Kwestin From Reader
Hem kastom long planti ples long world for givim wedding present. Wanem Bible principle nao iumi shud tingim taem iumi givim or kasem olketa present olsem?
Bible hem appruvim wei for givim present taem stret samting nao muvim man and hem duim long stretfala taem. Saed long wei for give, Bible encouragem olketa tru Christian for followim example bilong Datwan wea provaedem evri samting for olketa, Jehovah. (James 1:17) Aposol Paul hem encouragem olketa nara Christian olsem: “No forget for duim gudfala samting and sharem samting witim pipol, from God hem hapi tumas long sakrifaes olsem.” Dastawe, olketa Christian kasem encouragement for willing for give.—Hebrews 13:16; Luke 6:38.
Waswe long wei for iusim wanfala gift registry, wanfala list bilong olketa samting insaed wanfala stoa wea tufala wea bae marit laek for kasem olsem wedding present, wea hem nao planti long United States duim? Long England, olketa kolem diswan wanfala wedding list. Tufala wea redy for marit go long wanfala stoa and lukluk long olketa samting long datfala stoa and mekem list long olketa samting wea tufala laek for kasem olsem present. Olketa relative and fren bilong tufala wea redy for marit wea kasem invitation savve go long datfala stoa for baem samting followim datfala list. For mekem list olsem hem mekem man no spendem staka hour for luk aotem present, and tu, olketa wea kasem present bae no hard waka for tekem go bak long stoa olketa samting wea olketa no wantem.
Sapos tufala wea redy for marit laek for iusim wanfala list olsem hem saed bilong tufala seleva. Bat, wanfala Christian bae want for careful for no duim eni samting wea maet brekem Bible principle. Olsem example, waswe sapos tufala wea engage mekem wanfala list bilong olketa samting wea kost tumas? Taem samting olsem kamap olketa wea no garem inaf selen maet no fit nao for givim present, or olketa maet feel hem moabeta for no acceptim invitation for attendim datfala wedding mekem olketa no shame from olketa tekem kam present wea no kost tumas. Wanfala Christian woman raet olsem: “Wei for givim olketa wedding present hem kamap bigfala hevi. Mi trae for willing for give, bat distaem evri hapi wea mi kasem taem mi give hem lus nao.” Hem bae sorre samting sapos wanfala wedding hem kamap samting wea no mekem man hapi!
Tru nao, olketa wea give shud no feel olsem olketa mas baem present long wanfala spesol stoa or spendem big selen mekem pipol acceptim datfala present. Tingim, Jesus Christ showimaot hao samting wea barava spesol long eye bilong God nao hem samting wea stap insaed heart bilong man wea give, no wei wea datfala present garem hae kost. (Luke 21:1-4) Long sem wei, abaotem olketa present bilong mercy for poor pipol, aposol Paul raet olsem: “Letem each wan duim wanem hem disaedem long heart bilong hem, no from eniwan pushim or forcem hem, from God lovem man wea hapi for give.”—2 Corinthians 9:7.
Bible no sei eniting hem rong witim wei for man talem hao hem givim present, maet long wei for raetem wanfala note and givim witim present. Bat, long samfala ples, hem kastom for talem nem bilong man wea give long olketa wea hipap. Disfala kastom savve lead go long staka problem. Olketa wea givim present maet no want for pipol savve long diswan mekem pipol no tinghae long olketa. Olketa man olsem duim samting fitim principle wea stap long Matthew 6:3, wea Jesus sei olsem: “Bat iufala, taem iufala givim present bilong mercy, no letem left hand bilong iufala savve wanem nao raet hand hem duim.” Samfala narawan maet feel hao wei for givim present hem samting bilong man seleva wea hem shud private samting midolwan man wea give and man wea kasem present. And tu, wei for mekem pipol savve long man wea givim present savve lead go long wei for markem olketa present witim olketa nara present, wea “mekem feeling for winim narawan kamap.” (Galatians 5:26) For sure, olketa Christian bae want for stap klia from wei for mekem eniwan feel shame long wei for talemaot long pablik nem bilong olketa man wea give.—1 Peter 3:8.
Tru nao, taem man duim samting fitim olketa principle wea stap insaed Word bilong God, wei for givim present bae go ahed olsem samting for givim hapi.—Acts 20:35.