Fasin wea Man Nomoa Garem
Jodie garem bisnis wea sellim olketa samting bilong man wea dae finis. Hem gohed helpem wanfala woman for stretem and salem olketa samting bilong sista bilong woman hia wea dae. Taem Jodie lukluk raon long wanfala old ples for wakem fire, hem faendem tufala box for keepim olketa fishing laen and huk. Taem hem luk insaed wanfala long olketa box hia, hem sapraes tumas. Hem faendem wanfala pasol pepa wea selen nao insaed long hem. Full selen hia hem U.S.$82,000! Jodie seleva nomoa stap insaed disfala rum. Wanem nao bae hem duim? Tekem nomoa disfala box or talem woman hia hem faendem datfala selen?
PROBLEM wea kasem Jodie showimaot samting wea mekem iumi man difren from olketa animal. The World Book Encyclopedia sei: “Wanfala spesol fasin bilong iumi man hem wei for askem olketa kwestin abaotem wanem nao iumi shud duim or no duim.” Sapos wanfala dog wea hangre hem faendem wanfala haf meat, bae hem no tingting raonem sapos hem shud kaikaim datfala meat or nomoa. Bat, Jodie fit for ting raonem sapos samting hem disaedem hem stret or nomoa. Sapos hem keepim datfala selen, hem steal, bat no eniwan bae savve. And nara samting tu, disfala woman no savve selen hia stap. Planti pipol long community bilong Jodie bae tingse hem krangge sapos hem givim bak selen hia.
Wanem nao bae iu duim sapos iu nao Jodie? Ansa bilong iu bae depend long standard wea iu chus for followim.
Olketa Standard Bilong Samting wea Stret and Rong
For planti year, religion nao markem standard for pipol live followim saed long samting wea stret and rong. Bifor, planti community tinghae long Bible. Bat, distaem staka pipol evriwea long world gohed for rejectim olketa didifren standard wea religion markem. Pipol olsem sei man no fit for followim olketa standard hia. And tu, olketa sei Bible no fitim taem bilong iumi. So wanem nao changem diswan? Datfala buk Ethics in Business Life talem hao “kleva tingting bilong pipol hem . . . gud winim standard wea religion markem.” Planti pipol luk aotem help from olketa savveman and no from religion. Paul McNeill, wanfala professor long university long Sydney, Australia, wea studyim olketa standard and law, hem sei: “Olketa wea studyim standard for markem samting wea stret and rong duim waka olsem olketa priest for disaedem standard bilong community. . . . Distaem pipol disaedem seleva wanem hem stret and rong and no followim wanem religion talem.”
Taem iu need for disaedem wanfala hard samting, hao nao iu fit for luksavve sapos samting hem stret or rong? Waswe, olketa standard bilong iu followim God, or iuseleva nao disaed?