Hao Nao Iu Shud Disaed Sapos Samting Hem Stret Or Rong?

WAKA bilong hu nao for markem samting wea stret and rong? Datfala kwestin kamap taem firstfala man hem stap long earth. Olsem Bible buk bilong Genesis talem, God markem wanfala tree wea grow long garden bilong Eden olsem “tree bilong savve long gud and nogud samting.” (Genesis 2:9) God talem first man and woman for no kaikaim frut bilong disfala tree. Bat Satan, datfala enemy bilong God, talem hao sapos tufala kaikaim frut from disfala tree, bae eye bilong tufala “open” and tufala bae “kamap olsem God, long wei for savve long gud samting and nogud samting.”—Genesis 2:16, 17; 3:1, 5; Revelation 12:9.

Adam and Eve need for disaed, waswe, bae tufala acceptim olketa standard bilong God, or bilong tufala seleva? (Genesis 3:6) Tufala chus for no obeyim God and tufala kaikaim frut bilong datfala tree. Samting wea tufala duim showimaot wanem? Taem tufala nating willing for acceptim standard bilong God, tufala showimaot hao hem bae moabeta for tufala and olketa pikinini bilong tufala for markem seleva samting wea stret and rong. Waswe, man hem win taem hem trae for duim waka bilong God for markem olketa standard?

Olketa Difren Tingting

Encyclopædia Britannica story raonem olketa teaching bilong samfala savveman wea kamap insaed planti handred year wea go pas. Hem sei start from taem bilong savveman from Greece, Socrates, kam kasem taem bilong iumi “staka taem pipol story raonem wanem nao standard bilong samting wea stret and rong.”

Olsem example, olketa Sophist, wanfala important grup bilong olketa Greek teacher wea stap samting olsem 500 year bifor Christ, sei standard bilong samting wea stret and rong hem mas followim tingting bilong big haf long community. Wanfala long olketa teacher hia sei: “Sapos wanfala taon hem markem olketa samting wea hem tingse hem stret and pipol long datfala taon acceptim datwan, hem fitim datfala taon.” Sapos Jodie, wea iumi storyim long first article, hem followim diswan, bae hem keepim datfala selen, from klosap evriwan long community bilong hem or “taon,” bae duim sem samting.

Immanuel Kant, wanfala savveman wea stap samting olsem tu handred year bifor, garem difren tingting. Wanfala magasin Issues in Ethics sei: “Immanuel Kant witim samfala narawan olsem hem . . . tingim hao man garem right for chusim wanem nao fitim hemseleva.” Saed long teaching bilong Kant, Jodie savve keepim nomoa disfala selen sapos hem no spoelem right bilong narawan. Jodie shud no letem tingting bilong big haf long community for markem standard bilong hem.

So wanem nao Jodie duim? Hem no chusim tufala wei hia. Jodie followim teaching bilong Jesus Christ, wea olketa standard bilong hem nao olketa Christian and pipol wea no Christian tinghae long hem. Jesus sei: “Dastawe, evri samting wea iufala wantem olketa man for duim long iufala, iufala tu mas duim olsem long olketa.” (Matthew 7:12) Woman wea Jodie duim waka for hem barava sapraes taem Jodie givim bak U.S.$82,000. Taem olketa askem Jodie why nao hem no tekem, hem talem hao hem wanfala Jehovah’s Witness and hem sei: “Mi hard for keepim selen hia bikos hem no bilong mi.” Jodie barava obeyim toktok bilong Jesus insaed Bible long Matthew 19:18: “Iu mas no steal.”

Hem Stret for Trustim Tingting Bilong Big Haf Long Community?

Maet samfala pipol sei Jodie hem krangge from hem honest olsem. Bat hem nogud for trustim tingting bilong staka pipol. Olsem example, sapos iu stap bifor long ples wea staka pipol bilivim wei for sakrifaesim pikinini hem stret, waswe bae datwan mekem iu feel olsem hem stret samting for duim? (2 Kings 16:3) Tingim sapos iu born long ples wea pipol kaikaim man, waswe, datwan bae minim wei for kaikaim man hem stret nomoa? Wei wea planti pipol sapotim wanfala samting no minim datwan hem stret. From bifor kam yet, Bible warn againstim kaen tingting olsem, taem hem sei: “Iu mas no go witim olketa wea plan for duim nogud samting.”—Exodus 23:2.

Jesus Christ storyim narafala reason why iumi mas keakea long wei for followim tingting wea staka pipol garem saed long wanem hem stret and rong. Hem talem hao Satan nao “ruler bilong disfala world.” (John 14:30; Luke 4:6) Satan iusim disfala paoa bilong hem for trikim “olketa man long earth.” (Revelation 12:9) So, sapos iuseleva markem standard for samting wea stret and rong wea followim tingting bilong staka pipol, keakea nogud nao iu followim tingting bilong Satan. And datwan hem barava danger samting.

Waswe, Iu Savve Trustim Tingting Bilong Iuseleva?

So, waswe, fitim iumi man wanwan for disaed seleva wanem nao stret and rong? Bible sei: “No depend long savve bilong iuseleva.” (Proverbs 3:5) Why nao olsem? Bikos evri man garem wanfala samting wea savve spoelem wei wea olketa savve disaed gud. Taem Adam and Eve go againstim God, tufala followim olketa standard bilong Satan wea hem selfish and againstim God, and chusim hem olsem spiritual dadi. Then tufala pasim go long evri pikinini bilong tufala heart wea savve trikim man wea fit for luksavve long samting wea stret bat aftarem samting wea rong.—Genesis 6:5; Romans 5:12; 7:21-24.

Taem Encyclopædia Britannica storyim olketa standard saed long samting wea stret or rong, hem sei: “Hem no samting for sapraes long hem sapos pipol savve wanem nao hem stret for duim bat then olketa gohed duim samting followim wanem olketa laekem. Hem wanfala big problem for olketa kantri olsem America and Europe for talem kaen pipol olsem why olketa mas duim stret samting.” Bible talem stret olsem: “Heart hem savve trikim man winim eni nara samting and hem nating hol bak. Hu nao fit for savve long hem?” (Jeremiah 17:9) Waswe, bae iu trustim man wea hem savve trikim narawan and no hol bak?

Pipol wea no worshipim God tu savve duim samting wea stret and garem standard wea fit for nara pipol respectim. Bat, staka taem olketa nambawan principle wea pipol hia showimaot long standard bilong olketa, hem semsem olsem olketa standard saed long fasin wea stap insaed Bible. Maet pipol hia sei no eni God stap, bat tingting bilong olketa showimaot hao olketa fit for followim fasin bilong God. Diswan pruvim hao, olsem Bible talem, God wakem olketa man ‘long image bilong Hem.’ (Genesis 1:27; Acts 17:26-28) Aposol Paul sei: “Olketa seleva nao showimaot law hem stap insaed long heart bilong olketa.”—Romans 2:15.

Maet iumi savve long wanem hem stret, bat waswe, iumi garem strong wea fitim for iumi savve duim wanem hem stret? Hao nao man savve kasem strong for duim stret samting? From heart nao muvim man for duim samting, wei for mekem grow love for datwan wea givim kam Bible, Jehovah God, savve givim strong wea man needim saed long fasin for duim stret samting.—Psalm 25:4, 5.

Kasem Strong for Duim Gud Samting

First samting wea man mas duim for lane for lovem God, hem nao for luksavve hao olketa komandment bilong hem no ova tumas and savve helpem man. Aposol John sei: “Diswan nao wanem hem minim for lovem God, for iumi obeyim olketa komandment bilong hem; bat olketa komandment bilong hem no wanfala hevi.” (1 John 5:3) Olsem example, Bible savve helpem olketa young wan for luksavve long samting wea stret or rong taem olketa disaed sapos olketa shud drinkim alcohol, iusim drug, or duim sex bifor marit. Bible savve helpem olketa wea marit for stretem problem bilong olketa and hem savve helpem parents taem olketa trainim pikinini bilong olketa.a Evriwan wea followim olketa standard bilong Bible saed long fasin, savve kasem gud samting nomata hao nao laef bilong olketa, or wanem education or kastom olketa garem.

Olsem wei wea gudfala kaikai bae strongim iu for duim waka, wei for readim Bible bae strongim iu for followim olketa standard bilong God. Jesus sei toktok bilong God hem olsem bred wea givim man laef. (Matthew 4:4) Hem sei tu: “Kaikai bilong mi hem for duim will bilong datwan wea sendem mi kam.” (John 4:34) Wei for kaikaim spiritual kaikai from Bible helpem Jesus for no foldaon long olketa test and for disaedem samting long wise wei.—Luke 4:1-13.

Maet firstaem hem hard for iu kaikaim spiritual kaikai from Bible and for followim olketa standard bilong God. Bat ting go bak long taem iu smol, maet iu nating laekem teist bilong healthy kaikai. For grow strong, iu mas lane for enjoyim diskaen healthy kaikai. Long sem wei, maet firstaem iu no laek followim olketa standard bilong God. Sapos iu no givap, isisi bae iu lovem olketa and kamap strong long spiritual wei. (Psalm 34:8; 2 Timothy 3:15-17) Bae iu lane for trust long Jehovah and “duim gudfala samting.”—Psalm 37:3.

Maet bae samting wea kasem Jodie hem no kasem iu. Nomata olsem, evri day iu need for disaedem olketa samting wea maet hem smol or big. Dastawe Bible encouragem iumi: “Trust long Jehovah witim full heart bilong iu and no depend long savve bilong iuseleva. Long evri samting iu duim, lisin long hem, and hemseleva nao bae mekem olketa wei wea iu followim stret.” (Proverbs 3:5, 6) Sapos iu trust long Jehovah diswan bae helpem iu distaem and bae givim iu chance for laef olowe, bikos wei for obeyim Jehovah God lead go long laef.—Matthew 7:13, 14.

[Footnote]

[Blurb long page 6]

Maet Satan nao muvim tingting bilong big haf long community

[Olketa Piksa on page 5]

Start from bifor kam olketa savveman story raonem wanem nao stret and rong

SOCRATES

KANT

CONFUCIUS

[Credit Lines]

Kant: From the book The Historian’s History of the World; Socrates: From the book A General History for Colleges and High Schools; Confucius: Sung Kyun Kwan University, Seoul, Korea

[Olketa Piksa long page 7]

Bible helpem iumi for luksavve long samting wea stret and rong, and tu, hem muvim iumi for duim wanem hem stret