Kwestin From Reader

Wanem nao Bible talem abaotem wei for trainim olketa pikinini taem wanfala dadi or mami nomoa hem Jehovah’s Witness?

Tufala important principle from Bible givim direction long wei for trainim olketa pikinini for wanfala Witness dadi or mami wea garem partner wea no Witness. Wanfala hem: ‘Iumi mas obeyim God olsem ruler and no olketa man.’ (Acts 5:29) Narawan hem: “Hasband hem hed bilong waef bilong hem olsem Christ tu hem hed bilong kongregeson.” (Eph. 5:23) Disfala mek-tu principle no just fitim olketa Witness waef wea garem Witness hasband bat olketa waef wea partner bilong olketa no Witness tu. (1 Peter 3:1) Hao nao wanfala Witness dadi or mami savve balancem olketa principle hia taem hem teachim olketa pikinini bilong hem?

Sapos hasband hem wanfala Jehovah’s Witness, hem garem responsibility for provaedem spiritual and material samting for famili bilong hem. (1 Timothy 5:8) Nomata maet datfala mami wea no Witness spendem moa taem witim olketa pikinini bilong hem, datfala Witness dadi nao shud teachim olketa pikinini bilong hem long wei for givim spiritual training long haos and long wei for tekem olketa long olketa Christian meeting, wea olketa bae kasem instruction saed long fasin and gudfala wei for kaban.

Waswe sapos waef bilong hem wea no Witness strong for tekem olketa pikinini bilong tufala long ples for worship or teachim biliv bilong hem long olketa? Maet law bilong datfala kantri givim hem raet for duim olsem. Wei wea olketa pikinini bae stand strong or nomoa long test for duim worship long olketa ples olsem hem depend long spiritual teaching bilong dadi. Taem olketa pikinini growap, datfala education from Bible wea dadi bilong olketa givim shud helpem olketa for followim truth bilong Word bilong God. Datfala Witness dadi bae hapi tumas sapos olketa pikinini bilong hem stand strong for saed bilong truth!

Sapos mami hem wanfala Jehovah’s Witness, hem need for respectim principle bilong hedship taem hem trae for helpem olketa pikinini bilong hem for olowe. (1 Corinthians 11:3) Planti taem, partner bilong hem wea no Witness bae nating wari nomoa sapos waef bilong hem wea Witness givim olketa education saed long fasin and spiritual wei long olketa pikinini bilong tufala, and olketa savve kasem diskaen education long olketa meeting bilong pipol bilong Jehovah. Mami hia savve helpem hasband bilong hem wea no Witness for luksavve long gud samting wea kamaot from education for buildimap man wea olketa pikinini bilong tufala kasem thru long organization bilong Jehovah. Long gudfala wei hem savve mekhae long need for putim olketa principle bilong Bible deep insaed olketa pikinini bilong tufala taem olketa feisim fasin bilong disfala world wea gogo daon.

Bat, hasband wea no biliv maet strong for olketa pikinini bilong hem mas followim religion bilong hem. Hem maet tekem olketa long ples bilong worship and givim olketa education bilong religion followim faith bilong hem. Or wanfala hasband maet againstim evri lotu and barava no laekem olketa pikinini bilong hem for kasem eni education bilong religion. Olsem hed bilong famili, hem nao main wan wea garem responsibility for mekem disison.a

Taem hem respectim hedship bilong hasband bilong hem, olsem Christian wea dedicate, Witness waef bae tingim tingting bilong aposol Peter and John, wea sei: “Mifala kanduit stop for story abaotem olketa samting wea mifala lukim and herem.” (Acts 4:19, 20) From hem tingim spiritual saed bilong olketa pikinini, wanfala Witness mami bae faendem olketa chance for givim direction saed long fasin. Hem garem responsibility front long Jehovah for teachim nara pipol abaotem samting wea hem savve hem tru, and olketa pikinini bilong hem tu shud insaed diswan. (Proverbs 1:8; Matthew 28:19, 20) Hao nao Witness mami savve deal witim hardfala problem olsem?

Tingim example abaotem wei for biliv long God. Datfala Witness waef maet no fit for studyim Bible witim olketa pikinini bilong hem from hasband bilong hem stopem. Waswe, from diswan hem mas stap klia from wei for talem eni samting abaotem Jehovah long olketa pikinini? Nomoa. Toktok and fasin bilong hem bae showimaot wei wea hem biliv long Creator. For sure olketa pikinini bilong hem garem olketa kwestin abaotem disfala subject. Hem shud feel free long freedom wea hem garem saed long religion for talemaot wei wea hem biliv long Creator, and talem diswan long olketa pikinini bilong hem tu. Nomata sapos hem no savve conductim wanfala Bible study witim olketa pikinini bilong hem or tekem olketa long meeting evritaem, hem savve givim olketa savve abaotem Jehovah God.—Deuteronomy 6:7.

Abaotem wei for fren midolwan wanfala Witness and partner bilong hem wea no Witness, aposol Paul hem raet: “Hasband wea no biliv hem kamap holy for saed long waef bilong hem, and waef wea no biliv hem kamap holy for saed long datfala brata; sapos nomoa, olketa pikinini bilong iufala bae no klin, bat distaem olketa holy.” (1 Corinthians 7:14) Jehovah tingim datfala marit olsem holy bikos long datfala partner wea Witness, and olketa pikinini hia holy long eye bilong Jehovah. Datfala Witness waef shud duim best bilong hem for helpem olketa pikinini bilong hem for minim truth, and leavim long hand bilong Jehovah samting wea bae kamaot from diswan.

Taem olketa pikinini growap, olketa bae disaedem wanem nao olketa bae followim from information wea olketa kasem from parents bilong olketa. Olketa maet disaed for followim toktok bilong Jesus: “Man wea lovem tumas dadi or mami, winim wei wea hem lovem mi, hem no fitim mi.” (Matthew 10:37) Olketa kasem disfala komand tu: “Olketa pikinini, obeyim dadi and mami bilong iufala insaed long Lord.” (Ephesians 6:1) Planti young wan disaed finis for ‘obeyim God olsem ruler’ and no dadi or mami wea no Witness, nomata olketa kasem hard samting from datfala parent. Hem barava wanfala reward for wanfala Witness dadi or mami for lukim olketa pikinini disaed for servem Jehovah nomata olketa kasem test!

[Footnote]