Waswe, Eniwan Savve Barava Changem Disfala World?
“Poor pipol talem mifala hao, winim eni samting, olketa laek for garem peace and sef living—and mek-tu samting olketa laekem, hem chance for mekem laef bilong olketa kamap moabeta. Olketa laekem evri kantri long world for garem olketa law wea followim justice for stopem olketa rich kantri and bisnis for spoelem samting olketa trae for duim.”
HEM nao toktok bilong director bilong wanfala organization wea provaedem relief raonem world, taem hem storyim olketa hope and goal bilong poor pipol. For tok stret, hem storyim samting wea pipol evriwea long world wea safa and kasem hard taem, olketa laekem. Evriwan long olketa hia laekem wanfala world wea garem trufala peace and sef living. Waswe, bae enitaem iumi kasem datwan? Waswe, eniwan fit and garem paoa and savve for changem disfala world wea no followim justice?
Samting Olketa Duim for Changem Datwan
Plande pipol trae finis. Olsem example, long mek-19 century, wanfala woman from England, Florence Nightingale, iusim full laef bilong hem for changem waka bilong olketa nurse mekem olketa followim standard saed long wei for klin, and for lukaftarem pipol wea sik long kaenfala wei. Long taem bilong hem, olketa no garem medicine wea killim dae germ and stopem infection, and olketa no lukaftarem olketa sik man long wei wea iumi expectim olketa hospital for duim distaem. Wanfala buk hem sei: “Olketa nurse no kasem education, no klin, and garem nogud nem olsem pipol wea drunk and duim dirty fasin.” Waswe, Florence Nightingale win long olketa change wea hem trae for mekem saed long waka bilong olketa nurse? Ia. Olsem tu, staka nara pipol wea no selfish and wea garem fasin for kea duim plande big samting for changem laef bilong pipol saed long wei for teachim pipol for read and raet, education, medicine, for mek sure pipol garem haos, olketa program for feedim pipol, and plande nara samting. Evri samting hia mekem laef bilong plande million pipol kamap moabeta.
Nomata olsem, iumi mas feisim hao staka nogud samting gohed: Plande million pipol safa distaem from war, criminal fasin, sik, bigfala hangre, and plande nara nogud samting. Wanfala aid organization from Ireland wea olketa kolem Concern, hem sei: “Poor living hem killim dae 30,000 pipol evri day.” Nomata wei for slave, wea plande pipol trae for stopem for plande handred year, hem still gohed distaem. Datfala buk Disposable People—New Slavery in the Global Economy hem sei: “Namba bilong olketa slave long world distaem hem moa big winim full namba bilong olketa slave from Africa bifor.”
Wanem nao blokem wei wea pipol trae hard for changem for olowe disfala world? Waswe, diswan hem from pipol wea rich and garem paoa olketa strong tumas, or waswe, moa samting hem insaed long diswan?
Samting wea Blokem Change
Word bilong God talem hao main samting wea blokem waka bilong olketa man for mekem disfala world duim samting followim justice hem Satan. Aposol John talem iumi hao “full world hem stap anda long paoa bilong wicked wan.” (1 John 5:19) Nomata distaem, Satan hem “leadim rong olketa man long earth.” (Revelation 12:9) Bae pipol safa from wicked samting and samting wea no followim justice go kasem taem wea Satan lusim paoa bilong hem. Wanem nao mekem disfala sorre samting kamap firstaem?
God givim long first parents bilong iumi, Adam and Eve, wanfala earth wea fit for kamap wanfala perfect paradaes hom for full famili bilong olketa man—wanfala world wea hem “gud tumas.” (Genesis 1:31) Wanem nao spoelem datwan? Satan. Hem kwestinim right bilong God for putim olketa rul wea olketa man and woman shud live followim. From samting hem talem, hem givim idea hao wei bilong God for rul hem no followim justice. Hem switim Adam and Eve for chus for independent from God, mekem olketa seleva savve disaedem samting wea gud and nogud. (Genesis 3:1-6) Diswan kamap mek-tu samting wea blokem olketa man for mekem wanfala world wea followim justice—sin and wei for no perfect.—Romans 5:12.
Why Nao God Letem Datwan Gohed?
Maet samfala ask: ‘Bat why nao God letem sin and wei for no perfect spoelem olketa man? Why nao hem no iusim bigfala paoa bilong hem for finisim olketa hia wea bighed and start moa?’ Datwan here olsem simpol ansa nomoa. Bat, samfala important kwestin kamap saed long wei for iusim paoa. Wanfala main samting wea pipol wea poor and wea nara pipol spoelem olketa komplen abaotem, hem hao samfala iusim paoa long rong wei. Waswe, iu agree hao olketa daot kamap long mind bilong pipol wea garem gudfala heart taem wanfala raf ruler iusim paoa for aotem eniwan wea no agree witim hem?
For helpem olketa wea garem honest heart for luksavve hao Hem no wanfala raf ruler wea iusim paoa long rong wei, God disaed for letem Satan and olketa bighed man for independent from olketa law and principle bilong hem—for shortfala taem nomoa. Taem wea go pas bae pruvim hao rul bilong God nomoa hem stret. Bae hem showimaot klia hao eni spialaen wea hem markem for iumi, hem for helpem iumi nomoa. Tru nao, olketa sorre samting wea kamaot from wei for againstim rul bilong God pruvim finis hao olketa law bilong hem protectim iumi. And hem pruvim tu hao hem stret evribit for God iusim bigfala paoa bilong hem for finisim evri wicked fasin long taem wea hem chus for duim datwan. Datfala taem hem barava klosap nao.—Genesis 18:23-32; Deuteronomy 32:4; Psalm 37:9, 10, 38.
Go kasem datfala taem, iumi stap long wanfala world wea no eni justice and iumi “gohed for krae tugeta and feel pain tugeta.” (Romans 8:22) Nomata wanem samting iumi duim for changem disfala world, iumi no savve aotem Satan, and iumi no savve aotem wei wea iumi no perfect wea hem nao mekem iumi safa. Iumi barava no garem paoa for stretem nogud samting wea kamaot from sin wea iumi kasem from Adam.—Psalm 49:7-9.
Jesus Christ Bae Changem World for Olowe
Waswe, diswan minim no eni hope for disfala world hem change? Nomoa. God markem samwan wea garem moa paoa winim olketa man for changem disfala world for olowe. Hu nao datwan? Hem Jesus Christ. Bible storyim hem olsem Main Wan wea God markem for sevem olketa man.—Acts 5:31.
Distaem Jesus hem weit for datfala taem wea God markem finis, for hem duim samting. (Revelation 11:18) Wanem nao bae hem duim? Hem bae “mekem evri samting wea God talem thru long mouth bilong olketa holy profet bilong hem from taem bifor for gud bak moa.” (Acts 3:21) Olsem example, Jesus bae “sevem poor wan wea singaot for help, and tu, man wea safa and eniwan wea no garem samwan for helpem olketa. . . . Hem bae sevem soul bilong olketa from hardfala living and raf fasin.” (Psalm 72:12-16) Thru long Jesus Christ, God promis for “finisim olketa war go kasem evriwea long earth.” (Psalm 46:9) Hem promis olsem: “No eniwan [wea stap long klin earth bilong hem] bae sei: ‘Mi sik.’ ” Olketa wea blind, earpas, and olketa wea cripple—evriwan wea sik spoelem olketa—bae kasem bak perfect health. (Isaiah 33:24; 35:5, 6; Revelation 21:3, 4) Nomata olketa wea dae finis bae kasem gud samting. Hem promis for mekem olketa wea dae from samting wea no followim justice and hardfala living for laef bak moa.—John 5:28, 29.
Jesus Christ bae no mekem samfala change for lelebet taem nomoa. Bae hem finisim for olowe evri samting wea savve blokem disfala world for followim justice. Hem bae aotem sin and wei for no perfect and bae hem finisim Satan and evriwan wea followim bighed wei bilong hem. (Revelation 19:19, 20; 20:1-3, 10) Olketa nogud samting and wei for safa wea God letem olketa man for kasem for lelebet taem nomoa, “bae no kamap mek-tu taem.” (Nahum 1:9) Hem nao mining bilong teaching bilong Jesus taem hem talem iumi for prea for Kingdom bilong God for kam and for will bilong God “kamap long earth, olsem long heven.”—Matthew 6:10.
Maet iu sei, ‘Bat Jesus hem sei “poor pipol bae stap witim iumi for olowe.” Datwan mas minim wei for no followim justice and poor living bae stap for olowe.’ (Matthew 26:11) Hem tru, Jesus talem hao pipol wea poor bae stap olowe witim iumi. Bat, olketa verse wea stap raonem samting wea hem talem hia, and tu, olketa promis insaed long Bible, showim iumi hao poor pipol bae stap go kasem taem disfala world hem finis. Jesus savve hao no eni man long earth fit for finisim poor living and wei for no followim justice. Hem savve tu hao hem nao bae changem evri samting hia. Klosap nao hem bae mekem wanfala niu world kamap—wanfala “niu skae and niu earth” wea pain, sik, poor living, and dae bae nomoa nao.—2 Peter 3:13; Revelation 21:1.
“No Forget for Duim Gudfala Samting”
Waswe, diswan minim hem iusles nomoa for iumi duim samting for helpem nara pipol? Nomoa nao. Bible talem hao iumi shud helpem olketa narawan wea safa or feisim hard taem. King Solomon hem sei: “Sapos iu savve duim, duim gud samting for olketa wea fit for kasem datwan.” (Proverbs 3:27) Aposol Paul encouragem iumi for “no forget for duim gudfala samting and sharem samting witim pipol.”—Hebrews 13:16.
Jesus Christ tu encouragem iumi for duim eni samting iumi fit for duim for helpem nara pipol. Hem talem tokpiksa abaotem wanfala Samaritan man wea lukim wanfala man wea samwan killim hem and steal from hem. Jesus sei from datfala Samaritan man “barava feel sorre,” hem iusim selen bilong hemseleva for bandagem olketa kill bilong datfala man and for helpem hem kamap gud moa. (Luke 10:29-37) Datfala kaenfala Samaritan no changem world, bat hem barava changem laef bilong wanfala man. Iumi savve duim sem samting.
Bat, Jesus Christ savve duim moa samting winim wei for helpem olketa man wanwan. Hem savve barava changem world, and klosap nao bae hem duim datwan. Taem hem duim datwan, pipol distaem wea safa bae garem laef wea barava moabeta and bae garem trufala peace and sef living.—Psalm 4:8; 37:10, 11.
Taem iumi weitim datwan, iumi mas no hol bak for duim eni samting iumi fit for duim, long spiritual and material wei, for “duim gud samting” long evriwan wea safa long disfala world wea no followim justice.—Galatians 6:10.
[Piksa long page 5]
Florence Nightingale mekem samfala big change saed long waka bilong olketa nurse
[Credit Line]
Courtesy National Library of Medicine
[Piksa long page 7]
Olketa follower bilong Christ duim gud samting long nara pipol
[Piksa Credit Line long page 4]
The Star, Johannesburg, S.A.