Enoch Wakabaot Witim God Insaed Wanfala World wea No Followim God

DEVIL sei hem savve tanem evri man awe from God, and samfala taem hem luk olsem hem gogo for win. For klosap faev handred year bihaen Abel dae, no eniwan showim hemseleva olsem faithful servant bilong Jehovah. Tru nao, wei bilong sin and wei for no followim God kamap part bilong evriday living.

Enoch laef insaed datfala taem wea no garem eni spiritual samting. Olketa date long Bible showimaot taem wea hem born hem 3404 B.C.E. Long wei wea difren from pipol raonem hem, Enoch hem man wea God acceptim. Aposol Paul nemem hem midolwan olketa servant bilong Jehovah wea faith bilong olketa hem olsem wanfala example for olketa Christian. Hu nao Enoch? Olketa wanem kaen challenge nao hem feisim? Hao nao hem winim olketa? And faithful fasin bilong hem minim wanem for iumi?

Long olketa day bilong Enosh, klosap foa handred year bifor taem bilong Enoch, “olketa start for singaot long nem bilong Jehovah.” (Genesis 4:26) From start bilong history bilong man olketa iusim nem bilong God. Dastawe, wei for singaot long nem bilong Jehovah long taem bilong Enosh luk olsem hem no minim wei for kol long nem bilong hem witim faith and klin worship. Samfala Hebrew savveman tingse Genesis 4:26 shud talem toktok olsem “olketa start for tokspoelem” or “datfala taem wea wei for tokspoelem start.” Olketa man maet start for kolem nem Jehovah long olketa seleva or long narafala man wea olketa giaman for worshipim God thru long hem. Or maet olketa iusim nem bilong hem for olketa idol.

‘Enoch Wakabaot Witim Trufala God’

Nomata fasin for no followim God stap raonem Enoch, hem “go ahed for wakabaot witim trufala God,” Jehovah. Olketa no storyim sapos olketa laen dadi bilong hem—Seth, Enosh, Kenan, Mahalalel, and Jared—wakabaot witim God. Luk olsem olketa no wakabaot long sem wei olsem Enoch, wea wei bilong laef bilong hem mekem hem difren from olketa.—Genesis 5:3-27.

For wakabaot witim Jehovah minim for savve gud and barava klos witim God and diswan savve kamap only bikos Enoch live followim will bilong God. Jehovah appruvim worship bilong Enoch. Tru nao, Greek Septuagint hem sei hao God hem “barava hapi long Enoch,” and aposol Paul tu talemaot disfala tingting.—Genesis 5:22, footnote; Hebrews 11:5.

Main samting long wei wea Enoch fren gud witim Jehovah hem faith bilong hem. Hem garem faith long datfala promis “seed” bilong “woman” bilong God. Sapos hem savve long Adam, hem maet kasem samfala information abaotem hao God deal witim first man and woman long Eden. Savve wea hem garem abaotem God mekem Enoch kaen man wea “barava lukaotem hem.”—Genesis 3:15; Hebrews 11:6, 13.

For Enoch and iumi tu, wei for fren gud witim Jehovah needim moa samting winim wei for savve long God nomoa. Sapos wei for barava klos long samwan hem important long iumi, waswe, hem no tru hao tingting and samting iumi duim bae followim tingting bilong hem? Iumi stap klia long toktok and samting iumi duim wea savve spoelem wei for fren witim hem. And sapos iumi ting for changem samfala samting long living bilong iumi, waswe, bae iumi no tingim tu hao diswan bae affectim wei wea iumi fren witim hem?

Long sem wei tu, feeling for keepim wei for fren klos witim God savve affectim samting wea iumi duim. Wanfala important need hem stretfala savve abaotem olketa samting wea hem appruvim and no appruvim. Then iumi need for letem disfala savve leadim iumi, taem iumi trae hard for mekem hem hapi long tingting and samting wea iumi duim.

Tru nao, for wakabaot witim God, iumi mas mekem hem hapi. Hem nao wanem Enoch duim for planti handred year. For tok stret, disfala Hebrew word wea olketa iusim for showim hao Enoch “wakabaot” witim God hem minim for evritaem, olowe duim samting. Wanfala nara faithful man wea ‘wakabaot witim God’ hem Noah.—Genesis 6:9.

Enoch hem man wea garem famili, hem garem waef and “olketa son and dota.” Wanfala son bilong hem nao Methuselah. (Genesis 5:21, 22) Iumi no daotem hao Enoch mas barava duim best bilong hem for lukaftarem famili bilong hem long gudfala wei. From fasin for no followim God stap raonem hem, hem no faendem isi for servem God. Luk olsem Lamech, dadi bilong Noah, hem nomoa man wea stap semtaem witim Enoch wea showimaot faith long Jehovah. (Genesis 5:28, 29) Nomata olsem, witim fasin for no fraet Enoch go ahed long tru worship.

Wanem nao helpem Enoch for stap faithful long God? For sure, hem nating kaban witim olketa wea spoelem nem bilong Jehovah or olketa wea no fit for olketa worshiper bilong God for fren witim. Wei for lukaotem help bilong Jehovah thru long prea hem mas strongim tu wei wea Enoch disaed strong for stap klia long eni samting wea savve mekem Creator bilong hem no hapi.

Profesi Againstim Olketa wea No Followim God

For keepim olketa hae mark hem barava hard taem iumi stap midolwan pipol wea no followim God. Bat Enoch talem tu wanfala message bilong judgment wea no savve change againstim wicked pipol. Spirit bilong God leadim hem taem hem talemaot disfala profesi toktok: “Lukim! Jehovah hem kam witim staka thousand holy angel bilong hem, for judgem evriwan, and for panisim olketa wea no followim God for evri nogud samting wea olketa duim wea no followim God, and abaotem olketa barava nogud toktok wea olketa sinner talem againstim hem.”—Jude 14, 15.

Hao nao bae datfala message affectim olketa wea garem nogud fasin and wea no biliv? Hem fitim nomoa for tingim hao olketa toktok olsem for sutim man bae mekem olketa les long Enoch, maet mekem olketa for mekfani long hem, tok spoelem hem and sei for duim samting long hem. Samfala maet laek for killim hem dae. Nomata olsem Enoch nating fraet. Hem savve wanem nao happen long raeteous man Abel, and olsem hem, Enoch disaed strong for servem God, nomata wanem nao bae happen.

“God Tekem Hem”

Luk olsem laef bilong Enoch stap long danger long datfala taem dastawe “God tekem hem.” (Genesis 5:24) Jehovah no letem olketa rabis enemy for mekem faithful servant bilong hem safa. Olsem aposol Paul talem, “God tekem Enoch mekem hem no lukim dae.” (Hebrews 11:5) Staka sei Enoch nating dae—God tekem hem go long heven, wea hem go ahed for laef. Bat, Jesus talem klia: “No eni man hem go ap long heven bat man wea hem kamdaon from heven, Son bilong man.” Jesus nao “firstaem” long evri wan wea go ap long heven.—John 3:13; Hebrews 6:19, 20.

So, wanem nao happen long Enoch? Wei wea “God tekem Enoch mekem hem no lukim dae” maet minim God mekem hem sleep and lukim wanfala profesi vision, then taem hem still insaed diskaen wei for sleep God finisim laef bilong hem. Long kaen taem olsem, Enoch nating feelim dae. Then “olketa no savve faendem hem eniwea,” from luk olsem Jehovah haedem body bilong hem, olsem hao hem haedem body bilong Moses.—Deuteronomy 34:5, 6.

Enoch laef for 365 year—hem nating longtaem olsem olketa wea laef long datfala taem. Bat important samting long olketa wea lovem Jehovah, hem nao for servem hem long faithful wei go kasem end bilong laef bilong olketa. Iumi savve Enoch duim datwan from “bifor God tekem hem, hem kasem witness hao God hapi long hem.” Olketa Scripture no showim iumi hao Jehovah talem diswan long Enoch. Nomata olsem, bifor Enoch dae, hem kasem promis hao God appruvim hem, and iumi savve sure hao Jehovah bae rememberim hem long resurrection.

Followim Faith Bilong Enoch

Iumi savve fit for followim faith bilong olketa man wea followim God. (Hebrews 13:7) Thru long faith Enoch serve olsem first faithful profet bilong God. World long taem bilong Enoch hem olsem long taem bilong iumi—raf, no klin, and no followim God. Nomata olsem Enoch hem difren. Hem garem tru faith and hem nambawan example long wei for lovem God. Tru nao, Jehovah givim hem wanfala important message bilong judgment for talemaot, and tu hem strongim hem for go talemaot. Witim fasin for no fraet Enoch go ahed long assignment bilong hem, and God lukaftarem hem nomata olketa enemy againstim hem.

Sapos iumi showimaot faith olsem Enoch duim, Jehovah bae strongim iumi for talemaot message bilong hem insaed olketa last day. Hem bae helpem iumi for feisim wei wea olketa againstim iumi witim fasin for no fraet, and love bilong iumi for God bae mekem iumi difren from olketa wea no followim God. Faith savve mekem iumi wakabaot witim God and duim samting wea bae mekem heart bilong hem hapi. (Proverbs 27:11) Long faith, raeteous Enoch hem win for wakabaot witim Jehovah insaed wanfala world wea no followim God, and iumi tu savve olsem.

[Box long page 30]

Waswe Bible Garem Toktok From Buk Bilong Enoch?

Buk bilong Enoch hem wanfala buk wea no stap long Bible and olketa no savve hu nao raetem. Olketa giaman for sei Enoch nao raetem. Luk olsem olketa raetem midolwan long first and mek-tu century B.C.E., hem olketa kastom story bilong olketa Jew wea olketa ova tumas and no followim history, luk olsem hem kamap from wei for explainim moa olketa toktok long Genesis wea story abaotem Enoch. From diswan, olketa wea lovem Word bilong God no ting long buk bilong Enoch olsem samting wea fit for ting raonem.

Long Bible, buk bilong Jude nomoa garem profesi toktok bilong Enoch: “Lukim! Jehovah hem kam witim staka thousand holy angel bilong hem, for judgem evriwan, and for panisim olketa wea no followim God for evri nogud samting wea olketa duim wea no followim God, and abaotem olketa barava nogud toktok wea olketa sinner talem againstim hem.” (Jude 14, 15) Planti savveman sei profesi bilong Enoch againstim olketa wea no followim God wea stap long datfala taem, hem toktok wea kam from buk bilong Enoch. Waswe, hem stret for tingim Jude iusim buk wea no fit for trustim, wea no stap insaed Bible for hem raet followim?

Olketa Scripture no talem hao nao Jude savve long profesi bilong Enoch. Hem maet talem toktok from wanfala biliv wea fit for man trustim wea olketa pasim kamdaon from bifor kam. Luk olsem Paul duim klosap sem samting taem hem iusim nem Jannes and Jambres for olketa magic man wea stap long haos bilong Pharaoh wea againstim Moses, from pipol no savve long olketa nem hia. Sapos man wea raetem buk bilong Enoch hem savve kasem information olsem, waswe hem no fitim for Jude tu kasem?a—Exodus 7:11, 22; 2 Timothy 3:8.

Hao Jude kasem information abaotem message bilong Enoch for olketa pipol wea no followim God, hem no important. Samting wea mekem iumi fit for trustim nao hem wei wea Jude hem raet anda long paoa bilong God. (2 Timothy 3:16) Holy spirit bilong God stopem hem for no talem eni samting wea no tru.

[Footnote]

[Piksa long page 31]

Enoch no fraet for talemaot message bilong Jehovah