Waswe, Conscience Bilong Iu Kasem Gudfala Training?

WASWE, enitaem iu sei: “Mi feel olsem hem no stret for mi duim diswan,” or, “Mi hard for duim samting wea iu askem bikos wanfala samting insaed long mi talem mi hao hem no stret”? Datwan hem conscience, feeling insaed wea mekem iu savve sapos samting hem stret or no stret or wea savve accusim man or mekem excuse for hem. Tru nao, iumi born witim wanfala conscience.

Nomata olketa man no followim evribit standard bilong God, olketa still luksavve long samting wea stret and no stret. Hem olsem bikos God wakem olketa man long image bilong hem, so long samfala wei olketa savve showimaot fasin bilong God olsem wisdom and raeteous fasin. (Genesis 1:26, 27) Saed long diswan, God muvim Paul for raet olsem: “Taem pipol bilong olketa nation wea no garem law duim seleva samting wea fitim law, nomata olketa no garem law, olketa kamap olsem law long olketa seleva. Olketa hia nao showimaot law hem stap insaed long heart bilong olketa, taem conscience bilong olketa kamap olsem witness wea accusim olketa or mekem excuse for olketa.”a—Romans 2:14, 15.

Disfala samting wea iumi kasem from Adam, datfala first man, hem wanfala “law” saed long fasin wea pipol from evri tribe and kantri garem. Hem wei for judgem and lukluk gud long iumiseleva. (Romans 9:1) Stretawe bihaen Adam and Eve brekem law bilong God, tufala haed wea showimaot conscience bilong tufala hem waka. (Genesis 3:7, 8) Nara example long hao conscience waka hem samting wea King David duim taem hem luksavve hem sin from hem duim census. Bible sei: “Heart bilong David start for judgem hem.”—2 Samuel 24:1-10.

Wei for lukluk gud long fasin bilong iumi and for judgem datwan savve muvim iumi for repent. Datwan hem wanfala important samting wea God acceptim. David raet olsem: “Taem mi stap kwaet olketa bon bilong mi feel taed from evriday mi feel nogud tumas. Gogo mi talemaot sin bilong mi long iu, and mi no haedem mistek bilong mi. Mi sei: ‘Mi bae talemaot rong bilong mi long Jehovah.’ And iuseleva nao forgivim olketa mistek bilong sin bilong mi.” (Psalm 32:3, 5) So conscience wea waka savve mekem man wea sin for go bak long God, and helpem hem for luksavve hao hem needim God for forgivim hem and hem need for followim olketa wei bilong Hem.—Psalm 51:1-4, 9, 13-15.

And tu, conscience savve warnim or leadim iumi taem iumi chusim or disaedem samting. Maet wei wea conscience duim diswan hem nao helpem Joseph for luksavve hao adultery hem rong and nogud and hem wanfala sin wea againstim God. Bihaen nao Ten Komandment wea God givim long olketa Israelite tambuim adultery. (Genesis 39:1-9; Exodus 20:14) So hem klia hao iumi kasem gud samting sapos conscience bilong iumi kasem training for leadim and no judgem iumi nomoa. Waswe, conscience bilong iu olsem tu?

Trainim Conscience for Disaed Long Stretfala Wei

Nomata iumi born witim conscience, sorre tumas, present hia hem no perfect. Long firstaem man hem perfect, bat bihaen nao “evriwan sin and no kasem glory bilong God.” (Romans 3:23) From iumi sin and no perfect, conscience bilong iumi maet nogud and no waka long wei wea Jehovah laekem. (Romans 7:18-23) And olketa nara samting tu savve affectim conscience bilong iumi. Hem nao famili, kastom, samting wea iumi bilivim and living long ples wea iumi stap. Tru nao, for mekem iumi garem gudfala conscience iumi hard for followim olketa nogud fasin and standard bilong world wea gogo daon.

So, wanfala Christian mas kasem help from standard wea raeteous and no savve change wea savve stap long Word Bilong God, Bible. Olketa standard hia savve leadim conscience bilong iumi for judgem olketa samting long stretfala wei and for stretem datwan. (2 Timothy 3:16) Taem conscience bilong iumi kasem instruction followim standard bilong God, hem savve helpem iumi for stap klia long olketa samting wea bae spoelem iumi and helpem iumi for “luksavve long samting wea stret and no stret.” (Hebrews 5:14) Sapos God no putim eni standard, conscience bilong iumi bae no warnim iumi taem iumi go rong. Bible hem sei: “Man savve go long wei wea luk stret long hem bat diswan lead go long dae bihaen.”—Proverbs 16:25; 17:20.

Saed long samfala samting long laef, Word Bilong God talem stret wanem for duim and no duim, and sapos iumi followim iumi bae kasem gud samting. Bat long narasaed, for staka samting Bible no talem eni law. Maet hem waka wea iumi laek for duim for kasem selen, health, hapitaem, kaleko and lukluk bilong iumi, and samfala nara samting. Hem no isi for savve wanem for duim and for disaedem long stretfala wei. From hem olsem, iumi shud garem sem tingting olsem David, wea prea: “Mekem mi savve long olketa wei bilong iu, O Jehovah; teachim mi olketa road bilong iu. Mekem mi wakabaot long truth bilong iu and teachim mi, from iu nao God wea sevem mi.” (Psalm 25:4, 5) Sapos iumi minim gud tingting and olketa wei bilong God, then iumi bae fit for disaedem samting long stretfala wei witim gudfala conscience.

So taem iumi garem kwestin and mas disaedem samting, firstaem iumi shud ting raonem olketa Bible principle wea join witim datwan. Maet samfala nao: respect for hedship (Colossians 3:18, 20); wei for honest long evri samting (Hebrews 13:18); heitim nogud samting (Psalm 97:10); aftarem peace (Romans 14:19); obeyim olketa wea garem paoa (Matthew 22:21; Romans 13:1-7); worshipim God nomoa (Matthew 4:10); no part bilong world (John 17:14); no kaban witim nogud pipol (1 Corinthians 15:33); showimaot respect long kaleko and lukluk (1 Timothy 2:9, 10); and no mekem olketa narawan stambol (Philippians 1:10). For savve long Bible principle wea fitim, diswan bae strongim conscience bilong iumi and helpem iumi for disaed long stretfala wei.

Followim Conscience Bilong Iu

Conscience savve helpem iumi sapos iumi followim samting wea hem talem. For kwiktaem followim nomoa conscience wea Bible trainim, iumi bae kasem gud samting. Iumi markem conscience wea kasem training witim warning laet bilong wanfala trak. Tingim sapos datfala laet warnim iumi hao oil hem klosap finis. Wanem nao bae happen sapos iumi no fulimap witim oil and gohed nomoa for draevem datfala trak? Iumi bae spoelem engine bilong hem. Long sem wei tu, conscience savve warnim iumi hao samting wea iumi duim hem no stret. Wei for markem samting wea iumi laek for duim witim standard bilong Bible hem olsem warning laet bilong wanfala trak. Wei for followim datfala warning bae helpem iumi for no duim samting wea no stret and hem helpem tu conscience for gohed waka gud.

Wanem nao bae happen sapos iumi chus for no duim samting followim datfala warning? Bae gogo, conscience no waka nao. Wei for no followim conscience hem olsem iu tekem wanfala pis iron, hotem long fire and bonem long hand bilong iu. From hem bone go deep insaed long meat, datfala part long hand no savve feelim eni samting nao bihaen. (1 Timothy 4:2) Conscience olsem bae no judgem iumi taem iumi duim sin, and no warnim iumi tu for no duim sin moa. Conscience wea nogud hem no followim standard bilong Bible long samting wea stret and no stret and so hem conscience wea no waka nao. Hem kamap nogud and man wea garem conscience olsem “no garem eni stretfala tingting” and no followim standard bilong God. (Ephesians 4:17-19; Titus 1:15) Iumi nating savve kasem eni gud samting sapos iumi no followim conscience bilong iumi!

“Keepim Gudfala Conscience”

Man mas barava waka hard for gohed keepim gudfala conscience. Aposol Paul sei: “Miseleva gohed for mek sure mi no duim eni rong samting againstim God and olketa man.” (Acts 24:16) From Paul hem wanfala Christian, hem gohed lukluk gud long hemseleva and for stretem gogo bilong hem for mek sure hem no duim eni rong samting againstim God. Paul savve God nao bae disaedem sapos samting iumi duim hem stret or nomoa. (Romans 14:10-12; 1 Corinthians 4:4) Paul sei: “Evri samting hem naked and showaot klia long eye bilong datwan wea iumi mas givim ansa long hem.”—Hebrews 4:13.

Paul storyim tu wei for no duim eni rong samting againstim olketa man. Example long diswan hem datfala kaonsel for olketa Christian long Corinth abaotem “kaikai wea olketa offerim long olketa idol.” Main samting nao, nomata Word Bilong God no sei wanfala samting hem rong, hem important for iumi tingim conscience bilong olketa narawan. For fail for duim diswan bae ‘spoelem spiritual saed bilong olketa brata bilong iumi wea Christ dae for olketa.’ And tu, maet iumi spoelem wei wea iumi fren witim God.—1 Corinthians 8:4, 11-13; 10:23, 24.

So gohed trainim and keepim gud conscience bilong iu. Taem iu disaedem samting, lukaotem help bilong God. (James 1:5) Studyim Word Bilong God, and letem olketa principle bilong datwan affectim mind and heart bilong iu. (Proverbs 2:3-5) Taem iu mas disaedem olketa important samting, story witim olketa mature Christian for mek sure iu minim gud olketa Bible principle abaotem datwan. (Proverbs 12:15; Romans 14:1; Galatians 6:5) Tingim hao samting wea iu disaedem bae affectim conscience bilong iu, olketa narawan, and winim evri samting, wei wea iu fren witim Jehovah.—1 Timothy 1:5, 18, 19.

Conscience bilong iumi hem nambawan present from loving Dadi bilong iumi long heven, Jehovah God. For iusim conscience long wei wea fitim will bilong God bae mekem iumi fren gud witim Creator bilong iumi. Taem iumi duim best for “keepim gudfala conscience” long evri samting wea iumi duim, iumi showimaot klia hao God wakem iumi long image bilong hem.—1 Peter 3:16; Colossians 3:10.

[Footnote]

[Olketa Piksa long page 13]

Waswe, conscience bilong iu kasem training for leadim and no for judgem iu nomoa?

[Piksa long page 14]

Wei for lanem and followim olketa Bible principle savve trainim gud conscience

[Olketa Piksa long page 15]

No rejectim warning from conscience bilong iu