Wakabaot Witim God Long Disfala Taem Bilong Trabol

“Enoch gohed for wakabaot witim trufala God. Then hem nomoa nao, from God tekem hem.” —GENESIS 5:24.

1. Wanem nao samfala samting wea happen distaem wea showimaot hem taem bilong trabol?

TAEM bilong trabol! Toktok hia barava fitim olketa year wea nogud samting and raf fasin kamap big tumas, start kam long 1914, wea hem year wea Messiah Kingdom hem start for rul. Start long datfala taem, olketa man insaed long “olketa last day.” Olketa trabol olsem hangre, sik, earthquake, and war kamap big tumas winim enitaem bifor. (2 Timothy 3:1; Revelation 6:1-8) Olketa wea worshipim Jehovah tu kasem evri samting hia. Iumi evriwan mas deal witim hard samting and feeling for no sure long evri samting wea happen long world distaem. Hard taem saed long selen, gavman olobaot, criminal fasin, and sik mekem laef hard tumas.

2. Wanem hard samting nao olketa servant bilong Jehovah feisim?

² Nara samting tu, staka servant bilong Jehovah evritaem kasem barava strongfala persecution from Satan, wea hem gohed for faet againstim olketa “wea obeyim olketa komandment bilong God and wea garem waka for witness abaotem Jesus.” (Revelation 12:17) And nomata iumi evriwan no kasem barava strongfala persecution, evri tru Christian mas faet againstim Satan and olketa main tingting and fasin wea hem iusim for pullim olketa man. (Ephesians 2:2; 6:12) Man need for careful evritaem for no letem diswan affectim hem bikos pipol wea iumi waka witim, skul witim, and olketa narawan wea no interest long klin worship savve garem kaen tingting and fasin olsem.

Wakabaot Witim God, No Witim Olketa Nation

3, 4. Long wanem wei nao olketa Christian difren from world?

³ Long first century, olketa Christian tu duim best for againstim spirit bilong world, and diswan mekem olketa barava difren from pipol wea no stap insaed Christian kongregeson. Paul story abaotem diswan taem hem raet olsem: “Dastawe, mi talem diswan and givim witness long Lord, for iufala no gohed for wakabaot olsem pipol bilong olketa nation wea wakabaot followim nogud tingting bilong olketa, taem tingting bilong olketa stap long darkness, and olketa stap farawe from laef wea God markem for man, from krangge fasin bilong olketa, bikos heart bilong olketa no garem feeling. From olketa no garem eni stretfala tingting, olketa followim olobaot fasin for duim evrikaen fasin wea no klin witim greedy fasin.”—Ephesians 4:17-19.

⁴ Toktok hia storyim long kliafala wei bigfala darkness saed long spiritual and saed long fasin, wea pipol long taem bilong Paul and taem bilong iumi stap insaed! Olsem olketa Christian long first century, olketa Christian distaem no ‘gohed for wakabaot olsem pipol bilong olketa nation,’ bat, olketa enjoyim nambawan privilege for wakabaot witim God. Hem tru, samfala maet daotem sapos hem followim stretfala tingting for sei olketa man wea no perfect and man nating nomoa savve wakabaot witim Jehovah. Nomata olsem, Bible showimaot hao man savve duim datwan. And tu, Jehovah expectim olketa for duim datwan. Long mek-eit century B.C.E., profet Micah raetem toktok hia wea kam from God: “Only samting wea Jehovah askem bak from iu hem for showimaot justice and for lovem kaenfala fasin and for no ova tumas taem iu wakabaot witim God bilong iu.”—Micah 6:8.

Wakabaot Witim God Long Wanem Wei and Why?

5. Hao nao man wea no perfect savve wakabaot witim God?

⁵ Hao nao iumi savve wakabaot witim God wea iumi no savve lukim and wea garem bigfala paoa winim eni narawan? No long sem wei wea iumi wakabaot witim olketa man. Insaed Bible datfala toktok “for wakabaot” savve minim “for followim wanfala wei.”a Taem iumi tingim diswan, iumi luksavve hao man wea wakabaot witim God hem followim wanfala wei bilong laef wea God markem and wea mekem hem hapi. For followim kaen wei olsem hem mekem iumi difren from staka nara pipol. Nomata olsem, hem nomoa best samting for Christian chusim. Why nao olsem? Staka reason stap.

6, 7. Why nao wei for wakabaot witim God hem best wei for followim?

⁶ First samting, Jehovah hem Creator bilong iumi, Datwan wea givim laef long iumi and provaedem evri samting wea iumi needim for gohed laef. (Revelation 4:11) From datwan, hem nomoa garem right for talem iumi wei for wakabaot followim. And tu, for wakabaot witim God hem mekem iumi kasem gud samting winim eni nara wei. Jehovah provaedem wei for olketa wea wakabaot witim hem for savve kasem forgiveness for olketa sin bilong olketa and hem givim tu hope for laef olowe. Dadi bilong iumi long heven wea garem bigfala love provaedem tu wisefala kaonsel wea helpem olketa wea wakabaot witim hem for win long laef distaem, nomata olketa no perfect and stap insaed world wea Satan kontrolem. (John 3:16; 2 Timothy 3:15, 16; 1 John 1:8; 2:25; 5:19) Narafala reason for wakabaot witim God hem hao taem iumi willing for duim datwan, hem helpem peace and wan mind for gohed insaed long kongregeson.—Colossians 3:15, 16.

⁷ Last samting wea barava important, taem iumi wakabaot witim God, iumi showimaot hao iumi sapotim sovereign rul bilong hem, wea hem nao Satan kwestinim long garden bilong Eden. (Genesis 3:1-6) Laef bilong iumi showimaot hao iumi barava saedem Jehovah, and iumi no fraet for talemaot hao hem nomoa garem right for rul olsem Sovereign Ruler. (Psalm 83:18) Taem iumi duim datwan iumi duim samting followim prea wea iumi talem for evriwan mas ting long nem bilong God hem holy and for will bilong hem kamap. (Matthew 6:9, 10) Olketa wea chus for wakabaot witim God olketa barava wise! Olketa savve sure hao olketa followim stretfala wei, bikos Jehovah “nomoa wise.” No enitaem hem savve mistek.—Romans 16:27.

8. Long wanem wei nao world wea Enoch and Noah stap insaed hem klosap semsem olsem distaem?

⁸ Bat, hao nao iumi savve garem laef olsem Christian taem world hem barava nogud, and staka pipol no interest for servem Jehovah? Iumi kasem ansa taem iumi tingim example bilong olketa bifor wea gohed for faithful nomata olketa feisim barava hard taem. Tufala long olketa hem Enoch and Noah. Tufala evriwan stap long taem wea klosap semsem olsem distaem. Barava nogud fasin hem kamap big fogud. Long taem bilong Noah, earth hem fulap witim raf and dirty fasin. Nomata olsem, Enoch and Noah againstim wei bilong world long taem bilong olketa and tufala wakabaot witim Jehovah. Hao nao tufala fit for duim datwan? For ansarem datfala kwestin, bae iumi storyim example bilong Enoch long disfala article. Long next article bae iumi storyim Noah.

Enoch Wakabaot Witim God Long Taem Bilong Trabol

9. Wanem information nao iumi garem abaotem Enoch?

⁹ Enoch nao first man wea Bible storyim olsem man wea wakabaot witim God. Bible sei olsem: “Bihaen hem kamap dadi bilong Methuselah Enoch hem gohed for wakabaot witim tru God.” (Genesis 5:22) Then, bihaen Bible story abaotem hao long nao Enoch stap laef—wea nomata datwan hem long winim laef bilong iumi distaem, hem short nomoa for taem bilong Enoch—hem sei: “Enoch gohed for wakabaot witim trufala God. Then hem nomoa nao, from God tekem hem.” (Genesis 5:24) Luk olsem Jehovah mekem Enoch sleep long dae bifor olketa wea againstim hem savve spoelem hem. (Hebrews 11:5, 13) Tufala short verse hia story abaotem Enoch, and no staka nara ples long Bible moa story abaotem hem. Nomata olsem, information wea iumi garem and samfala nara samting hem givim iumi gudfala reason for sei taem wea Enoch laef hem taem bilong trabol.

10, 11. (a) Hao nao nogud fasin hem kamap big bihaen Adam and Eve disobey? (b) Wanem profesi nao Enoch hem talem, and masbi hao nao feeling bilong pipol taem olketa herem datwan?

¹⁰ Olsem example, tingim wei wea kwiktaem nomoa, pipol evriwea garem nogud fasin bihaen Adam hem sin. Bible talem iumi hao Cain, wea hem fasbon son bilong Adam kamap fasfala man for killim dae nara man taem hem killim dae brata bilong hem Abel. (Genesis 4:8-10) Bihaen Abel dae long barava raf wei olsem, Adam and Eve bornem nara son wea tufala nemem hem Seth. Bible sei olsem abaotem hem: “Seth tu garem wanfala son and hem kolem hem Enosh. Long datfala taem nao olketa startim datfala wei for singaot long nem bilong Jehovah.” (Genesis 4:25, 26) Sorre tumas, datfala wei for “singaot long nem bilong Jehovah” hem long apostate wei.b Plande year bihaen Enosh hem born, wanfala man wea born long laen bilong Cain wea nem bilong hem Lamech, hem raetem wanfala song for tufala waef bilong hem and talem hao hem killim dae wanfala young man wea mekem hem garekil. Lamech talem tu disfala warning: “Sapos man wea killim Cain bae kasem panis sevenfala taem, man wea killim Lamech bae kasem panis seventi-seven taem.”—Genesis 4:10, 19, 23, 24.

¹¹ Kaen information olsem showimaot hao nogud fasin wea Satan startim long garden bilong Eden hem kwiktaem for kasem evri pikinini bilong Adam. Long kaen world olsem, Enoch hem wanfala profet bilong Jehovah wea toktok bilong hem wea spirit bilong Jehovah muvim hem for raetem hem barava fitim distaem tu. Disaepol Jude hem talem profesi wea Enoch talem: “Lisin long mi! Jehovah hem kam witim staka thousand holy angel bilong hem, for judgem evriwan, and for panisim olketa wea no followim God bikos long evri nogud samting wea olketa duim wea no followim God, and bikos long olketa barava nogud toktok wea olketa sinner talem againstim hem.” (Jude 14, 15) Olketa toktok hia bae fulfill evribit long Armageddon. (Revelation 16:14, 16) Nomata olsem, iumi savve sure hao long taem bilong Enoch tu, staka long “olketa sinner” feel kros taem olketa herem profesi bilong Enoch. Dastawe Jehovah hem barava showimaot love taem hem tekem datfala profet mekem olketa no savve spoelem hem!

Wanem Nao Strongim Enoch for Wakabaot Witim God?

12. Wanem nao mekem Enoch difren from pipol wea stap long datfala taem?

¹² Long garden bilong Eden, Adam and Eve lisin long Satan, and Adam go againstim Jehovah. (Genesis 3:1-6) Son bilong tufala Abel hem followim difren wei, and Jehovah appruvim hem. (Genesis 4:3, 4) Sorre tumas, staka long olketa pikinini bilong Adam no olsem Abel. Nomata olsem, Enoch, wea born staka handred year bihaen, hem olsem Abel. Wanem nao mekem Enoch hem difren from plande narawan wea kam from laen bilong Adam? Aposol Paul hem ansarem datfala kwestin taem hem raet olsem: “Thru long faith God tekem Enoch from laef go long dae, and olketa no savve faendem hem eniwea bikos God tekem hem from laef go long dae; from bifor God duim datwan, God showim hem hao hem hapi long hem.” (Hebrews 11:5) Enoch hem part bilong wanfala big “sekson bilong olketa witness” bifor wea showimaot nambawan example saed long faith. (Hebrews 12:1) Faith nao mekem Enoch fit for gohed strong for duim stret samting insaed winim 300 year wea hem laef, wea datwan barava long winim laef bilong iumi distaem!

13. Wanem kaen faith nao Enoch hem garem?

¹³ Paul story abaotem faith bilong Enoch and olketa nara witness taem hem raet olsem: “Faith hem wei wea man sure bae hem kasem samting wea hem hope for hem, and hem kliafala pruv bilong really samting nomata hem no lukim yet.” (Hebrews 11:1) Tru nao, faith hem wei wea man barava sure olketa samting wea hem hope for hem bae kamap bikos long kliafala pruv wea showimaot datwan. From wei for feel sure olsem hem strong tumas, datwan affectim wanem iumi markem olsem important long laef bilong iumi. Kaen faith olsem nao mekem Enoch fit for wakabaot witim God nomata pipol long taem bilong hem no duim datwan.

14. Maet wanem stretfala savve nao kamap faondeson for faith bilong Enoch?

¹⁴ Trufala faith hem garem faondeson long stretfala savve. Wanem savve nao Enoch hem garem? (Romans 10:14, 17; 1 Timothy 2:4) For sure hem savve abaotem olketa samting wea happen long Eden. Maet hem herem story tu abaotem laef insaed garden bilong Eden—wea long datfala taem maet hem stap yet bat olketa man tambu for go insaed. (Genesis 3:23, 24) And hem savve long plan bilong God for olketa pikinini bilong Adam fulimap earth and mekem hem kamap olsem datfala Paradaes long garden bilong Eden. (Genesis 1:28) And tu, Enoch masbi tinghae tumas long promis bilong Jehovah for mekem kamap wanfala Seed wea bae smasem hed bilong Satan and finisim evri nogud samting wea kamaot from laea bilong Satan. (Genesis 3:15) Tru nao, profesi wea spirit bilong Jehovah muvim Enoch for raetem, wea stap insaed buk bilong Jude, hem abaotem wei wea seed bilong Satan bae distroe. From Enoch garem faith, iumi savve hem worshipim Jehovah wea hem datwan wea “givim reward long olketa wea barava luk aotem hem.” (Hebrews 11:6) Dastawe, nomata Enoch no garem savve wea iumi garem distaem, hem garem inaf savve for buildim faondeson bilong faith wea strong. Kaen faith olsem mekem hem gohed faithful long olketa taem bilong trabol.

Followim Example Bilong Enoch

15, 16. Hao nao iumi savve followim samting wea Enoch duim?

¹⁵ From iumi semsem witim Enoch long wei wea iumi laek for mekem Jehovah hapi long taem bilong trabol distaem, iumi shud followim example bilong Enoch. Iumi need for kasem and keepim stretfala savve abaotem Jehovah and plan bilong hem. Bat iumi need for duim moa samting. Iumi need for mekem datfala stretfala savve hem leadim iumi long evri samting. (Psalm 119:101; 2 Peter 1:19) Iumi need for letem tingting bilong God leadim iumi, and evritaem traem best for evri tingting bilong iumi and samting iumi duim for mekem hem hapi.

¹⁶ No eni nara information stap saed long eniwan moa wea servem Jehovah long taem bilong Enoch, so maet hemseleva nomoa duim datwan or maet hem member bilong wanfala smol sekson. Iumi tu wanfala smol sekson long world, bat datwan no mekem iumi wikdaon. Jehovah bae sapotim iumi nomata hu nao maet againstim iumi. (Romans 8:31) Enoch hem no fraet for talem warning hao pipol wea no followim God bae finis evribit. Iumi tu no fraet taem iumi “preachim disfala gud nius bilong kingdom” nomata pipol mekfani, againstim, and persecutim iumi. (Matthew 24:14) Enoch no laef longtaem olsem staka nara pipol long taem bilong hem. Nomata olsem, hem no hope long world bilong datfala taem. Hem hope long samting wea barava moabeta. (Hebrews 11:10, 35) Iumi tu garem strongfala hope long wei wea Jehovah bae fulfillim plan bilong hem. Dastawe iumi no mekius long world evribit. (1 Corinthians 7:31) Main samting wea iumi iusim strong and samting iumi garem for hem, hem nao for servem Jehovah.

17. Wanem savve nao iumi garem wea Enoch no garem, so wanem nao iumi shud duim?

¹⁷ Enoch hem garem faith hao datfala Seed wea God promisim bae showaot long taem wea Jehovah markem. Distaem hem klosap 2,000 year bihaen taem wea datfala Seed—Jesus Christ—hem showaot, givim ransom, and openem wei for iumi, and tu, staka faithful witness bifor olsem Enoch, for kasem laef olowe. Datfala Seed, wea distaem hem rul olsem King insaed Kingdom Bilong God, hem aotem Satan from heven finis and torowem hem kam daon long earth, and iumi savve lukim trabol wea kamaot from datwan long evri ples. (Revelation 12:12) Tru nao, savve wea iumi kasem distaem hem winim wanem Enoch kasem. So, iumi mas garem strongfala faith olsem hem. Wei wea iumi sure olketa promis bilong God bae fulfill shud affectim evri samting wea iumi duim. Olsem Enoch, iumi tu mas wakabaot witim God nomata iumi stap long taem bilong trabol.

[Olketa Footnote]

Hao Nao Bae Iu Ansa?

• For wakabaot witim God hem minim wanem?

• Why nao wei for wakabaot witim God hem best samting for duim?

• Wanem nao mekem Enoch fit for wakabaot witim God nomata long taem bilong trabol?

• Hao nao iumi savve followim Enoch?

[Piksa long page 15]

From hem garem faith, “Enoch gohed for wakabaot witim trufala God”

[Piksa long page 17]

Iumi biliv strong hao olketa promis bilong Jehovah bae kamap tru

[Olketa Piksa Credit Line long page 13]

Woman, far right: FAO photo/B. Imevbore; collapsing building: San Hong R-C Picture Company