No Eni Samting Stopem Jeremiah for Story Abaotem Jehovah

Samfala taem pipol savve tok spoelem iumi or kros long iumi taem iumi story abaotem Jehovah. Diswan savve mekem iumi no laek for story abaotem God. Waswe, enitaem eni samting mekem iu no laek for story abaotem God?— Bible storyim wanfala young man wea lovem Jehovah, bat samting hem happen wea mekem hem no laek for story abaotem God. Nem bilong disfala young man hem Jeremiah. Tingim samting wea happen long hem.

Taem Jeremiah hem young man nomoa, Jehovah talem hem for warnim olketa Israelite. Hem mas talem olketa for no gohed duim olketa nogud samting. Hem no isi for Jeremiah duim diswan, and hem fraet. Hem sei long Jehovah: ‘Mi no savve story gud. Mi olsem pikinini nomoa.’ Bat Jehovah sei long hem: ‘Iu no fraet. Bae mi helpem iu.’

So Jeremiah warnim olketa Israelite sapos olketa no change, olketa bae kasem panis. Waswe, iu ting olketa duim wanem Jeremiah talem?— Nomoa. Olketa tok spoelem hem and barava kros long hem. Samfala laek for killim hem dae tu! Waswe, iu tingse Jeremiah hem fraet?— Hem fraet ia, and hem sei: ‘Bae mi no story moa abaotem Jehovah.’ Bat waswe, hem no story nao?— Nomoa. Hem gohed story abaotem Jehovah bikos hem barava lovem hem. And from Jeremiah no givap, Jehovah protectim hem.

Olsem example, wanfala taem samfala nogud man torowem Jeremiah long wanfala deep hol wea fulap long mud. Hem no garem kaikai or wata. Olketa man hia laekem hem for dae long there. Bat Jehovah iusim olketa narawan for aotem Jeremiah from datfala hol!

Wanem nao iu savve lanem from example bilong Jeremiah?— Nomata samfala taem Jeremiah fraet, hem gohed for story abaotem Jehovah. Taem iu story long pipol abaotem Jehovah, maet olketa tok spoelem iu or kros long iu. Maet iu shame or fraet. Bat no letem eni samting stopem iu for story abaotem Jehovah. Hem bae evritaem helpem iu, olsem hem helpem Jeremiah.