem. Taem hem laea, hem tok followim fasin bilong hem, from hem man for tok laea and dadi bilong laea fasin.”—John 8:44.
For fitim diswan, Devil, wea minim “man for tokspoelem,” hem wanfala “man for tok laea and dadi bilong laea fasin.” Hem nao first wan for laea abaotem God, and hem duim diswan long garden bilong Eden bifor. Jehovah talem hao firstfala parents bilong iumi “mas dae” sapos olketa kaikai from tree bilong savve bilong gud and nogud samting. Thru long wanfala snek, Satan sei olketa toktok hia nating tru. (Genesis 2:17; 3:4) Dastawe, hem fit for kasem nem “datfala firstfala snek, datwan wea olketa kolem Devil and Satan.”—Revelation 12:9.
Devil laea abaotem datfala tree bilong savve bilong gud and nogud samting. Hem sei wei for stopem olketa for kaikai from datfala tree hem no stret; hem wei for iusim paoa long rong wei. Hem sei Adam and Eve savve “kamap olsem God” long wei for disaedem seleva wanem nao gud and nogud. Satan givim idea hao from olketa garem free will, olketa shud disaed seleva evribit. (Genesis 3:1-5) Disfala wei for attakim stretfala wei bilong God for rul mekem kamap samfala important kwestin. So Jehovah givim taem for olketa kwestin hia for kasem ansa. Diswan minim Jehovah letem Satan go ahed for stap for lelebet taem. Shortfala taem wea hem garem klosap finis nao. (Revelation 12:12) Nomata olsem, hem still go ahed for mekem olketa man stap farawe from God thru long olketa laea and giaman wei, taem hem iusim pipol olsem olketa scribe and Pharisee long taem bilong Jesus for mekem grow teaching bilong hem.—Matthew 23:13, 15.
Jesus talem tu hao datfala Devil hem “man for killim dae man from taem wea hem first start” and hao “hem no hol strong long truth.” Diswan no minim Jehovah creatim hem olsem “man for killim dae man.” Jehovah no creatim hem olsem wanfala animal wea luk nogud tumas wea lukaftarem wanfala ples bilong fire and pain for pipol wea againstim God. Datfala “hell” wea Bible storyim hem no ples wea Satan hem stap. Hem grev bilong olketa man nomoa.—Acts 2:25-27; Revelation 20:13, 14.
Firstaem Devil hem stap “long truth.” Hem bin part long famili bilong Jehovah long heven olsem perfect spirit son bilong God. Bat hem no “hol strong long truth.” Hem laek for followim wei and olketa laea principle bilong hemseleva. “Taem wea hem first start,” no minim datfala taem wea God creatim hem olsem angel son bilong hem, bat hem minim taem wea hem min for go againstim Jehovah and laea long Adam and Eve. Devil hem olsem pipol wea go againstim Jehovah long taem bilong Moses. Iumi read olsem abaotem olketa: “Olketa seleva nao duim nogud samting; olketa no pikinini bilong hem, nogud samting hem bilong olketa seleva.” (Deuteronomy 32:5) Hem semsem tu witim Satan. Hem kamap “man for killim dae man” taem hem bighed and kasem blame for dae bilong Adam and Eve and, for tok stret, dae bilong full famili bilong man.—Romans 5:12.
Olketa Angel wea No Obey
Samfala nara angel joinim Satan long bighed fasin bilong hem. (Luke 11:14, 15) Olketa angel hia “lusim proper ples bilong olketa” and tekem body olsem man for duim sex witim “olketa dota bilong man” long taem bilong Noah. (Jude 6; Genesis 6:1-4; 1 Peter 3:19, 20) “Mek-thri part bilong olketa star long heven” or smol haf bilong olketa angel, followim datfala wei.—Revelation 12:4.
Buk bilong Revelation garem planti tokpiksa and hem storyim Devil olsem “wanfala bigfala and redfala dragon.” (Revelation 12:3) Why nao olsem? Hem no from hem garem body wea luk nogud and savve mekem man fraet. Iumi no really savve wanem kaen body nao olketa angel garem, bat luk olsem Satan no luk difren from olketa nara angel. Nomata olsem, “wanfala bigfala and redfala dragon” hem tokpiksa wea barava fitim Satan from wei bilong hem for mekem man fraet, hangre for paoa and spoelem samting.
Distaem Satan and olketa demon bilong hem no savve duim planti samting. Olketa no savve kamap olsem man olsem olketa duim bifor. No longtaem bihaen Kingdom bilong God start for rul anda long Christ long 1914, hem torowem olketa kamdaon long earth.—Revelation 12:7-9.
Devil Hem Wanfala Strongfala Enemy
Nomata olsem, Devil hem still wanfala strongfala enemy. Hem “wakabaot olsem wanfala lion wea singaot strong, and lukaotem samwan for kaikaim.” (1 Peter 5:8) Hem no wanfala wicked fasin wea stap insaed man. Tru nao, iumi stragol evriday for againstim wei bilong sin wea stap insaed iumi. (Romans 7:18-20) Bat really stragol bilong iumi hem “againstim olketa world ruler bilong disfala darkness, againstim olketa wicked spirit long olketa ples bilong heven.”—Ephesians 6:12.
Hao big nao paoa bilong Devil? Aposol John hem sei: “Full world hem stap long paoa bilong wicked wan.” (1 John 5:19) Bat, iumi no laek for tingting tumas abaotem Devil or letem olketa kastom story for mekem iumi fraetem hem. Iumi bae wise sapos iumi keakea evritaem long wei wea hem trae for mekem iumi kamap blind long saed bilong truth and hem laek for brekem faithful fasin bilong iumi long God.—Job 2:3-5; 2 Corinthians 4:3, 4.
Devil no evritaem iusim raf attak long olketa wea want for duim will bilong God. Samtaem, hem mekem hemseleva olsem “wanfala angel bilong laet.” Aposol Paul givim warning long olketa Christian abaotem datfala danger taem hem raet olsem: “Mi fraet, olsem snek hem giamanim Eve long trik bilong hem, maet mind bilong iufala bae lusim stretfala and klinfala fasin wea fitim Christ.”—2 Corinthians 11:3, 14.
So iumi need for ‘keepim gudfala tingting bilong iumi, lukaot gud, and standap againstim hem, strong long faith.’ (1 Peter 5:8, 9; 2 Corinthians 2:11) Iumi mas no mekem isi for Satan laea long iumi long wei for interest long eni samting wea join witim spiritism. (Deuteronomy 18:10-12) Kamap wanfala gudfala student bilong Word bilong God, rememberim hao Jesus Christ evritaem tan go long Word bilong God taem hem kasem temptation from Devil. (Matthew 4:4, 7, 10) Prea for spirit bilong God. Frut bilong hem savve helpem iu for stap klia from olketa waka bilong body, wea Satan mekhae long hem tumas. (Galatians 5:16-24) And tu, prea strong long Jehovah taem iu kasem hevi from Devil and olketa demon bilong hem.—Philippians 4:6, 7.
Iumi no need for fraetem Devil. Jehovah promis for givim protection againstim eni samting wea Satan savve duim. (Psalm 91:1-4; Proverbs 18:10; James 4:7, 8) Aposol Paul hem sei: “Go ahed for kasem paoa long Lord and long bigfala strong bilong hem.” Then bae iu savve “stand strong againstim evri trik bilong Devil.”—Ephesians 6:10, 11.
[Piksa long page 5]
Jesus savve Devil hem wanfala really man
[Piksa long page 6]
“Full world hem stap long paoa bilong wicked wan”
[Credit Line]
NASA photo
[Olketa Piksa long page 7]
Stand strong againstim Devil taem iu studyim word bilong God and go ahed for prea olowe