Wat Nao Bible Talem Abaotem Wei for Give?
Ansa wea Bible givim
Bible sei iumi shud willing for give and no eniwan shud forcem iumi, and iumi shud garem stretfala reason for give. Bible showimaot datwan bae mekem man wea kasem samting for hapi, and man wea givim samting bae hapi tu. (Provebs 11:25; Luke 6:38) Jesus sei: “Man wea givim samting hem barava hapi winim man wea kasem samting.”—Acts 20:35.
Wanem taem nao God bae hapi sapos iumi givim samting?
Hem gud for givim samting taem iumi willing for give and no eniwan forcem iumi. Bible sei: “Evri man mas givim samting followim wanem hemseleva tingim, nogud hem givim samting bat hem no hapi nomoa for givim datwan, or eniwan forcem hem. God hem lovem man wea hapi for givim samting.”—2 Corinth 9:7.
Taem man givim samting from heart blo hem, datwan hem “wei for worship” wea mekem God hapi. (James 1:27) Taem iumi kaen tumas for helpem olketa wea garem need, datwan bae mekem God hapi, and God ting lo datwan olsem hem garem kaon lo iumi. (Provebs 19:17) Bible sei God bae givim gudfala samting lo man wea willing for give.—Luke 14:12-14.
Wanem taem nao God bae no hapi sapos iumi givim samting?
Sapos iumi garem selfish reason for give. Samfala example lo diswan maet olsem:
For mekem olketa narawan tinghae lo iumi.—Matthew 6:2.
For mekem narawan changem bak samting lo iumi.—Luke 14:12-14.
For trae for baem salvation.—Sams 49:6, 7.
Sapos datwan sapotim samting wea God heitim. Olsem example, hem bae no stret for givim selen lo samwan for hem iusim for gambol or for kasem olketa nogud drug or for hem ova tumas lo alcohol. (1 Corinth 6:9, 10; 2 Corinth 7:1) Olsem tu, bae hem no stret for givim samting lo samwan wea fit for waka for kasem selen for sapotim hemseleva bat hem les for duim datwan.—2 Thessalonica 3:10.
Sapos datwan bae mekem hem hard for iumi lukaftarem famili blo iumiseleva. Bible sei hed blo famili mas provaedem wanem famili blo hem needim. (1 Timothy 5:8) Bae hem no stret for wanfala famili hed givim staka samting lo olketa narawan gogo hem no garem inaf for famili blo hemseleva. Olsem tu, Jesus tok daonem olketa wea les for provaed for parents blo olketa and wea sei evri samting wea olketa ownim hem “samting [olketa] givim long God.”—Mark 7:9-13.