Comfort for Olketa wea Safa

FOR staka handred year, kwestin saed long why God letem wei for safa go ahed hem wanfala challenge for staka savveman. Samfala sei from God garem full paoa, hem masbi bihaenem evri wei for safa. Man wea raetem wanfala mekap story bilong mek-tu century, The Clementine Homilies, hem sei God rulim world witim tufala hand. Witim “left hand” bilong hem, datfala Devil, hem kosim evri wei for safa and trabol, and witim “raet hand” bilong hem, Jesus, hem sevem and blessim pipol.

Samfala moa savve God no kosim wei for safa bat olketa no savve acceptim wei wea Hem letem diswan go ahed nomoa, so olketa chus for biliv wei for safa hem no stap. Insaed buk bilong hem, Science and Health With Key to the Scriptures, Mary Baker Eddy hem raet: “Wicked samting hem long mind nomoa, and hem no really samting. Sapos man biliv sin, sik, and dae hem nating stap, bae hem no stap nao.”

Taem olketa lukim evri nogud samting wea happen long history, especially start from taem bilong first world war kam kasem distaem, staka biliv God no garem paoa for stopem wei for safa. Jew savveman, David Wolf Silverman, hem sei: “Mi ting Holocaust mekem hem moa hard for biliv hao God hem garem full paoa.” Hem sei moa: “For iumi minim God lelebet, gudfala fasin bilong Hem mas balance witim wei wea wicked fasin hem stap, and datwan savve tru only sapos God no garem full paoa.”

Nomata olsem, diskaen tingting for sei God garem blame for wei wea pipol safa, hao hem no savve stopem, or hao wei for safa hem samting long mind nomoa, hem no comfortim pipol wea safa. And moa important, kaen tingting olsem hem no fitim wanem Bible talem abaotem wanfala God wea garem justice fasin, maeti paoa, and kea for pipol. (Job 34:10, 12; Jeremiah 32:17; 1 John 4:8) So wanem nao Bible talem abaotem reason why God letem wei for safa for go ahed?

Hao Nao Wei for Safa Hem Start?

God no creatim olketa man for safa. Hem givim firstfala man and woman, Adam and Eve, perfect mind and body, redyim naesfala garden for tufala stap insaed, and givim tufala waka wea garem mining and wea bae mekem tufala satisfae. (Genesis 1:27, 28, 31; 2:8) Nomata olsem, for tufala go ahed for stap hapi hem depend long wei wea tufala luksavve long rul bilong God and wei wea hem fit for disaedem samting wea gud and samting wea nogud. “Datfala tree bilong savve long gud and nogud samting” nao piksarem datfala komand bilong God. (Genesis 2:17) For showimaot tufala stap anda long God, Adam and Eve need for obeyim komand bilong hem and no kaikai from datfala tree.a

Sorre tumas, Adam and Eve fail for obeyim God. Wanfala bighed spirit creature wea bihaen showaot olsem Devil Satan, hem mekem Eve for bilivim hao wei for obeyim God bae no helpem hem. Hem sei God holem bak gudfala samting from hem: wei for independent, raet for chusim seleva wanem hem gud and wanem hem nogud. Satan sei sapos hem kaikai from datfala tree, ‘eye bilong hem bae open and hem bae kamap olsem God, savve long gud and nogud samting.’ (Genesis 3:1-6; Revelation 12:9) Chance for stap independent hem switim Eve, so hem kaikaim datfala frut wea God tambuim, and Adam duim sem samting tu.

Long datfala sem day, Adam and Eve start for feelim samting wea kamaot from bighed fasin bilong tufala. From tufala rejectim rul bilong God, tufala lusim protection and blessing wea tufala kasem taem tufala stap anda long God. God raosem tufala from Paradaes and talem Adam: “Graon hem kasem curse from wanem iu duim. Witim pain iu bae kaikai from hem long evriday long laef bilong iu. Long swet bilong feis bilong iu, iu bae kaikaim bred go kasem taem iu go bak long graon.” (Genesis 3:17, 19) Adam and Eve kasem sik, pain, olo, and dae. Wei for safa hem kamap part bilong living bilong olketa man.—Genesis 5:29.

Stretem Datfala Kwestin

Samwan maet ask, ‘Hao nao God no forgetim nomoa sin bilong Adam and Eve?’ Bikos datwan bae saportim wei for no showaot respect for paoa bilong hem and maet encouragem pipol for bighed bihaen wea bae lead go long wei for safa wea moa worse. (Ecclesiastes 8:11) And tu, sapos God letem nomoa diskaen wei for no obey, hem bae olsem hem saportim wei for duim rong. Man wea raetem Bible, Moses, hem remindim iumi: “Evri samting God wakem hem perfect, from evri wei bilong hem followim justice. Wanfala God bilong faithful fasin, wea showimaot justice evribit; hem nao raeteous and stret.” (Deuteronomy 32:4, footnote) For fitim olketa principle bilong hem, God letem Adam and Eve for feelim samting wea kamaot from wei wea tufala no obey.

Why nao God no stretawe killim dae firstfala man and woman and man wea bihaenem bighed fasin bilong tufala, Satan? Hem garem paoa for duim. Adam and Eve bae no garem olketa pikinini wea bae kasem wei for safa and dae. Nomata olsem, sapos God iusim paoa bilong hem olsem, bae diswan no pruvim wei wea hem stret for God for rul ovarem olketa man. And tu, sapos Adam and Eve no garem pikinini, datwan bae showimaot purpose bilong God for earth fulap witim perfect pipol bae fail nao. (Genesis 1:28) And “God hem no olsem olketa man . . . Nomata wanem hem promisim, hem duim; hem talem samting, and datwan kamap.”—Numbers 23:19, Today’s English Version.

Long perfect wisdom bilong hem, Jehovah God markem taem for letem bighed fasin go ahed. Olketa wea bighed garem inaf chance for feelim seleva samting wea kamaot from wei for independent from God. History bae showimaot klia hao olketa man needim God for leadim olketa and hao rul bilong God hem moabeta winim rul bilong man or Satan. Long semtaem, God duim samting for mek sure datfala firstfala purpose bilong hem for earth bae fulfill. Hem promis hao wanfala “seed,” or “pikinini,” bae kam wea bae ‘killim Satan long hed,’ wea bae finisim evribit bighed fasin bilong hem and olketa nogud samting wea kamaot from diswan.—Genesis 3:15, footnote.

Jesus Christ nao hem datfala promis Seed. Long 1 John 3:8, iumi readim hao “Son bilong God hem showaot . . . for brekem olketa waka bilong Devil.” Hem duim diswan taem hem sakrifaesim perfect laef bilong hem olsem wanfala man and peim ransom price for baem bak olketa pikinini bilong Adam from sin and dae, wea olketa born kam witim. (John 1:29; 1 Timothy 2:5, 6) Olketa wea showimaot tru faith long sakrifaes bilong Jesus kasem promis bilong living wea free from wei for safa for olowe. (John 3:16; Revelation 7:17) Wanem taem nao diswan bae happen?

End Bilong Evri Wei for Safa

Wei for rejectim rul bilong God hem kosim olketa barava nogud wei for safa. Dastawe, hem fitim hao God bae showimaot paoa bilong hem long spesol wei for finisim evri wei for safa and fulfillim firstfala purpose bilong hem for earth. Jesus story abaotem disfala spesol arrangement wea God bae iusim taem hem teachim olketa follower bilong hem for prea olsem: “Dadi bilong mifala wea stap long heven, . . . letem kingdom bilong iu kam. Letem will bilong iu kamap long earth, olsem long heven.”—Matthew 6:9, 10.

Taem wea God letem for olketa man traem enikaen gavman hem klosap kasem end. Long wei wea fulfillim Bible profesi, Kingdom bilong God hem start for rul long heven long 1914 witim Jesus Christ olsem King bilong hem.b Klosap nao hem bae smasem and finisim evri gavman bilong man.—Daniel 2:44.

Insaed shortfala ministry bilong hem long earth, Jesus showim lelebet olketa blessing wea olketa man bae kasem taem rul bilong God kamap moa. Olketa Gospel provaedem pruv hao Jesus hem kea long pipol wea poor and wea pipol lukdaonem. Hem healim sik pipol, feedim olketa wea hangre, and resurrectim olketa wea dae. Nomata weather tu obeyim samting hem talem. (Matthew 11:5; Mark 4:37-39; Luke 9:11-16) Tingim olketa nambawan samting wea Jesus bae duim taem hem iusim olketa paoa bilong ransom sakrifaes for klinim man! Bible promis hao thru long rul bilong Christ, God “bae aotem krae from eye bilong [olketa man], and dae bae nomoa, sorre and singaot and pain bae nomoa tu.”—Revelation 21:4.

Comfort for Pipol wea Safa

Hem bigfala comfort for savve hao loving God bilong iumi wea garem full paoa, Jehovah, hem kea for iumi and klosap nao bae hem finisim evri wei for safa! Staka taem, man wea garem big sik savve willing for kasem treatment wea bae healim hem nomata sapos datwan givim hem bigfala pain. Long sem wei, sapos iumi savve wei bilong God for duim olketa samting bae lead go long blessing for olowe, disfala savve bae strongim iumi nomata wanem hard samting iumi kasem distaem.

Ricardo, wea iumi storyim long first article, hem wanfala wea lane for kasem comfort from promis bilong Bible. Hem ting bak and sei: “Bihaen waef bilong mi dae, mi barava laek for stap seleva, bat gogo mi luksavve hao diswan bae no mekem waef bilong mi for laef bak and diswan mekem mi for sorre go moa.” Winim diswan, Ricardo hem go ahed strong long wei bilong hem evritaem for attendim Christian meeting and sharem message bilong Bible long nara pipol. Ricardo hem sei: “Taem mi feelim loving saport bilong Jehovah and lukim hao hem ansarem olketa prea bilong mi nomata long olketa smol samting, mi kamap moa klos long hem. Disfala wei for feelim love bilong God nao mekem mi fit for go ahed strong long datfala worse test bilong laef bilong mi.” Hem talem stret: “Mi barava missim waef bilong mi yet, bat distaem mi barava luksavve hao no eni samting Jehovah letem for happen savve spoelem iumi for olowe.”

Waswe, olsem Ricardo and staka million moa, iu luk forward long taem wea olketa wei wea man safa “bae no kamap moa long mind, and hem bae no kamap moa long heart”? (Isaiah 65:17) Iu savve sure hao olketa blessing bilong Kingdom bilong God hem samting wea iu savve kasem sapos iu followim disfala advaes bilong Bible: “Luk aotem Jehovah . . . taem iufala savve faendem hem. Singaot long hem taem hem stap klosap.”—Isaiah 55:6.

For helpem iu duim diswan, mekem wei for readim and studyim gud Word bilong God hem kamap important part long laef bilong iu. Savve gud long God and datwan wea hem sendem, Jesus Christ. Trae hard for live followim olketa mark bilong God and from diswan showimaot iu willing for stap anda long sovereign rul bilong hem. Living olsem bae mekem iu kasem bigfala hapi distaem, nomata wanem kaen test nao iu feisim. And long future, hem bae leadim iu for laef insaed wanfala world wea free from wei for safa.—John 17:3.

[Olketa Footnote]

[Box long page 6, 7]

HAO NAO IUMI SAVVE DEAL WITIM WEI FOR SAFA?

“Torowem evri wari bilong iufala long [God].” (1 Peter 5:7) For konfius, kros, and feel olsem no eniwan kea long iu hem normal feeling taem iumi safa or lukim samwan iumi lovem hem safa. Nomata olsem, feel sure hao Jehovah hem minim feeling bilong iumi. (Exodus 3:7; Isaiah 63:9) Olsem olketa faithful man bifor, iumi savve openem heart bilong iumi long hem and talemaot olketa daot and wari bilong iumi. (Exodus 5:22; Job 10:1-3; Jeremiah 14:19; Habakkuk 1:13) Maet hem no finisim olketa test iumi feisim long mirakol wei, bat for ansarem prea wea iumi talem from heart, hem savve givim iumi wisdom and strong for deal witim olketa.—James 1:5, 6.

“No sapraes long olketa test wea iu kasem wea mekem iu safa, olsem hem niu samting wea happen long iu.” (1 Peter 4:12, New International Version) Long disfala verse Peter hem story abaotem persecution, bat toktok bilong hem fitim tu eni wei for safa wea wanfala wea biliv mas stand strong long hem. Samfala safa from olketa no savve kasem olketa main need bilong olketa, olketa sik, and samwan olketa lovem dae. Bible sei “taem and samting wea iumi no expectim” savve kasem evriwan. (Ecclesiastes 9:11) Olketa samting olsem hem part bilong living distaem. Wei for luksavve long diswan bae helpem iumi for deal witim wei for safa and trabol taem hem happen. (1 Peter 5:9) Bat main comfort hem kam from wei for rememberim hao “eye bilong Jehovah hem lukluk long olketa wea raeteous, and ear bilong hem lisin taem olketa singaot for help.”—Psalm 34:15; Proverbs 15:3; 1 Peter 3:12.

“Hapi long hope.” (Romans 12:12) Winim wei for ting go bak long hapi iumi garem bifor, iumi savve ting raonem olketa promis bilong God for finisim wei for safa. (Ecclesiastes 7:10) Hope hia wea garem strong faondeson bae protectim iumi olsem helmet savve protectim hed. Hope katem daon pain bilong olketa nogud samting wea iumi kasem long laef and helpem iumi balance saed long mind, feeling and spiritual wei.—1 Thessalonians 5:8.

[Piksa long page 5]

Adam and Eve rejectim rul bilong God

[Piksa long page 7]

God promisim wanfala world wea free from wei for safa