Biliv Long God wea Maet Iumi No Savve Gud Long Hem
TUFALA long evri thrifala pipol long Germany biliv long God. Bat, taem wanfala survey askem winim wan thousand pipol for talem wanem kaen God nao olketa bilivim, klosap evriwan talem difren ansa. Wanfala nius magasin, FOCUS, report olsem: “Long sem wei wea evri pipol long Germany olketa difren, olketa idea bilong olketa abaotem God tu hem difren.” Nomata hem gud for biliv long God, hem sorre samting sapos man biliv long hem bat no savve wanem kaen God nao hem.
Diskaen wei for no really savve abaotem God hem no long Germany nomoa; hem long olketa nara ples long Europe tu. Wanfala research survey wea olketa duim long Austria, Britain, and Netherlands showimaot hao planti pipol agree hao God hem “wanfala paoa wea moa hae or wanfala secret samting wea man hard for explainim.” Especially midolwan olketa young pipol, nomata olketa wea biliv long hem, God hem samting wea hard for man minim.
Waswe, Iu Savve Gud Long God?
Wei for savve nomoa long samwan hem barava difren from wei for savve gud long hem. For savve nomoa long samwan hem for luksavve hao hem stap, olsem wei for savve long wanfala king, wanfala top sportsman, or wanfala man for act long movie. Bat, for savve gud long samwan hem minim moa samting. Hem minim wei for savve gud long fasin bilong datfala man, feeling bilong hem, samting hem laekem and samting hem no laekem, and olketa plan bilong hem for future. For savve gud long samwan hem openem wei for garem klos wei for fren witim hem.
Planti handred thousand man wanwan disaed finis hao wei for savve nomoa abaotem God—or for savve dat God hem stap—hem no inaf. Olketa duim moa samting for barava savve gud long God. Waswe, olketa kasem eni gud samting from diswan? Wanfala man nem bilong hem Paul, wea stap long north Germany and wea bifor hem garem lelebet savve nomoa abaotem God, hem disaed for savve gud long Hem. Paul explainim olsem: “Hem hard waka and hem tek taem for savve gud long God, bat samting wea man kasem from diswan hem nambawan. Wei for garem klos wei for fren witim Creator hem mekem evriday living bilong man kamap moabeta.”
Waswe, man savve kasem eni gud samting sapos hem iusim taem and waka hard for barava savve gud long God? Plis readim next article.
[Blurb long page 3]
Wei for savve nomoa long samwan hem barava difren from wei for savve gud long hem