Faith Bilong Wanfala Mami Strongim Hem Nomata Hem Redi for Dae

“Sapos iufala kasem disfala leta, hem minim mi dae taem olketa operatim mi and mi lusim iufala nao.”

OLKETA toktok hia hem olketa firstfala toktok wea Carmen raetem long leta for thrifala gele bilong hem. Wanfala hem 25 year, narawan hem 19 year, and last wan hem 16 year. Carmen hem wanfala Jehovah’s Witness. Sorre samting wea happen nao hem dae taem olketa operatim hem.

Hem barava sorre samting sapos nogud samting olsem happen long eniwan and hem dae from thrifala gele bilong hem. Nomata olsem, strongfala faith wea disfala mami garem long Jehovah and olketa promis bilong hem mekem hem savve deal witim nogud samting wea kamap. Faith bilong hem mekem hem garem peace wea barava showaot klia long naesfala leta wea hem raetem. Diswan nao samting wea hem talem long olketa gele bilong hem.

“Firstaem, mi laek for talem iufala mi barava lovem iufala tumas. . . . Iufala olketa gudfala gele bilong mi, and mi barava hapi tumas long iufala.

“Mi laekem tumas for stap witim iufala go kasem taem iumi go insaed niu world wea God promisim for iumi . . . , bat from mi no savve duim olsem, mi askem God for helpem iufala mekem iufala savve gohed faithful, olsem iufala duim finis. Iumi kasem plande test and iumi gohed strong tugeta and Jehovah nating lusim iumi. . . . So gohed for trustim help wea hem kam thru long organization bilong hem, and sapotim kongregeson and olketa elder. Mek sure iufala go preach evritaem, and lovem olketa brata.

“For lelebet taem nomoa bae iumi no lukim iumi. . . . Mi barava laekem iufala for forgivim mi for evri mistek wea mi duim and evritaem wea mi no minim iufala or mi no talem iufala mi lovem iufala. . . . Mi savve hao samting wea each wan long iufala needim hem difren. Jehovah hem savve gud long diswan winim iufala, and bae hem givim iufala evri samting wea iufala needim and hem bae blessim iufala for evri hard samting wea iufala kasem.

“No forgetim hao goal bilong iufala hem for laef long niu world, and gohed waka hard for kasem datwan. Mi prea for Jehovah blessim iufala and strongim iufala for faithful go kasem end. . . . No sorre tumas olketa gudfala gele bilong mi. Mi lovem iufala!”

Samting wea barava nogud savve kasem iumi enitaem nomoa. King Solomon hem sei olsem: “Taem and wei wea seknomoa samting hem happen hem kasem evriwan.” (Ecclesiastes 9:​11) Bat olketa wea garem strongfala faith long God savve sure long samting wea aposol Paul talem. Hem sei: “Mi barava sure hao nomata dae or laef . . . or eni nara creation no fit for separatem iumi from love bilong God wea stap long Lord bilong iumi, Christ Jesus.”​—Romans 8:​38, 39; Hebrews 6:​10.