Kwestin From Reader
Waswe, wanfala Christian savve keepim gudfala conscience sapos hem duim waka wea hem mas karem gun?
Evri Jehovah’s Witness barava ting strong long assignment wea olketa kasem from God for provaed for famili. (1 Timothy 5:8) Bat hem klia hao samfala waka hem againstim olketa Bible principle and man shud no duim kaen waka olsem. Hem nao kaen waka wea join witim wei for gambol, iusim blood long rongfala wei, and encouragem wei for iusim tobacco. (Isaiah 65:11; Acts 15:29; 2 Corinthians 7:1; Colossians 3:5) Saed long samfala nara waka, nomata Bible no barava tambuim datwan, maet kaen waka olsem savve spoelem conscience bilong man seleva and olketa narawan.
For duim waka wea man mas karem gun or nara weapon, hem disison bilong man wanwan. Bat kaen waka olsem maet savve mekem man guilty for killim dae samwan sapos hem mas iusim gun bilong hem. Dastawe, wanfala Christian need for prea and tingting gud raonem sapos bae hem willing for acceptim responsibility for disaed kwiktaem for iusim gun or nomoa taem emergency hem kamap and laef hem stap long danger. For karem gun hem savve mekem man stap long danger for garekil or dae from narawan attakim hem or pei bak.
Samting wea man disaedem savve affectim olketa narawan tu. Olsem example, main waka bilong wanfala Christian hem for preachim gud nius abaotem Kingdom bilong God. (Matthew 24:14) Waswe, man savve teachim nara pipol for “keepim peace witim evri man,” and long semtaem duim waka for selen wea hem mas karem gun? (Romans 12:18) Waswe olketa pikinini or olketa narawan long famili? Waswe, wei for keepim gun long haos bae putim laef bilong olketa long danger? And tu, waswe, bae olketa narawan stambol long disison bilong man olsem?—Philippians 1:10.
Long “olketa last day” distaem, staka pipol ‘raf tumas, and no lovem gudfala fasin.’ (2 Timothy 3:1, 3) Waswe, man wea savve long diswan savve chus for duim waka wea hem mas karem gun and deal witim pipol wea garem fasin olsem, and long semtaem bae “no eniwan fit for accusim” hem? (1 Timothy 3:10) Barava nomoa nao. Dastawe kongregeson bae no tingim man hia hem “free from blame” sapos hem gohed duim datfala waka bihaen hem kasem kaenfala kaonsel from Bible. (1 Timothy 3:2; Titus 1:5, 6) From datwan, man or woman olsem bae no fit for kasem eni spesol privilege insaed kongregeson.
Jesus promisim olketa disaepol bilong hem hao sapos olketa putim olketa samting bilong Kingdom firstaem, olketa no need for wari tumas abaotem need bilong olketa. (Matthew 6:25, 33) Tru nao, sapos iumi trustim Jehovah evribit, “hem nao bae sapotim [iumi]” and “hem bae no letem raeteous wan for seksek.”—Psalm 55:22.