Hu Nao Givim Glory Long God Distaem?
“Iu nao fit, Jehovah, God bilong mifala, for kasem glory and honor and paoa.”—REVELATION 4:11.
1, 2. (a) Wanem nao samfala example bilong samting wea science kolem biomimetics? (b) Wanem nao kwestin wea kamap and wanem nao ansa bilong datwan?
Winim 50 year wea go pas finis, George de Mestral, wanfala engineer from Switzerland hem wakabaot witim dog bilong hem. Taem hem kasem bak haos, hem lukim hao kaleko bilong hem and hair bilong dog fulap witim nila grass. Hem iusim microscope for lukluk long olketa nila grass hia and lukim hao olketa nao olketa smol hook wea pas long eni samting wea garem hol. Gogo, hem wakem samting wea olketa kolem Velcro wea duim semkaen samting olsem datfala nila grass. Hem no De Mestral nomoa wea copyim samting wea hem lukim long creation. Long United States, tufala brata, Wilbur and Orville Wright, designim wanfala aeroplane bihaen olketa studyim olketa bigfala bird taem olketa flae. Wanfala engineer from France, Alexandre-Gustave Eiffel, followim design bilong bigfala bon long leg wea holem full weight bilong body taem hem designim datfala taoa long Paris wea nem followim hem.
2 Olketa nao olketa example bilong samting wea science kolem biomimetics, wea hem wei wea science trae wakem samting wea copyim olketa design bilong creation.a Bat hem fitim for ask olsem: Waswe, enitaem olketa man wea wakem samting praisem datwan wea designim olketa smol nila grass, olketa bigfala bird, bigfala bon long leg bilong man, and evri nara nambawan samting wea olketa copyim? Sorre nao, long world distaem, pipol no givim praise or glory long God wea hem fit for kasem.
3, 4. Wanem nao mining bilong datfala Hebrew word wea iumi transleitim “glory,” and wanem nao hem minim taem hem storyim Jehovah?
3 Samfala maet ask: ‘Why nao hem important for givim glory long God? Waswe, God no kasem glory finis?’ Hem tru, Jehovah garem moa glory winim eniwan long universe, bat datwan no minim evri man luksavve hao God garem glory. Long Bible, datfala Hebrew word wea iumi transleitim “glory” hem point go long eni samting wea mekem pipol tinghae long wanfala man or ting long hem olsem hem important. Saed long God, disfala word hem minim eni samting wea mekem olketa man tinghae long God.
4 No staka pipol distaem luksavve long olketa samting wea shud mekem iumi tinghae long God. (Psalm 10:4; 14:1) Planti taem, pipol wea garem bignem long world, nomata olketa biliv long God or nomoa, olketa nao kosim nara pipol for no showimaot respect for nambawan Creator bilong universe. Hao nao olketa duim olsem?
“Olketa No Garem Eni Excuse”
5. Long tingting bilong samfala scientist, olketa nambawan samting long creation hem kam from wea?
5 Staka scientist biliv strong hao no eni God stap. So, hao nao olketa explainim wea nao olketa nambawan samting long creation and olketa man kam from? Olketa sei olketa samting olsem kam from evolution, wea minim olketa kamap seleva. Olsem example, wanfala scientist wea studyim evolution, Stephen Jay Gould, hem raet: “Iumi stap bikos wanfala grup bilong olketa fish garem difren kaen fin wea savve change for kamap leg for wakabaot long land . . . Maet iumi no laekem simpol ansa olsem—bat no eni nara ansa hem stap.” And tu, Richard E. Leakey and Roger Lewin wea studyim evolution raet: “Maet olketa man wanfala barava bigfala mistek nomoa.” Nomata samfala scientist praisem design insaed nature and wei wea hem luk naes, olketa no talem hao God nao wakem datwan.
6. Wanem nao savve stopem planti pipol for givim praise long God wea hem fit for kasem olsem Creator?
6 Taem olketa wea garem bigfala education sei evolution hem tru, hem olsem olketa sei olketa wea no willing for bilivim datwan no garem savve. Wanem tingting nao pipol garem from diswan? Samfala year bifor, wanfala man wea savve tumas abaotem evolution hem interviewim samfala pipol wea acceptim datfala idea. Hem sei: “Mi faendaot hao klosap evriwan wea bilivim evolution biliv olsem bikos olketa herem hao evriwan wea kleva tumas bilivim datwan.” Diswan showimaot hao taem olketa wea garem education sei olketa no biliv long God, diswan savve affectim nara pipol and stopem olketa for givim praise long God wea hem fit for kasem olsem Creator.—Proverbs 14:15, 18.
7. Olsem Romans 1:20 talem, taem iumi lukluk long creation, iumi luksavve long wanem samting, and why nao olsem?
7 Waswe, olketa scientist bilivim evolution bikos pruv stap for showimaot datwan hem tru? Barava nomoa! Pruv stap evriwea raonem iumi hao wanfala Creator hem stap. Aposol Paul raet olsem abaotem hem: ‘Olketa fasin bilong hem wea man no savve lukim, showaot klia start kam long creation bilong olketa man, from olketa showaot long olketa samting wea hem wakem, insaed diswan paoa bilong hem wea stap for olowe and wei wea hem nao God, so olketa wea no biliv no garem eni excuse.’ (Romans 1:20) Iumi lukim klia pruv hao Creator hem stap from samting wea hem wakem. So Paul talem hao from start bilong olketa man, olketa fit for luksavve long pruv wea showimaot God hem stap taem olketa lukim samting wea hem creatim. Wea nao disfala pruv?
8. (a) Hao nao olketa samting long skae showimaot paoa and wisdom bilong God? (b) Wanem nao pruvim hao samting mas kosim universe for kamap?
8 Taem iumi lukluk long olketa star long skae iumi lukim pruv hao God hem stap. Psalm 19:1 hem sei: “Skae talemaot glory bilong God.” “Skae”—wea minim sun, moon, and olketa star—hem showimaot paoa and wisdom bilong God. Iumi sapraes tumas taem iumi tingim namba bilong olketa star. And evri samting hia hem muv long skae followim olketa physical law wea barava set.b (Isaiah 40:26) Hem barava no fitim for sei olketa samting hia kamap seleva! Hem interesting hao planti scientist sei universe hem seknomoa start. For explainim why diswan hem interesting, wanfala professor hem raet: “Hem moa isi for olketa wea no biliv long God for acceptim hao universe hem nating garem start. Olsem tu, sapos universe garem start, wanfala samting nao mas mekem hem kamap; from man kanduit acceptim hao samting olsem savve kamap and no eniting kosim datwan for happen.”
9. Hao nao wisdom bilong Jehovah showaot long olketa animal wea hem creatim?
9 Long earth tu iumi lukim pruv hao God hem stap. Man wea raetem psalm hem sei: “Olketa waka bilong iu planti tumas, O Jehovah! Evriwan long olketa iu wakem long wisdom. Earth hem fulap witim olketa samting wea iu wakem.” (Psalm 104:24) Olketa samting wea Jehovah wakem, wea minim olketa animal tu, showimaot wisdom bilong hem. Olsem iumi storyim finis, design bilong olketa samting wea laef hem gud tumas dastawe planti taem olketa scientist trae for copyim. Tingim samfala example moa. Olketa scientist studyim horn bilong olketa deer for faendaot hao for wakem olketa strongfala helmet; olketa studyim wanfala kaen fly wea savve tumas for herem samting for trae wakem olketa samting wea moabeta for pipol wea earpas; olketa lukluk long olketa feather bilong wing bilong olketa owl for trae wakem aeroplane wea haed from radar. Bat nomata olketa man traem best bilong olketa, olketa no savve copyim evribit olketa perfect design wea stap long nature. Datfala buk Biomimicry—Innovation Inspired by Nature hem sei: “Olketa samting wea laef duim finis evri samting wea iumi olketa man want for duim, bat olketa no duim long wei wea iusim gas, oil or coal, mekem pollution long earth, or spoelem future bilong olketa seleva.” Wei bilong olketa barava showimaot wisdom!
10. Why nao hem krangge tingting for rejectim idea hao wanfala Creator hem stap? Givim example.
10 Nomata sapos iu luk go ap long skae or iu lukluk long creation hia long earth, iu lukim pruv wea showimaot klia hao wanfala Creator hem stap. (Jeremiah 10:12) Iumi shud barava agree witim olketa angel long heven wea singaot: “Iu nao fit, Jehovah, God bilong mifala, for kasem glory and honor and paoa, from iu creatim evri samting.” (Revelation 4:11) Nomata olsem, staka scientist no luksavve witim ‘eye bilong heart bilong olketa,’ pruv hao Creator hem stap nomata olketa maet tinghae long design bilong olketa samting wea olketa lukim witim really eye bilong olketa. (Ephesians 1:18) Olsem example, for tinghae long olketa samting long nature wea barava nambawan design and wea luk naes, bat long semtaem rejectim idea hao wanfala Creator hem stap, hem krangge tingting. Hem olsem man wea tinghae long wanfala naesfala piksa wea garem hae price and long semtaem sei no eniwan nao drawim datfala piksa. Iumi no sapraes hao Bible sei olketa wea nating willing for biliv long God “no garem eni excuse”!
“Blind Pipol” Trikim Nara Pipol
11, 12. Teaching wea sei God disaedem finis future bilong man hem kam from wanem idea, and wanem nao showimaot disfala teaching hem no givim glory long God?
11 Planti pipol strong for biliv wei wea olketa worshipim God givim glory long hem. (Romans 10:2, 3) Bat really, olketa religion olsem wanfala sekson wea stopem planti million pipol for givim glory long God. Hao nao olsem? Bae iumi lukluk long tufala wei.
12 First wei, olketa false teaching bilong religion stopem God for kasem glory. Olsem example, tingim disfala teaching wea sei God disaedem finis future bilong man. Disfala teaching hem kam from idea wea sei, from God hem fit for savve long future, hem mas savve firstaem long evri samting wea bae happen. So disfala teaching sei hao longfala taem bifor, God disaedem finis future—nomata hem gud or nogud—bilong evri man wanwan. Sapos diswan hem tru, hem minim God nao mas kasem blame for evri wei for safa and evri wicked samting wea happen long disfala world. Hem barava no givim glory long God for blamem hem for samting wea really kam from main Enemy bilong hem, Satan, datwan wea Bible kolem “ruler bilong disfala world”!—John 14:30; 1 John 5:19.
13. Why nao hem krangge for ting God kanduit kontrolem savve bilong hem abaotem future? Givim example.
13 Disfala teaching wea sei God disaedem finis future bilong man, hem no kam from Bible and hem tok laea againstim God. Hem mekem pipol konfius and no minim hao wanem God fit for duim hem difren from wanem hem barava duim. Bible talem stret hao God fit for savve firstaem long samting wea bae happen. (Isaiah 46:9, 10) Nomata olsem, hem krangge for ting God kanduit kontrolem savve bilong hem abaotem future, or for sei hem nao mas kasem blame for evri samting wea happen. Olsem example: Tingim sapos iu barava strong long physical wei. Waswe, diswan minim iu mas liftimap evri hevi samting wea iu lukim? Barava nomoa! Olsem tu, nomata God fit for savve long future, datwan no minim hem mas savve firstaem or disaedem finis evri samting wea bae happen long future. Hem savve chus for iusim datfala savve or nomoa.c Hem klia hao olketa false teaching, olsem diswan wea sei God disaedem finis future bilong man, hem no givim glory long God.
14. Long wanem wei nao religion no honorim God?
14 Mek-tu wei wea religion no honorim God hem thru long fasin bilong olketa church member. Olketa Christian shud followim olketa teaching bilong Jesus. Jesus teachim olketa follower bilong hem for “lovem each other” and for “no part bilong world.” (John 15:12; 17:14-16) Waswe olketa bigman bilong Christendom? Olketa followim olketa teaching hia?
15. (a) Wanem nao olketa bigman bilong religion duim saed long war bilong olketa nation? (b) Hao nao fasin bilong olketa bigman affectim planti million pipol?
15 Tingim wanem nao olketa bigman bilong religion duim evritaem saed long war. Olketa sapotim, letem, and lead tu long planti war bilong olketa nation. Olketa blessim olketa army and sei gudfala reason stap for olketa war hia. Diswan muvim iumi for ask, ‘Waswe, olketa bigman hia no savve hao long kantri wea olketa faet againstim olketa bigman long sem religion duim sem samting?’ (Lukim box “Hu Nao God Saed Witim?”) Olketa bigman no givim glory long God taem olketa sei God nao saed witim olketa insaed war wea killim dae staka pipol; and tu, olketa no givim glory long hem from olketa ting nating long evrikaen dirty fasin and sei olketa standard bilong Bible hem no fitim distaem. Olketa olsem olketa bigman bilong religion wea Jesus kolem olketa “man for brekem law” and “blind pipol wea leadim nara pipol”! (Matthew 7:15-23; 15:14) Fasin bilong olketa bigman mekem wei wea planti million pipol lovem God hem gogo daon.—Matthew 24:12.
Hu Nao Really Givim Glory Long God?
16. Why nao iumi mas lukluk long Bible for faendaot hu nao really givim glory long God distaem?
16 Sapos pipol long world wea important and garem bignem no givim glory long God distaem, then hu nao duim? For ansarem datfala kwestin, iumi mas lukluk long Bible. Diswan hem fitim, bikos God garem right for talem hao nao pipol mas givim glory long hem, and hem duim olsem insaed Word bilong hem, Bible. (Isaiah 42:8) Bae iumi lukluk long thrifala wei for givim glory long God, and faendaot hu nao really duim datwan distaem.
17. Hao nao Jehovah showimaot hem important for nem bilong hem kasem glory, and hu nao praisem nem bilong God raonem full earth distaem?
17 First wei wea iumi savve givim glory long God hem taem iumi praisem nem bilong hem. Samting wea Jehovah talem long Jesus pruvim hao diswan barava important samting insaed wei for duim will bilong God. Tu-thri day bifor hem dae, Jesus hem prea olsem: “Dadi, givim glory long nem bilong iu.” Then wanfala voice hem ansa olsem: “Mi givim glory long hem finis and bae givim glory long hem moa.” (John 12:28) Hem klia hao Jehovah nao wan wea talem datfala toktok. Toktok bilong hem showimaot klia hao hem important long Jehovah for nem bilong hem kasem glory. So, hu nao givim glory long Jehovah long wei for talemaot and praisem nem bilong hem evriwea long earth distaem? Olketa Jehovah’s Witness, and olketa duim olsem long 235 kantri!—Psalm 86:11, 12.
18. Hao nao iumi luksavve long olketa wea worshipim God witim “truth,” and hu nao datfala sekson wea teachim truth from Bible for winim 100 year?
18 Mek-tu wei wea iumi savve givim glory long God hem taem iumi teachim tru samting abaotem hem. Jesus sei olketa tru worshiper bae “worshipim [God] witim . . . truth.” (John 4:24) Hao nao iumi luksavve long olketa wea worshipim God witim “truth”? Olketa mas rejectim olketa teaching wea no kam from Bible and wea teachim rong samting abaotem God and will bilong hem. Olketa mas teachim truth from Word bilong God, olsem olketa samting hia: Jehovah nao Most Hae God, and from diswan, hem nomoa fit for kasem glory (Psalm 83:18); Jesus nao Son bilong God and datwan wea God markem olsem Ruler bilong Messiah Kingdom bilong God (1 Corinthians 15:27, 28); Kingdom bilong God bae mekem nem bilong Jehovah holy and fulfillim purpose bilong hem for disfala earth and olketa man (Matthew 6:9, 10); gud nius abaotem disfala Kingdom mas kasem full earth. (Matthew 24:14) For winim 100 year, wanfala sekson nomoa faithful for teachim olketa nambawan truth hia—Olketa Jehovah’s Witness!
19, 20. (a) Hao nao gudfala fasin bilong wanfala Christian savve givim glory long God? (b) Olketa wanem kwestin nao savve helpem iumi for luksavve hu nao givim glory long God distaem thru long fasin bilong olketa?
19 Mek-thri wei wea iumi savve givim glory long God hem taem iumi followim olketa mark bilong hem. Aposol Peter raet olsem: “Keepim fasin bilong iufala gud midolwan long olketa nation, mekem, long samting wea olketa tok againstim iufala olsem nogud pipol, olketa savve lukim gudfala waka bilong iufala and givim glory long God long day for hem judgem pipol.” (1 Peter 2:12) Fasin bilong wanfala Christian mekem pipol luksavve long faith bilong hem. Taem pipol lukim hao faith bilong datfala Christian nao mekem hem garem gudfala fasin—datwan givim glory long God.
20 Hu nao givim glory long God distaem thru long gudfala fasin bilong olketa? Wanem religion nao kasem praise from olketa gavman for wei wea olketa stap long peace, followim law, and peim tax? (Romans 13:1, 3, 6, 7) Wanem sekson nao garem gudfala nem evriwea long world olsem pipol wea wan mind witim olketa wea garem sem biliv—wan mind wea winim eni wei for divaed saed long kala skin, kantri, and tribe? (Psalm 133:1; Acts 10:34, 35) Wanem sekson nao garem gudfala nem from Bible education waka wea olketa duim wea encouragem pipol for respectim law, famili laef, and olketa standard saed long fasin wea kam from Bible? Wanfala sekson nomoa stap wea garem kaen fasin olsem—Olketa Jehovah’s Witness!
Waswe, Iu Givim Glory Long God?
21. Why nao iumi shud ting raonem sapos iumi wanwan givim glory long Jehovah?
21 Evriwan long iumi shud ask, ‘Waswe, mi givim glory long Jehovah?’ Olsem Psalm 148 showimaot, klosap full creation givim glory long God. Olketa angel, skae, earth and olketa animal wea stap long hem—evriwan long olketa praisem Jehovah. (Verse 1-10) Bat sorre tumas, staka man no duim olsem! Sapos laef bilong iu givim glory long God, iu join witim full creation for praisem Jehovah. (Verse 11-13) Hem nao best wei for iusim laef bilong iu.
22. Taem iu givim glory long Jehovah, wanem nao olketa blessing wea iu kasem, and iu shud disaed strong for duim wanem?
22 Taem iu givim glory long Jehovah, iu kasem planti difren blessing. Taem iu showimaot faith long ransom sakrifaes bilong Christ, iu savve garem peace and nambawan wei for fren witim Dadi bilong iu long heven. (Romans 5:10) Taem iu luk aotem olketa reason for givim glory long God, bae iu garem moa reason for talemaot thankiu and luk forward long future. (Jeremiah 31:12) Then, bae iu fit for helpem nara pipol for garem laef wea hapi, mekem man satisfae, and long wei olsem bae iuseleva kamap moa hapi. (Acts 20:35) Mifala hope iu bae disaed strong for givim glory long God—distaem and for olowe!
[Olketa Footnote]
a Datfala word “biomimetics” hem kam from Greek word biʹos, wea minim “laef,” and miʹme·sis, wea minim “wei for copy.”
b For moa information abaotem wei wea skae showimaot wisdom and paoa bilong God, lukim chapter 5 and 17 bilong datfala buk Kam Klos Long Jehovah, wea Olketa Jehovah’s Witness nao pablisim.
c Lukim Volume 1, page 853, bilong Insight on the Scriptures, wea Olketa Jehovah’s Witness nao pablisim.
Waswe, Iu Remember?
• Why nao hem stret for sei staka long olketa scientist no helpem pipol for givim glory long God?
• Wanem nao tufala wei wea olketa religion stopem pipol for givim glory long God?
• Hao nao iumi savve givim glory long God?
• Why nao iu shud askem iuseleva “Waswe, mi givim glory long Jehovah?”
[Box long page 12]
“Hu Nao God Saed Witim?”
Wanfala man long German Air Force long World War II bat wea bihaen hem kamap wanfala Jehovah’s Witness, hem sei olsem abaotem datfala taem:
“Samting wea mekem mi feel nogud tumas long olketa year wea war go ahed . . . hem for lukim olketa bigman from evri difren kaen religion—Catholic, Lutheran, Episcopal, and samfala moa—olketa blessim olketa war plane and crew bilong olketa bifor olketa go for dropim bomb. Planti taem mi ting raonem, ‘Hu nao God saed witim?’
“Olketa German soldia werem belt witim buckle wea garem raeting Gott mit uns (God stap witim mifala). Bat mi tingting, ‘Why nao God no stap witim olketa soldia long narasaed wea sem religion and wea prea long sem God?’”
[Piksa long page 10]
Olketa Jehovah’s Witness givim glory long God evriwea long earth