“Iufala Herem Hao Job Hem Stand Strong”
“Iufala herem hao Job hem stand strong and iufala lukim samting wea Jehovah duim, hao Jehovah showimaot kaenfala feeling and garem bigfala mercy.”—JAMES 5:11.
1, 2. Wanem hard taem nao wanfala hasband and waef long Poland feisim?
TAEM army bilong Hitler tekovarem Danzig (wea hem nao Gdańsk distaem) long north Poland, olketa samting change and ples hem kamap barava danger for olketa tru Christian. Harald Abt hem wanfala Jehovah’s Witness wea baptaes for klosap wan year nomoa taem datwan happen. Secret police trae for forcem Harald for saenem wanfala pepa wea sei hem bae no wanfala Jehovah’s Witness nao, bat hem nating saenem datfala pepa. Bihaen samfala week long prison olketa sendem Harald long datfala raf prison long Sachsenhausen wea staka taem olketa hitim hem nogud and talem hem hao olketa bae killim hem dae. Wanfala officer point go long smoke wea kamaot from ples wea olketa savve bonem body bilong man wea dae and hem sei long Harald: “Sapos iu strong for followim faith bilong iu, insaed 14-fala day bae iu tu dae long there.”
2 Taem olketa arrestim Harald olketa no arrestim waef bilong hem Elsa, from baby gele bilong tufala hem susu yet. Bat olketa gohed lukluk long evri samting wea Elsa duim. No longtaem bihaen, olketa kam tekem baby from hem, and olketa sendem Elsa long datfala raf prison long Auschwitz. Bat hem no dae long there and Harald tu no dae long prison. Iu savve read abaotem hao tufala stand strong insaed The Watchtower bilong April 15, 1980. Harald hem raet: “From mi garem faith long God, mi stap insaed olketa raf prison for 14-fala year. Pipol askem mi olsem: ‘Waswe, waef bilong iu helpem iu for stand strong long datfala hard taem?’ Barava nao! Mi savve hao hem bae nating lusim faith bilong hem, and wei for savve long datwan strongim mi. Mi savve hao hem bae moa hapi for lukim mi faithful go kasem taem mi dae winim wei for lusim faith bilong mi. . . . Elsa hem stand strong long plande hardfala samting taem hem stap insaed olketa raf prison long Germany.”
3, 4. (a) Olketa example bilong hu nao savve encouragem olketa Christian for stand strong? (b) Why nao Bible encouragem iumi for lukluk long samting wea kasem Job?
3 Staka Witness safa long olketa nogud samting and talem hao datwan hem barava no isi. Dastawe Bible givim disfala kaonsel long evri Christian: “Tingim example bilong wei for safa from nogud samting and wei for showimaot patient fasin wea olketa profet wea toktok long nem bilong Jehovah showimaot.” (James 5:10) From taem bifor kam, staka servant bilong God kasem persecution nomata olketa no duim eni rong samting. Olketa example bilong disfala big “sekson bilong olketa witness” savve encouragem iumi for ran witim fasin for stand strong long Christian resis bilong iumi.—Hebrews 11:32-38; 12:1.
4 Job hem nambawan example long Bible wea showimaot fasin for stand strong. James hem raet: “Mifala talemaot hao olketa wea stand strong olketa hapi. Iufala herem hao Job hem stand strong and iufala lukim samting wea Jehovah duim, hao Jehovah showimaot kaenfala feeling and garem bigfala mercy.” (James 5:11) Samting wea kasem Job showim iumi reward wea Jehovah bae givim long olketa wea faithful and wea kasem blessing bilong Jehovah. And winim datwan, hem showimaot olketa tru samting wea bae helpem iumi long olketa hardfala taem. Buk bilong Job helpem iumi for ansarem olketa kwestin olsem: Taem iumi kasem hard taem, why nao iumi mas trae for minim olketa important kwestin wea join witim datwan? Olketa wanem kaen tingting and fasin savve helpem iumi for stand strong? Hao nao iumi savve strongim olketa Christian brata and sista bilong iumi wea safa?
Luksavve Long Evri Samting
5. Wanem important kwestin nao iumi mas tingim taem iumi deal witim olketa hard taem and againstim olketa temptation?
5 For balance long worship bilong iumi for Jehovah, iumi need for luksavve long evri samting wea join witim hard taem wea iumi feisim. Sapos nomoa, olketa problem wea kasem iumi maet mekem iumi no garem stretfala tingting abaotem worship bilong iumi. Datfala kwestin abaotem wei for loyal long God hem barava important. Dadi bilong iumi long heven talem iumi olsem: “Kamap wise, son bilong mi, and mekem heart bilong mi hapi, mekem mi savve givim ansa long wan wea tok daonem mi.” (Proverbs 27:11) Diswan hem barava spesol privilege! Nomata iumi no perfect and garem olketa wik point, iumi savve mekem Creator bilong iumi hapi. Taem iumi duim olsem, love for Jehovah mekem iumi fit for deal witim olketa hard taem and againstim olketa temptation. Trufala Christian love hem stand strong long evri samting. Hem nating savve fail.—1 Corinthians 13:7, 8.
6. Hao nao Satan tok daonem Jehovah, and waswe, hem accusim Job nomoa?
6 Buk bilong Job showimaot klia hao Satan nao datwan wea tok daonem Jehovah. Hem showimaot tu hao disfala enemy wea iumi no savve lukim hem barava nogud and hem laekem tumas for spoelem wei wea iumi fren witim God. Olsem example bilong Job showimaot, Satan accusim evri servant bilong Jehovah. Hem sei olketa worshipim Jehovah for selfish reason nomoa and hem laek for pruvim hao love bilong olketa for God savve katdaon. Hem tok daonem God for plande thousand year. Taem Jesus torowem Satan from heven, wanfala voice from heven storyim hem olsem “datwan wea accusim olketa brata bilong iumi,” and talem tu hao hem gohed for accusim olketa “day and naet front long God bilong iumi.” (Revelation 12:10) Wei wea iumi faithful for stand strong savve pruvim hao toktok bilong Satan hem no tru.
7. Wanem nao best wei for iumi deal witim wei wea sik or wei for olo mekem body wik?
7 Iumi mas no forgetim hao Devil bae mekius long eni hard taem wea maet kasem iumi for trae mekem iumi no tingim Jehovah. Wanem taem nao hem testim Jesus? Hem long taem wea Jesus hem hangre tumas from hem no kaikai for staka day. (Luke 4:1-3) Bat wei wea Jesus fren gud witim Jehovah strongim hem for barava againstim olketa temptation bilong Devil. Hem barava important for mekem wei wea iumi fren witim Jehovah for strongim iumi for deal witim wei wea sik or wei for olo mekem body wik. Nomata “body bilong iumi hem gogo for finis,” iumi no givap bikos “long insaed iumi kamap niu moa evriday.”—2 Corinthians 4:16.
8. (a) Hao nao olketa nogud feeling savve spoelem iumi? (b) Wanem tingting nao Jesus hem garem?
8 And tu, olketa nogud feeling savve spoelem strong wea iumi kasem from wei wea iumi worshipim God. Maet samwan garem tingting olsem: ‘Why nao Jehovah letem diswan for happen?’ Maet narawan ask olsem bihaen samwan no kaen long hem: ‘Hao nao brata hia duim olsem long mi?’ Kaen feeling olsem maet mekem iumi tingim nomoa samting wea kasem iumi and no tingim olketa important kwestin. Wei wea thrifala fren bilong Job mekem hem feel nogud barava spoelem hem olsem datfala sik spoelem body bilong hem. (Job 16:20; 19:2) Aposol Paul tu talem hao wei for kros olowe savve ‘givim chance long Devil.’ (Ephesians 4:26, 27) Hem moabeta for olketa Christian followim Jesus and “trustim datwan wea judge long raeteous wei,” Jehovah God, winim wei for feel nogud and kros long olketa wea duim nogud samting long olketa, or for tingim tumas hao datfala samting wea happen hem no stret. (1 Peter 2:21-23) Wei for garem sem “tingting” olsem Jesus savve protectim iumi from olketa attak bilong Satan.—1 Peter 4:1.
9. God promisim wanem samting saed long olketa hevi or temptation wea iumi feisim?
9 Iumi mas no tingse olketa problem wea kasem iumi hem showimaot God no hapi long iumi. Datkaen tingting nao spoelem Job taem olketa fren bilong hem tok spoelem hem. (Job 19:21, 22) Bible talem iumi olsem: “Man no savve testim God witim nogud samting and God tu no testim eniwan.” (James 1:13) Jehovah hem promis for helpem iumi for deal witim eni hevi wea kasem iumi and mekem wei for iumi no foldaon long eni temptation. (Psalm 55:22; 1 Corinthians 10:13) Wei for fren gud witim God long taem olsem savve helpem iumi for garem balance tingting and win for againstim Devil.—James 4:7, 8.
Help for Stand Strong
10, 11. (a) Wanem nao helpem Job for stand strong? (b) Hao nao gudfala conscience bilong Job helpem hem?
10 Nomata olketa “man wea shud givim comfort” tok spoelem Job and hem no savve why nao olketa nogud samting kasem hem, hem gohed for faithful. Wanem nao iumi lanem from wei wea hem stand strong? Iumi sure hao main reason why Job hem winim datfala test hem bikos hem faithful long Jehovah. “Hem fraet long God and no duim eni nogud samting.” (Job 1:1) Datwan hem wei bilong hem. Job nating willing for rejectim Jehovah nomata hem no savve why nao evri samting hem seknomoa kamap nogud. Long tingting bilong Job, hem bae gohed for worshipim God long olketa gud taem and hard taem.—Job 1:21; 2:10.
11 Job kasem comfort tu from hem garem gudfala conscience. Nomata hem tingse hem bae dae, wei wea hem duim best bilong hem for helpem olketa narawan, hol strong long olketa raeteous standard bilong Jehovah, and stap klia long false worship barava strongim hem.—Job 31:4-11, 26-28.
12. Wanem nao Job duim taem hem kasem help from Elihu?
12 Hem tru, Job needim help for stretem tingting bilong hem long samfala samting. From hem hambol for acceptim datfala help datwan showimaot nara reason why hem stand strong. Job showimaot respect and hem lisin long wise kaonsel bilong Elihu and hem hapi for acceptim discipline from Jehovah. Hem sei: “Mi tok, bat mi no minim. . . . Mi barava sorre long samting wea mi talem, and mi repent long dust and asis.” (Job 42:3, 6) Nomata sik no finis from Job, hem hapi from hem kasem bak gudfala tingting wea mekem hem fren gud witim God. Hem sei: “Mi luksavve nao hao iu [Jehovah] fit for duim evri samting.” (Job 42:2) From Jehovah helpem Job for minim hae position bilong Hem, Job luksavve hao Creator hem barava hae winim hem.
13. Hao nao wei for showimaot mercy helpem Job?
13 Last samting, Job showimaot nambawan example bilong mercy. Nomata olketa giaman fren bilong hem barava spoelem feeling bilong hem, hem followim samting wea Jehovah askem hem for duim. Hem prea for olketa. No longtaem bihaen, Jehovah finisim sik bilong Job. (Job 42:8, 10) Tru tumas, wei for showimaot love and mercy bae helpem iumi for stand strong, bat wei for feel nogud and kros bae nating helpem iumi. Wei for forgive hem mekem iumi hapi, and mekem iumi kasem strong from worship bilong iumi for Jehovah, and hem bae blessim iumi taem iumi duim olsem.—Mark 11:25.
Olketa wea Wise Helpem Iumi Stand Strong
14, 15. (a) Wanem nao olketa fasin wea bae mekem man for givim kaonsel fit for helpem olketa narawan? (b) Explainim why nao Elihu win for helpem Job.
14 Nara samting iumi lanem from Job hem wei wea iumi savve kasem help from olketa wea wise. Olketa hia olsem olketa brata wea “born for taem bilong trabol.” (Proverbs 17:17) Bat olsem samting wea happen long Job, samfala man wea givim kaonsel savve spoelem iumi and no helpem iumi. Man wea wise hem need for givim kaonsel wea showimaot respect, tingim feeling bilong narawan, and kaen, olsem Elihu duim. Maet olketa elder and nara mature Christian need for stretem tingting bilong olketa brata wea stragol witim olketa problem. Olketa savve lanem staka samting from buk bilong Job taem olketa duim diswan.—Galatians 6:1; Hebrews 12:12, 13.
15 Iumi savve lanem plande nambawan samting from wei wea Elihu deal witim datfala problem. Hem patient and lisin firstaem long tingting bilong thrifala fren bilong Job bifor hem ansarem olketa, nomata olketa no garem stretfala tingting. (Job 32:11; Proverbs 18:13) Elihu iusim nem bilong Job and story long hem olsem wanfala fren. (Job 33:1) Hem no garem sem tingting olsem thrifala giaman fren bilong Job wea tingse olketa hae winim Job. Hem sei: “God wakem mi tu from clay.” Hem no laek for talem moa olketa nogud toktok long Job. (Job 33:6, 7; Proverbs 12:18) Elihu no tok daonem samting wea Job duim bifor, bat hem praisem hem for raeteous fasin bilong hem. (Job 33:32) Samting wea moa important, Elihu garem sem tingting olsem God, and hem helpem Job for luksavve hao Jehovah bae nating duim samting wea no stret. (Job 34:10-12) Hem encouragem Job for weit long Jehovah winim wei for trae showimaot raeteous fasin bilong hemseleva. (Job 35:2; 37:14, 23) Olketa Christian elder and olketa narawan savve lanem gudfala samting from diswan.
16. Hao nao thrifala giaman fren bilong Job duim samting wea Satan laekem?
16 Wise kaonsel bilong Elihu hem barava difren from olketa nogud toktok wea Eliphaz, Bildad, and Zophar talem. Jehovah talem olketa: “Iufala no talem trufala samting abaotem mi.” (Job 42:7) Nomata olketa tingse olketa duim gud samting, olketa duim samting wea Satan laekem winim wei for faithful long fren bilong olketa. Thrifala evriwan tingse Job nao duim nogud samting dastawe hem kasem barava nogud samting. (Job 4:7, 8; 8:6; 20:22, 29) Eliphaz tingse God no trustim olketa servant bilong hem, and Hem no kea sapos man duim raeteous samting or nomoa. (Job 15:15; 22:2, 3) Eliphaz accusim Job tu for olketa mistek wea hem nating duim. (Job 22:5, 9) Bat Elihu helpem Job for garem balance tingting saed long worship bilong hem for God, wea hem evritaem goal bilong olketa man wea givim kaonsel.
17. Wanem nao iumi shud tingim taem iumi kasem hard taem?
17 Iumi savve lanem nara samting abaotem fasin for stand strong long buk bilong Job. God hem lovem iumi and hem lukim samting wea kasem iumi, and hem willing and fit for helpem iumi long plande difren wei. Long start, iumi storyim samting wea happen long Elsa Abt. Tingim disfala samting wea hem talem: “Bifor secret police arrestim mi, mi readim leta bilong wanfala sista wea hem talem hao spirit bilong Jehovah savve mekem man garem peace taem hem kasem barava bigfala test. Mi tingse toktok bilong hem ova tumas. Bat taem mi kasem olketa hard taem, mi barava bilivim samting wea hem talem hem tru. Spirit bilong Jehovah mekem mi garem peace. Hard for man bilivim sapos hemseleva no kasem diswan. Bat hem happen long mi. Jehovah helpem mi.” Elsa no storyim wanem Jehovah savve duim or samting wea Hem duim plande thousand year bifor long taem bilong Job, bat hem storyim taem bilong iumi. Tru nao, “Jehovah helpem iumi!”
Hapi Nao Man wea Stand Strong
18. Wanem nao olketa gud samting wea Job kasem from hem stand strong?
18 No staka long iumi bae kasem olketa samting wea barava nogud tumas olsem samting wea kasem Job. Bat, nomata iumi maet kasem hard taem distaem, iumi garem olketa gudfala reason for stap faithful olsem Job. Tru tumas, wei for stand strong hem teachim Job plande samting wea mekem hem barava fit. (James 1:2-4) Datwan strongim wei wea hem fren witim God and hem talem olsem: “Bifor, mi herem samting wea olketa talem abaotem iu, bat distaem eye bilong mi barava lukim iu.” (Job 42:5) Wei wea Job stap faithful barava pruvim hao Satan hem man for laea. Nomata plande handred year bihaen, Jehovah gohed for story abaotem servant bilong hem Job olsem man wea showimaot nambawan example bilong raeteous fasin. (Ezekiel 14:14) Wei wea Job faithful and stand strong muvim pipol bilong God distaem tu.
19. Why nao iu tingse fasin for stand strong hem gud tumas?
19 Taem James raet long olketa Christian long first century abaotem fasin for stand strong, hem storyim wei for satisfae wea kamaot from datwan. And hem iusim example bilong Job for remindim olketa hao Jehovah barava blessim olketa faithful servant bilong hem. (James 5:11) Iumi read olsem long Job 42:12: “Jehovah hem blessim Job bihaen winim firstaem.” God givim Job staka samting moa winim olketa samting wea hem lusim, and hem hapi and gohed laef for longfala taem. (Job 42:16, 17) Olsem tu, insaed long niu world God bae aotem eni pain, wei for safa, or bigfala sorre wea iumi kasem distaem. (Isaiah 65:17; Revelation 21:4) From iumi herem hao Job hem stand strong, witim help bilong Jehovah, iumi disaed strong for followim example bilong Job. Bible promis olsem: “Hapi nao man wea gohed for stand strong long test, bikos long taem wea God appruvim hem, hem bae kasem crown bilong laef, wea Jehovah hem promisim for olketa wea gohed for lovem hem.”—James 1:12.
Hao Nao Bae Iu Ansa?
• Hao nao iumi savve mekem heart bilong Jehovah hapi?
• Why nao iumi mas no tingse olketa problem wea kasem iumi showimaot God no hapi long iumi?
• Wanem nao olketa samting wea helpem Job for stand strong?
• Hao nao iumi savve followim example bilong Elihu long wei for strongim olketa brata and sista bilong iumi?
[Piksa long page 11]
Man wea wise hem showimaot respect, tingim feeling bilong narawan, and kaen taem hem givim kaonsel
[Piksa long page 12]
Elsa and Harald Abt