Olketa Note Andanit lo Washing Machine

Bihaen Zarina baptaes for kamap wanfala Jehovah’s Witness, hem lusim Russia and go bak lo hom blo hem lo Central Asia and hem barava laek teachim truth lo Bible lo tufala dota blo hem. Bat from hem no garem staka selen, hem mas sharem wan bedroom apartment witim parents blo hem and brata and waef blo hem. Parents blo Zarina tok strong lo hem for no teachim olketa pikinini blo hem abaotem Bible. Olketa talem tufala dota blo hem tu for no story witim mami blo olketa abaotem Bible.

Zarina barava ting raonem hao hem savve helpem tufala gele blo hem for lane abaotem Jehovah. (Provebs 1:8) So hem prea strong lo Jehovah for helpem hem and givim wisdom lo hem. Then Zarina duim samting followim prea blo hem. Hem savve go for olketa short wakabaot witim tufala gele and story abaotem olketa nambawan samting wea God creatim. Diswan helpem tufala gele hia for interest lo Creator.

Then Zarina tingim nara wei for teachim tufala lo wei for iusim buk Wanem Nao Really Samting wea Bible Teachim?a Hem savve raetem olketa paragraf and kwestin wea stap insaed lo buk lo olketa pis pepa. Hem raetem samfala nara samting tu for helpem tufala gele barava minim gud datfala information. Then Zarina haedem olketa pis pepa hia witim pencil andanit lo washing machine lo bathrum. Taem tufala dota go lo bathrum, olketa readim olketa paragraf and raetem daon ansa blo olketa.

Zarina studyim tufala chapter lo Wanem Bible Teachim buk lo wei olsem bifor thrifala muv go lo nara haos. Lo niu haos, Zarina hem free for studyim Bible witim tufala dota blo hem. Lo October 2016, tufala gele blo hem baptaes. Tufala hapi tumas mami hem wise and iusim gudfala tingting for teachim truth abaotem God lo tufala.