Herem Datfala Voice Bilong Conscience
“Pipol bilong olketa nation wea no garem law [bilong God] duim samting wea fitim law.”—ROMANS 2:14.
1, 2. (a) Wanem nao plande pipol duim for helpem narawan? (b) Wanem nao olketa example long Bible wea showimaot hao pipol tingim olketa narawan?
PLANDE taem iumi herem hao pipol willing for putim laef bilong olketa long danger for sevem laef bilong narawan. Maet samfala laek for mekhae long olketa man olsem. Bat wanfala man wea putim laef bilong hem long danger for sevem narawan hem sei: “Iumi shud duim samting wea iumi garem responsibility for duim. Mi duim bikos mi barava tingim hem, no bikos mi laekem pipol for praisem mi.”
2 Maet iu savve long samwan wea putim laef bilong hem long danger for sevem narawan. Plande pipol duim datwan long World War II, taem olketa haedem pipol from enemy nomata olketa no savve long olketa. Tingim tu samting wea kasem aposol Paul and 275 pipol taem ship wea olketa go insaed hem rek long Malta, klosap long Sicily. Pipol from datfala ples “barava kaen tumas” for helpem olketa stranger hia. (Acts 27:27–28:2) Nara example hem datfala Israelite gele wea, nomata hem no putim laef bilong hem long danger, bat hem showimaot kaenfala fasin long wanfala man bilong Syria wea tekem hem olsem prisoner. (2 Kings 5:1-4) And tingim tu parabol bilong Jesus abaotem Samaritan man wea showimaot kaenfala fasin long neiba bilong hem. Wanfala priest and wanfala Levite nating laek luksavve long datfala Jew man wea olketa killim nogud and leavim long saed road, bat datfala Samaritan man nao duim staka samting for helpem hem. Kam kasem distaem, disfala parabol hem muvim heart bilong pipol long plande ples.—Luke 10:29-37.
3, 4. Wei wea pipol no selfish and duim samting for helpem narawan nomata laef bilong olketa stap long danger hem showimaot wanem abaotem evolution teaching?
3 Hem tru, iumi stap long “nogud taem wea hard for deal witim” wea plande pipol “raf tumas” and “no lovem gudfala fasin.” (2 Timothy 3:1-3) Nomata olsem, iumi evriwan lukim and kasem gudfala samting tu from wei wea pipol showimaot kaenfala fasin. From staka pipol laek for helpem olketa narawan, iumi fit for sei diswan hem wei bilong olketa man.
4 Diskaen wei for willing for helpem narawan nomata diswan minim man mas sakrifaesim samfala samting bilong hemseleva, hem wei bilong pipol long evri ples. Diswan showimaot hao idea bilong evolution abaotem wei wea man mas faetem hemseleva nomoa for laef, hem no stret. Francis S. Collins hem wanfala savveman wea leadim project bilong gavman long America for minim gud DNA long cell bilong olketa man. Hem talem hao wei wea olketa man no selfish hem kamap bigfala problem for olketa scientist wea sei iumi kam from olketa monkey. Olketa talem hao olketa gene long cell bilong iumi nao mekem olketa man selfish for man savve win and kamap staka long earth. Bat from pipol savve kaen and no just tingim seleva nomoa, diswan showimaot datfala biliv hem no tru. Doctor Collins storyim tu hao samfala pipol mekem bigfala sakrifaes for helpem pipol wea no sem tribe or kala skin olsem olketa, wea datwan hem barava difren from wanem olketa scientist wea biliv long evolution olketa talem.
“Datfala Voice Bilong Conscience”
5. Wanem kaen fasin nao plande pipol garem?
5 Narafala samting wea Doctor Collins talem abaotem diswan hem olsem: “Datfala voice bilong conscience savve talem iumi for helpem narawan nomata iumi bae no kasem eni reward for datwan.”a Wei wea hem story abaotem “conscience” mekem iumi for tingim disfala samting wea aposol Paul hem talem: “Taem pipol bilong olketa nation wea no garem law duim samting wea followim law, olketa showimaot olketa garem law wea olketa seleva followim. Olketa showimaot law hem stap insaed long heart bilong olketa, and conscience bilong olketa agree witim diswan tu and hem savve accusim olketa or mekem olketa feel sure samting olketa duim hem stret.”—Romans 2:14, 15.
6. Why nao evriwan mas givim ansa long Creator?
6 Leta wea Paul raetem for olketa Christian long Rome showimaot hao no eniwan fit for sei God no stap bikos olketa samting wea hem creatim wea iumi lukim showimaot olketa fasin bilong hem, and pruvim Hem really stap, and iumi mas givim ansa long hem. Datwan “showaot klia start kam long creation bilong world kam kasem distaem.” (Romans 1:18-20; Psalm 19:1-4) Hem tru, staka pipol no laek for tingim Creator and olketa garem living wea olobaot. Nomata olsem, God laekem olketa man for acceptim raeteous fasin bilong hem and repent from olketa nogud samting wea olketa duim. (Romans 1:22–2:6) Olketa Jew garem strongfala reason for duim diswan bikos God givim Law bilong hem long olketa thru long Moses. Bat nomata pipol wea no savve long “olketa holy toktok bilong God” tu shud luksavve wei wea God hem stap.—Romans 2:8-13; 3:2.
7, 8. Hu nao luksavve long samting wea stret and samting wea no stret, and wanem nao diswan showimaot?
7 Wanfala main reason why evriwan shud acceptim God and obeyim hem, hem bikos iumi luksavve long samting wea stret and samting wea no stret. Wei wea iumi savve long diswan showimaot iumi garem wanfala conscience. Tingim diswan: Samfala pikinini standap long laen for peim cake. Then nomoa wanfala hem no warim olketa wea weit long laen bat hem go long front for peim cake bilong hem. Plande long olketa pikinini hia sei, ‘Iu hao ia, iu followim laen!’ Askem iuseleva diswan, ‘Why nao olketa pikinini tu bat stretawe feel nogud long kaen samting olsem?’ Diswan showimaot olketa luksavve long samting wea stret and samting wea no stret. Paul hem raet olsem: “Taem pipol bilong olketa nation wea no garem law duim samting wea followim law, olketa showimaot olketa garem law wea olketa seleva followim.” From Paul iusim datfala word “taem,” and hem no sei, “Sapos enitaem,” datwan showimaot diswan hem samting wea happen staka taem. Diswan minim pipol “duim samting wea followim law,” wea minim tingting wea olketa born witim for evri samting mas stret nao hem muvim olketa for duim samting wea iumi readim long law bilong God.
8 Pipol long plande kantri luksavve long samting wea stret and samting wea no stret. Wanfala savveman long University of Cambridge hem sei olketa standard bilong pipol long Babylon, Egypt, and Greece, and tu, olketa Australian Aborigine and olketa Native American “hem for againstim wei for daonem pipol, wei for killim man dae, spoelem narawan and fasin for laea. And tu, olketa garem sem standard saed long wei for kaen long olketa olo, young pipol, and olketa wea wik.” And Doctor Collins hem sei olsem: “Wei for luksavve long samting wea stret and samting wea no stret hem samting wea pipol evriwea long world garem.” Tru nao, datwan hem olsem samting wea Romans 2:14 hem talem!
Hao Nao Conscience Hem Waka?
9. Wanem nao conscience, and hao nao datwan savve helpem iu bifor iu duim samting?
9 Bible hem showimaot hao conscience hem wei wea iu savve judgem and lukluk gud long olketa samting wea iu duim. Hem olsem wanfala voice insaed long iu talem iu sapos samting hem stret or nomoa. Paul story abaotem disfala voice insaed long hem taem hem sei: “Conscience bilong mi stretem mi thru long holy spirit.” (Romans 9:1) Olsem example, taem iu tingting raonem sapos iu bae duim samting or nomoa, disfala voice maet talem iu sapos datwan hem stret or nomoa. Maet conscience bilong iu helpem iu for tingting gud raonem samting wea iu laek for duim and feeling bilong iu sapos iu duim datwan.
10. Plande taem hao nao conscience hem waka?
10 Samting wea happen staka taem nao, conscience bilong iu hem pokem iu bihaen iu duim wanfala samting. Taem David hem ranawe from King Saul, samting happen wea mekem David garem chance for duim samting wea no showimaot respect long king wea God anointim. Bihaen hem duim datwan, “heart bilong David gohed for sutim hem.” (1 Samuel 24:1-5; Psalm 32:3, 5) Disfala story insaed Bible hem no iusim word “conscience” bat hem nao samting wea sutim David. Iumi evriwan savve garem feeling olsem taem conscience hem pokem iumi. Iumi duim wanfala samting, and then bihaen iumi feel sorre from iumi duim datwan. Conscience bilong samfala pipol wea no peim tax barava pokem olketa, gogo datwan mekem olketa peim nao datfala tax. Conscience bilong olketa narawan wea duim adultery muvim olketa for talemaot rong wea olketa duim long marit partner bilong olketa. (Hebrews 13:4) Bat taem man duim samting followim wanem conscience hem talem, hem savve feel satisfae and garem peace long mind.
11. Why nao hem danger samting for just letem nomoa conscience for leadim iumi? Givim example.
11 So waswe, hem gud for just letem conscience nomoa for leadim iumi? Hem gud for lisin long conscience bilong iumi, bat datfala voice bilong conscience savve barava talem iumi rong samting tu. Tru tumas, datfala voice ‘insaed long iumi’ savve laea long iumi. (2 Corinthians 4:16) Tingim wanfala example. Bible hem talem hao Stephen wea strong for followim Christ hem man wea “kaen tumas and hem garem bigfala paoa.” Samfala Jew tekem Stephen go aotsaed long Jerusalem and sutim hem dae witim olketa ston. Saul (wea kamap aposol Paul bihaen) wea standap long there tu, hem ‘agree witim wei for killim dae’ Stephen. Luk olsem olketa Jew hia barava bilivim samting wea olketa duim hem stret dastawe conscience bilong olketa nating sutim olketa. Masbi Saul tu olsem, bikos bihaen datwan hem “gohed for kros tumas and laek killim dae olketa disaepol bilong Lord.” Tru nao, conscience bilong hem nating talem stretfala samting long hem.—Acts 6:8; 7:57–8:1; 9:1.
12. Wanem nao wanfala samting wea maet affectim conscience bilong iumi?
12 Wanem nao maet affectim conscience bilong Saul? Wanfala samting maet hem olketa wea hem kaban witim olketa. Maet iu story witim samwan long telephone wea voice bilong hem here olsem voice bilong dadi bilong hem. Maet wei wea voice bilong hem here olsem dadi bilong hem, hem bikos hem pikinini bilong hem. Bat nara samting tu, from hem savve long dadi bilong hem for longtaem finis, gogo hem start for talem olketa word long sem wei wea dadi talem olketa word. Olsem tu, maet wei wea Saul kaban witim olketa Jew wea heitim Jesus and againstim olketa teaching bilong hem affectim hem. (John 11:47-50; 18:14; Acts 5:27, 28, 33) Tru nao, maet olketa wea Saul kaban witim olketa affectim datfala voice wea hem herem insaed long hem, wea datwan nao hem conscience bilong hem.
13. Long wanem wei nao olketa kastom and ples wea man stap savve affectim conscience bilong hem?
13 Olketa kastom and ples wea man stap savve affectim conscience bilong hem, long sem wei wea living and wei bilong pipol long wanfala ples mekem toktok bilong olketa here difren from toktok bilong pipol long narafala ples. (Matthew 26:73) Masbi datwan nao samting wea happen long olketa bilong Assyria bifor. Olketa savve tumas for faet, and piksa wea olketa karvem long ston showim hao olketa savve barava killim pipol wea olketa tekem olsem prisoner. (Nahum 2:11, 12; 3:1) Bible talem hao pipol long Nineveh wea stap long taem bilong Jonah “nating savve wei wea raet hand bilong olketa difren from left hand bilong olketa.” Datwan minim standard wea olketa garem no helpem olketa for savve long samting wea stret or no stret long tingting bilong God. Tingim wei wea datwan savve affectim conscience bilong samwan wea growap long Nineveh! (Jonah 3:4, 5; 4:11) Long distaem tu, olketa kastom and ples wea man stap savve affectim conscience bilong hem.
Hao Iumi Savve Mekem Voice Bilong Conscience Kamap Moabeta
14. Samting wea Genesis 1:27 talem hem showimaot wanem saed long conscience bilong iumi?
14 Jehovah givim datfala conscience long Adam and Eve olsem wanfala present, and iumi kasem datwan from tufala. Genesis 1:27 talem hao God wakem iumi long image bilong hem. Datwan no minim iumi garem sem body olsem God, bikos hem wanfala spirit and iumi olketa man. Bat iumi garem olketa semkaen fasin olsem God, wea insaed diswan hem wei for savve long samting wea stret and no stret witim wanfala conscience. Diswan mekem iumi luksavve long wanfala wei for strongim conscience bilong iumi, mekem iumi savve barava trustim datwan. Disfala wei nao hem for lanem moa samting abaotem Creator, and fren gud witim hem.
15. Wanem nao wanfala gud samting wea iumi savve kasem from wei for savve gud long Dadi bilong iumi?
15 Bible hem showimaot Jehovah nao givim laef long iumi dastawe hem olsem wanfala Dadi long iumi evriwan. (Isaiah 64:8) Taem olketa faithful Christian story long God, nomata hope bilong olketa hem for go long heven or laef long wanfala paradaes long earth, olketa fit for kolem hem Dadi. (Matthew 6:9) Iumi shud laek for fren gud go moa witim Dadi bilong iumi wea datwan bae helpem iumi barava lanem gud tingting and olketa standard bilong hem. (James 4:8) Staka pipol nating interest for duim olsem. Olketa hia olsem Jew pipol wea Jesus sei olsem abaotem olketa: “Iufala nating herem voice bilong hem or lukim hem long enitaem; and toktok bilong hem nating stap insaed long tingting bilong iufala.” (John 5:37, 38) Nomata iumi no herem voice bilong God enitaem, taem iumi readim Word bilong hem, iumi bae fit for savve long tingting bilong hem. Diswan mekem iumi savve kamap olsem hem and garem sem feeling olsem hem.
16. Story abaotem Joseph hem showimaot wanem saed long wei for trainim and obeyim conscience bilong iumi?
16 Story abaotem Joseph taem hem stap long haos bilong Potiphar hem showimaot datwan. Waef bilong Potiphar hem trae for switim Joseph for durong witim hem. Nomata long datfala taem no eniwan raetem yet eni buk bilong Bible, and tu, Jehovah no givim yet Tenfala Komandment, Joseph sei olsem: “Hem hard tumas for mi duim disfala barava nogud samting and sin againstim God!” (Genesis 39:9) Hem no ansa olsem for mekem famili bilong hem hapi, from famili bilong hem no stap long there. Main samting nao hem laek for mekem God hapi. Joseph savve long standard bilong God saed long marit, wea hem nao for man savve garem wanfala waef nomoa, and woman mas garem wanfala hasband nomoa, and tufala kamap “wan body.” And luk olsem Joseph herem finis story abaotem Abimelech tu. Abimelech laek maritim Rebekah bat bihaen hem faendaot hem marit woman, hem savve sapos hem maritim Rebekah bae datwan mekem pipol bilong hem guilty. And Jehovah blessim samting wea kamaot from datwan, wea diswan showimaot tingting bilong Jehovah abaotem adultery. From Joseph savve long olketa samting hia wea happen bifor, diswan strongim go moa conscience wea hem born witim, and diswan muvim hem for rejectim dirty fasin.—Genesis 2:24; 12:17-19; 20:1-18; 26:7-14.
17. Saed long wei wea iumi laek for kamap olsem Dadi bilong iumi, why nao hem moa isi for iumi distaem winim taem bilong Joseph?
17 Distaem, hem moa isi for iumi savve long tingting bilong Jehovah. Iumi garem full Bible for helpem iumi lanem tingting and olketa feeling bilong Dadi bilong iumi, wea minim tu wei for savve long samting wea hem acceptim and samting wea hem tambuim. Taem iumi savve gud long Bible, diswan mekem iumi fren gud go moa witim God and kamap olsem hem. Taem iumi duim olsem, conscience bilong iumi bae start for followim tingting bilong Dadi bilong iumi. Samting wea conscience talem iumi for duim bae barava start for wan mind nao witim will bilong hem.—Ephesians 5:1-5.
18. Nomata wanem kaen pipol nao iumi kaban witim or wea nao iumi stap bifor, wanem nao iumi savve duim for mekem conscience bilong iumi hem kamap samting wea iumi savve trustim?
18 Waswe saed long wei wea tingting and wei bilong pipol long ples wea iumi stap hem savve affectim conscience bilong iumi? Maet ples wea iumi stap long hem, and tu, tingting and samting wea olketa relative duim, hem affectim iumi. From datwan, maet samting wea conscience talem long iumi hem no mas stret. Maet conscience bilong iumi here olsem “voice” bilong pipol wea stap raonem iumi. Hem tru, iumi no savve changem samting wea happen long iumi bifor, bat iumi savve disaed strong for mek sure olketa wea iumi fren witim and olketa nara samting iumi duim bae helpem conscience bilong iumi. Wanfala important samting for duim nao hem for stap evritaem witim olketa Christian, wea for longfala taem finis olketa traem best for olsem Dadi bilong olketa. Wanfala nambawan chance for duim diswan hem for kaban tugeta witim olketa brata and sista bifor and bihaen long olketa meeting bilong kongregeson. Iumi bae fit for luksavve long tingting and samting wea olketa Christian brata and sista duim, and tu, wei wea olketa kwiktaem for followim conscience bilong olketa wea showimaot tingting and fasin bilong God. Gogo diswan savve helpem iumi for mekem conscience bilong iumi followim olketa Bible principle, wea bae mekem iumi barava showimaot fasin bilong God. Taem iumi mekem conscience bilong iumi fitim olketa principle bilong Dadi bilong iumi and followim gudfala tingting and fasin bilong olketa Christian brata and sista bilong iumi, iumi bae fit for trustim conscience bilong iumi and lisin long samting wea hem talem long iumi for duim.—Isaiah 30:21.
19. Saed long conscience, wanem moa iumi need for lukluk gud long hem?
19 Nomata olsem, samfala stragol yet for followim conscience bilong olketa evritaem. Next article bae storyim samfala samting wea olketa Christian deal witim finis. Taem iumi lukluk long olketa samting hia, bae iumi barava lukim waka bilong conscience, why conscience bilong samfala savve difren from olketa narawan, and hao iumi savve herem and followim datfala voice bilong conscience long bigfala wei moa.—Hebrews 6:11, 12.
[Footnote]
a Owen Gingerich, wanfala savveman long Harvard University hem raetem samting wea klosap semsem tu, hem sei: “Maet wei wea pipol tingim narawan mekem wanfala kwestin kamap . . . wea maet science no savve ansarem from wanem olketa lukim long wei bilong olketa animal. Maet ansa wea here stret hem saed long olketa fasin wea God givim long olketa man, wea wanfala nao hem conscience.”
Wanem Nao Iu Lanem?
• Why nao pipol evriwea long world garem wei for luksavve long samting wea stret and samting wea no stret, wea hem nao conscience?
• Why nao hem danger samting for just letem nomoa conscience for leadim iumi?
• Wanem nao samfala wei wea iumi savve mekem datfala voice insaed long iumi kamap moabeta?
[Piksa long page 6]
Conscience bilong David barava pokem hem . . .
[Piksa long page 6]
bat conscience bilong Saul from Tarsus nating pokem hem
[Piksa long page 7]
Iumi savve trainim conscience bilong iumi