World wea No Garem Eni Justice
WASWE, iu agree hao iumi stap long world wea no garem eni justice? For sure iu agree. Iumi luksavve hao nomata wanem iumi fit for duim and nomata sapos iumi planim future long wisefala wei, datwan no minim iumi bae kamap rich or win long samting iumi duim and maet iumi no garem kaikai tu. Plande taem laef hem olsem samting wea King Solomon talem: ‘Olketa wea wise no garem kaikai, and olketa wea minim samting no kamap rich, and olketa wea garem savve no kasem favor.’ Why nao olsem? Solomon gohed for sei: “Taem and samting wea iumi no expectim hem kasem evriwan.”—Ecclesiastes 9:11.
“Taem Hard Taem Seknomoa Kasem Iumi”
Tru nao, “taem and samting wea iumi no expectim” plande taem savve spoelem nomata gudfala plan bilong iumi and samting wea iumi hope for hem. Solomon talem hao iumi “olsem olketa fish wea pas long wanfala net, olsem bird insaed long trap, . . . taem hard taem seknomoa kasem iumi.” (Ecclesiastes 9:12, NE) Olsem example, plande million pipol barava waka hard for wakem garden for kasem kaikai for famili bilong olketa, bat taem bigfala drae season spoelem garden, olketa seknomoa kasem “hard taem.”
Nara pipol trae for helpem olketa, bat plande taem luk olsem help wea world givim long pipol wea kasem “hard taem” hem nating followim justice. Olsem example, long wanfala year no longtaem go nomoa, wanfala relief organization talem hao “selen wea world markem for Gulf war hem faev taems moa big winim selen wea olketa markem for evri kantri [long Africa]” for helpem pipol wea safa from bigfala hangre. Waswe, hem followim justice for olketa kantri wea garem selen for spendem faev taems moa selen for faetem war long wanfala kantri, winim selen olketa spendem for helpem pipol wea safa from bigfala hangre long full Africa? And waswe, hem followim justice for plande pipol garem staka samting bat 1-fala long evri 4-fala man long world olketa barava poor evribit, and plande million pikinini dae evri year from olketa sik wea isi for stopem? Barava nomoa nao!
Hem tru, hem no just “taem and samting wea iumi no expectim” wea mekem “hard taem seknomoa kasem iumi.” Olketa nogud samting wea iumi no savve kontrolem hem garem paoa ovarem laef bilong iumi and samting wea kasem iumi. Datwan hem barava tru long Beslan, Alania, long autumn season bilong 2004, taem plande handred pipol, wea plande nao olketa smol pikinini wea attendim first day long skul, olketa dae long wanfala faet midolwan olketa terrorist and police. Tru, no eniwan markem hu nao bae laef and hu nao bae dae—bat main samting wea kosim datfala “hard taem” hem raoa midolwan olketa man.
Waswe, Bae World Gohed Olsem for Olowe?
Taem samfala pipol story abaotem olketa samting wea no followim justice, olketa sei: “Laef olsem nao. Hem olsem from bifor kam and bae hem gohed olsem.” Long tingting bilong olketa, pipol wea strong bae evritaem spoelem olketa wea wik, and olketa wea rich bae evritaem spoelem olketa wea poor. Olketa sei datwan witim “taem and samting wea iumi no expectim” bae gohed for olowe.
Waswe, laef mas olsem nao? Waswe, bae enitaem pipol wea iusim gud savve bilong olketa kasem reward wea followim justice for evri hard waka bilong olketa? Waswe, eniwan fit for duim samting wea savve changem for olowe disfala world wea no followim justice? Lukluk long samting wea nextfala article talem abaotem disfala subject.
[Picture Credit Line long page 2]
COVER: Man with a child: UN PHOTO 148426/McCurry/Stockbower
[Piksa Credit Line long page 3]
MAXIM MARMUR/AFP/Getty Images