Strong Olsem Jeremiah

“Hope long Jehovah; strong and mekem heart bilong iu hem strong. Tru nao, hope long Jehovah.”—PSALM 27:14.

1. Wanem nambawan blessing nao Olketa Jehovah Witness kasem?

OLKETA JEHOVAH’S WITNESS stap insaed wanfala spiritual paradaes. (Isaiah 11:6-9) Insaed disfala world wea fulap witim trabol, olketa garem spesol spiritual living witim olketa nara Christian, wea stap long peace witim Jehovah God and witim each other. (Psalm 29:11; Isaiah 54:13) And spiritual paradaes bilong olketa hem go ahed for grow. Evriwan wea ‘duim will bilong God witim full soul’ share for mekem diswan kamap moa big. (Ephesians 6:6) Long wanem wei? Taem olketa garem living wea followim olketa Bible principle and taem olketa teachim nara pipol for duim sem samting, wea minim olketa invaetem olketa for kasem gudfala samting from olketa nambawan blessing bilong datfala paradaes.—Matthew 28:19, 20; John 15:8.

2, 3. Wanem nao olketa tru Christian need for deal witim?

² Nomata olsem, wei wea iumi stap insaed wanfala spiritual paradaes no minim iumi no kasem olketa test. Iumi still no perfect and kasem hevi wea kamaot from sik, wei for olo, and gogo for dae tu. And tu, iumi lukim olketa profesi saed long “olketa last day” fulfill. (2 Timothy 3:1) Olketa war, criminal fasin, sik, hangre, and nara hardfala samting kasem evri man, and Olketa Jehovah’s Witness tu.—Mark 13:3-10; Luke 21:10, 11.

³ For join witim evri samting hia, iumi savve hao nomata iumi stap sef insaed spiritual paradaes bilong iumi, iumi savve still feisim strongfala wei for againstim iumi wea kam from pipol aotsaed. Jesus talem disfala warning long olketa wea followim hem: “From iufala no part bilong world, bat mi chusim iufala aot from world, from diswan nao world hem heitim iufala. Tingim toktok wea mi talem long iufala, wanfala slave hem no winim masta bilong hem. Sapos olketa persecutim mi, bae olketa persecutim iufala tu.” (John 15:18-21) Iumi tu kasem persecution distaem. Staka pipol no minim or tinghae long wei bilong iumi for worship. Samfala tok daonem, mekfani, and heitim iumi tu, wea hem samting Jesus talem bae happen. (Matthew 10:22) Staka taem, olketa niusman laek for spoelem iumi long wei for talem rong information and laea story abaotem iumi. (Psalm 109:1-3) Tru tumas, iumi evriwan feisim olketa hard samting, and maet samfala long iumi start for feel wikdaon. Hao nao iumi savve go ahed strong?

4. Iumi luk go long hu nao for kasem help for go ahed strong?

⁴ Jehovah bae helpem iumi. Holy spirit muvim man wea raetem psalm for sei: “Planti trabol kasem raeteous wan, bat from evriwan hia Jehovah sevem hem.” (Psalm 34:19; 1 Corinthians 10:13) Staka long iumi experiencem finis hao taem iumi putim full trust bilong iumi long Jehovah, hem givim iumi strong for go ahed nomata iumi kasem eni hard samting. Love bilong iumi for hem and hapi wea stap front long iumi hem helpem iumi for winim eni wei for wikdaon and wei for fraet. (Hebrews 12:2) So, nomata hardfala samting kamap, iumi go ahed for stand strong.

Word Bilong God Strongim Jeremiah

5, 6. (a) Hu nao samfala tru worshiper wea go ahed strong? (b) Hao nao Jeremiah feel taem hem kasem assignment for kamap wanfala profet?

⁵ Long history, olketa faithful servant bilong Jehovah kasem hapi nomata olketa hard samting kamap long living. Samfala stap long taem wea Jehovah judgem and distroem pipol wea no faithful. Wanfala nao hem Jeremiah and samfala wea stap semtaem witim hem, and tu olketa Christian long first century. Olketa example bilong history hia hem for encouragem iumi, and iumi savve lanem staka samting sapos iumi studyim olketa. (Romans 15:4) Olsem example, tingim Jeremiah.

⁶ Taem hem barava young, Jeremiah kasem assignment for serve olsem wanfala profet long Judah. Datwan hem no assignment wea isi. Staka worshipim olketa giaman god. Nomata Josiah hem faithful, wea hem king taem Jeremiah startim ministry bilong hem, evri king wea kamap bihaen long hem olketa nating faithful. And tu, staka wea garem responsibility for teachim pipol, hem nao olketa profet and priest, olketa nating sapotim truth. (Jeremiah 1:1, 2; 6:13; 23:11) So, hao nao Jeremiah feel taem Jehovah askem hem for kamap wanfala profet? Hem fraet fogud! (Jeremiah 1:8, 17) Jeremiah talem feeling wea hem garem firstaem taem hem sei: “Mi sei: ‘O Sovereign Lord Jehovah! Mi no savve hao for toktok, from mi wanfala boy nomoa.’ ”—Jeremiah 1:6.

7. Wanem nao pipol long territory bilong Jeremiah duim taem hem preach long olketa, and diswan mekem hem duim wanem?

⁷ Staka long territory bilong Jeremiah nating willing for lisin, and strong for againstim hem staka taem. Wantaem, Pashhur, wanfala priest, hitim hem and putim hem long olketa stock. Jeremiah talem feeling bilong hem long datfala taem: “Mi sei: ‘Mi bae no storyim hem [Jehovah], and mi bae no talem eni samting long nem bilong hem.’ ” Maet samfala taem iu tu want for givap. Lukim samting wea helpem Jeremiah for go ahed strong. Hem sei: “Insaed heart bilong mi datwan [toktok or message bilong God] olsem wanfala fire wea bone insaed olketa bon bilong mi; and mi taed for holem bak, and mi no savve go ahed strong for duim datwan.” (Jeremiah 20:9) Waswe, toktok bilong God hem affectim iu long sem wei tu?

Olketa Fren Bilong Jeremiah

8, 9. (a) Wanem wik point nao profet Urijah garem, and diswan lead go long wanem? (b) Why nao Baruch hem feel wikdaon, and hao nao hem kasem help?

⁸ No Jeremiah seleva nomoa duim waka for talemaot profesi. Hem garem olketa fren, and for sure datwan encouragem hem. Nomata olsem, samfala taem olketa fren bilong hem nating duim wise samting. Olsem example, nara profet wea waka witim hem, Urijah, hem busy for talemaot olketa warning againstim Jerusalem and Judah “followim evri toktok bilong Jeremiah.” Bat, taem King Jehoiakim givim order for killim dae Urijah, datfala profet ranawe go long Egypt from hem fraet. Datwan nating sevem hem. Olketa man bilong king aftarem hem, kasholem hem, and tekem hem kam bak long Jerusalem, wea olketa killim hem dae. Datwan hem masbi mekem Jeremiah seke fogud!—Jeremiah 26:20-23.

⁹ Narafala fren bilong Jeremiah hem secretary bilong hem, Baruch. Baruch hem helpem tumas Jeremiah, bat wantaem hem tu lusim spiritual tingting bilong hem. Hem start for komplen and sei: “Trabol nao long mi, from Jehovah joinim kam sorre long pain bilong mi! Mi feel taed from sorre bilong mi, and mi no faendem eni ples for rest.” Baruch wea feel wikdaon hem start for lusim wei for tinghae long olketa spiritual samting. Nomata olsem, long kaenfala wei Jehovah kaonselem Baruch, and datwan stretem hem. Then hem kasem promis hao hem bae laef taem Jerusalem distroe. (Jeremiah 45:1-5) Taem Baruch kasem bak spiritual tingting bilong hem, datwan masbi barava encouragem Jeremiah!

Jehovah Sapotim Profet Bilong Hem

10. Wanem nao olketa promis wea Jehovah talem long Jeremiah for sapotim hem?

¹⁰ Barava important samting nao, Jehovah nating lusim Jeremiah. Hem minim feeling bilong profet bilong hem and givim hem strong and help wea hem needim. Olsem example, long start long ministry bilong Jeremiah taem hem talemaot olketa daot bilong hem saed long wei wea hem fit or nomoa, Jehovah sei long hem: “Iu no fraet long feis bilong olketa, from ‘mi stap witim iu for sevem iu,’ hem nao toktok bilong Jehovah.” Then, bihaen hem givim information long profet bilong hem abaotem assignment bilong hem, Jehovah sei: “Olketa bae faet againstim iu, bat olketa bae no winim iu, from ‘mi stap witim iu,’ hem nao toktok bilong Jehovah, ‘for sevem iu.’ ” (Jeremiah 1:8, 19) Datfala promis barava comfortim hem! And Jehovah fulfillim promis bilong hem.

11. Hao nao iumi savve Jehovah fulfillim promis bilong hem for sapotim Jeremiah?

¹¹ Dastawe, bihaen olketa putim hem long olketa stock and pipol long pablik mekfani long hem, Jeremiah feel sure taem hem sei: “Jehovah hem olsem wanfala maeti wan witim mi. Dastawe olketa wea persecutim mi bae foldaon and no win. Olketa bae feel shame.” (Jeremiah 20:11) Taem pipol trae for killim dae Jeremiah bihaen, Jehovah go ahed for stap witim hem, and olsem Baruch, Jeremiah hem laef taem Jerusalem distroe and hem kamap free. Bat, olketa wea persecutim hem and nating want for lisin long olketa warning bilong hem dae or go olsem prisoner long Babylon.

12. Nomata iumi garem olketa reason for feel wikdaon, wanem nao iumi shud tingim?

¹² Olsem Jeremiah, staka Jehovah’s Witness distaem safa long olketa difren wei. Olsem iumi storyim finis, samfala safa bikos long wik point bilong olketa seleva, olketa narawan hem from disfala world wea olobaot, and samfala moa from pipol wea againstim waka bilong iumi. Kaen wei for safa olsem savve mekem man wikdaon. Olsem Jeremiah, iumi maet daotem sapos iumi fit for go ahed or nomoa. Tru nao, iumi expectim wei for wikdaon samfala taem. Wei for wikdaon hem testim hao deep nao love bilong iumi for Jehovah. Dastawe iumi disaed strong for no letem wei for wikdaon mekem iumi finis for servem Jehovah olsem Urijah hem duim. Bat, iumi want for followim Jeremiah and barava sure hao Jehovah bae sapotim iumi.

Hao for Faet Againstim Wei for Wikdaon

13. Hao nao iumi savve followim example bilong Jeremiah and David?

¹³ Jeremiah hem story evritaem witim Jehovah God, hem talem Jehovah olketa deep feeling bilong hem and barava ask for Jehovah strongim hem. Datwan hem nambawan example for followim. David bilong bifor, wea depend long sem Wan for Givim strong hem raet olsem: “O Jehovah, lisin long samting mi talem, minim wei wea mi feel nogud. Lisin gud long singaot bilong mi for help, O King and God bilong mi, bikos mi prea long iu.” (Psalm 5:1, 2) Story abaotem laef bilong David hem showimaot hao evritaem Jehovah hem ansarem prea wea David ask for help. (Psalm 18:1, 2; 21:1-5) Long semkaen wei, taem olketa hevi kamap hard tumas for karem or luk olsem iumi hard tumas for winim olketa problem, iumi savve kasem bigfala comfort taem iumi prea long Jehovah and talem hem evri samting insaed heart bilong iumi. (Philippians 4:6, 7; 1 Thessalonians 5:16-18) Jehovah no les for lisin long iumi. Bat, hem talem dat hem ‘kea for iumi.’ (1 Peter 5:6, 7) Nomata olsem, waswe, hem stret for prea long Jehovah and then no lisin long samting wea hem talem?

14. Hao nao toktok bilong Jehovah affectim Jeremiah?

¹⁴ Hao nao Jehovah story long iumi? Tingim Jeremiah moa. From Jeremiah hem gudfala profet, Jehovah story stret go long hem. Jeremiah hem storyim wei wea toktok bilong God affectim heart bilong hem: “Mi faendem olketa toktok bilong iu, and mi start for kaikaim; and toktok bilong iu mekem heart bilong mi singaot and hapi; from olketa kolem nem bilong iu long mi, O Jehovah God bilong olketa army.” (Jeremiah 15:16) Tru nao, Jeremiah hapi tumas from olketa kolem nem bilong God long hem, and toktok bilong Hem spesol long datfala profet. Dastawe, olsem aposol Paul, Jeremiah hem barava want for talemaot datfala message wea hem kasem.—Romans 1:15, 16.

15. Hao nao iumi savve putim toktok bilong Jehovah insaed heart bilong iumi, and wei for tingim wanem samting nao bae mekem iumi disaed strong for talemaot long pipol?

¹⁵ Jehovah no story stret go long eniwan distaem. Bat, iumi garem toktok bilong God insaed long Bible. Dastawe, sapos iumi strong for studyim Bible and barava ting raonem wanem iumi lanem, toktok bilong God bae mekem heart bilong iumi “singaot and hapi” tu. And iumi savve barava hapi from iumi karem nem bilong Jehovah taem iumi go for talem olketa toktok hia long nara pipol. Iumi mas no enitaem forget hao no eni nara pipol long world distaem talemaot nem bilong Jehovah. Olketa Witness bilong hem nomoa talemaot gud nius bilong Kingdom bilong God wea rul finis and teachim hambol pipol for kamap olketa disaepol bilong Jesus Christ. (Matthew 28:19, 20) Diswan mekem iumi kasem hapi and hem wanfala privilege! Taem iumi tingim bigfala privilege wea Jehovah givim long iumi, hard for iumi no talemaot nem and Kingdom bilong hem.

Iumi Mas Keakea Long Olketa Iumi Kaban Witim

16, 17. Hao nao tingting bilong Jeremiah saed long wanem kaen pipol nao bae nogud for kaban witim, and hao nao iumi savve followim example bilong hem?

¹⁶ Jeremiah talem nara samting wea helpem hem for strong nomata hem fraet. Hem sei: “Mi no sidaon midolwan sekson wea pleim nogud trik and hapi long datwan. From hand bilong iu mi sidaon seleva, from iu mekem mi fulap witim judgment.” (Jeremiah 15:17) Jeremiah disaed for stap seleva winim wei for kaban witim nogud pipol wea diswan bae savve spoelem hem. Iumi distaem tingim samting long sem wei. Iumi no forgetim warning bilong aposol Paul hao “wei for kaban witim nogud pipol hem spoelem gudfala fasin,” nomata olketa gudfala fasin wea iumi garem for staka year finis.—1 Corinthians 15:33.

¹⁷ Wei for kaban witim nogud pipol savve openem wei for spirit bilong world mekem tingting bilong iumi kamap dirty. (1 Corinthians 2:12; Ephesians 2:2; James 4:4) So, iumi want for trainim paoa bilong iumi for luksavve long pipol wea bae nogud for kaban witim and then stap klia evribit from olketa. (Hebrews 5:14) Sapos Paul hem laef long earth distaem, wanem nao bae hem sei long wanfala Christian wea lukluk long olketa movie abaotem dirty or raf fasin or raf sports? Hao nao bae hem kaonselem wanfala brata wea fren witim olketa stranger long Internet? Hao nao bae hem ting long wanfala Christian wea spendem staka hour for pleim olketa video game or lukluk long television bat wea no strong for duim study seleva?—2 Corinthians 6:14b; Ephesians 5:3-5, 15, 16.

Go Ahed for Stap Insaed Spiritual Paradaes

18. Wanem nao bae helpem iumi for stap strong long spiritual wei?

¹⁸ Iumi barava tinghae long spiritual paradaes bilong iumi. No eniting hem semsem witim datwan long world distaem. Nomata pipol wea no biliv talem gudfala samting abaotem love, wei for tingim narawan, and kaenfala fasin wea olketa Christian garem for each other. (Ephesians 4:31, 32) Nomata olsem, distaem, winim enitaem bifor, iumi need for faet againstim wei for wikdaon. Wei for kaban witim gud pipol, prea, and followim gudfala schedule for study savve helpem iumi for stap strong long spiritual wei. Olketa samting hia bae strongim iumi for feisim eni test witim full trust long Jehovah.—2 Corinthians 4:7, 8.

19, 20. (a) Wanem nao bae helpem iumi for go ahed strong? (b) Next article hem for hu, and hu moa bae interest long hem?

¹⁹ Iumi mas no letem olketa wea heitim message wea iumi talem from Bible for mekem iumi fraet and mekem faith bilong iumi wikdaon. Olsem olketa enemy wea persecutim Jeremiah, olketa wea faet againstim iumi olketa faet againstim God. Olketa bae no win. Jehovah, wea barava moa strong winim olketa wea againstim iumi sei olsem long iumi: “Hope long Jehovah; strong nomata iu fraet and letem heart bilong iu hem strong. Tru nao, hope long Jehovah.” (Psalm 27:14) From hope bilong iumi long Jehovah hem stap deep insaed heart bilong iumi, bae iumi disaed strong for no givap for duim gud samting. Olsem Jeremiah and Baruch, bae iumi sure for harvestim gud samting sapos iumi no kamap taed.—Galatians 6:9.

²⁰ Staka Christian stragol for againstim feeling for wikdaon. Bat olketa young Christian feisim olketa challenge wea olketa wea fullgrown no feisim. Nomata olsem, olketa garem olketa nambawan chance tu. Next article hem for olketa young wan wea stap midolwan long iumi. Parents and olketa full-grown wan insaed kongregeson bae interest long diswan tu bikos thru long toktok, example and sapot, olketa fit for helpem olketa young wan insaed kongregeson.

Hao Nao Bae Iu Ansa?

• Why nao iumi expectim samting wea bae mekem iumi feel wikdaon, and iumi shud depend long hu for help?

• Hao nao Jeremiah winim wei for feel wikdaon nomata hem garem hardfala assignment?

• Wanem nao bae mekem heart bilong iumi ‘singaot and hapi’ nomata iumi feisim hardfala samting?

[Piksa long page 9]

Jeremiah tingse hem young tumas and no garem savve for kamap wanfala profet

[Piksa long page 10]

Nomata taem hem kasem persecution, Jeremiah savve Jehovah stap witim hem “olsem wanfala maeti wan”