Garem Olketa Fasin wea Savve Helpem Iu for Mekem Pipol Kamap Disaepol
“Go and mekem pipol long evri nation for kamap disaepol.”—MATTHEW 28:19.
1. Wanem kaen savve and fasin nao samfala servant bilong God bifor needim?
SAMFALA taem olketa servant bilong Jehovah mas waka hard for garem olketa fasin and savve wea bae helpem olketa for duim will bilong hem. Olsem example, God komandim Abraham and Sarah for lusim taon bilong Ur wea hem wanfala rich taon. Gogo tufala needim olketa fasin and savve for helpem tufala stap long olketa tent and muv long difren ples evritaem. (Hebrews 11:8, 9, 15) Joshua needim fasin for no fraet, wei for trust long Jehovah, and savve abaotem Law bilong hem mekem hem fit for leadim olketa Israelite go insaed long Promis Land. (Joshua 1:7-9) And nomata Bezalel and Oholiab garem savve finis, spirit bilong God barava helpem tufala for mekem savve hia kamap moa big for tufala share long waka for buildim tabernacle and lukaftarem datfala waka, and tu, for wakem olketa samting insaed datfala tabernacle.—Exodus 31:1-11.
2. Wanem nao olketa kwestin wea iumi bae storyim wea join witim waka for mekem pipol kamap disaepol?
2 Plande handred year bihaen, Jesus Christ komandim olketa follower bilong hem olsem: “Go and mekem pipol long evri nation for kamap disaepol bilong mi, . . . and teachim olketa for duim evri samting wea mi komandim long iufala.” (Matthew 28:19, 20) Start long datfala taem nao pipol kasem privilege for duim bigfala waka olsem. Wanem nao olketa fasin wea man needim for helpem narawan kamap disaepol? Hao nao iumi savve showimaot olketa fasin hia long wei wea moa big?
Showimaot Iu Barava Lovem God
3. Komand wea God talem for iumi mekem pipol kamap disaepol hem givim iumi chance for duim wanem?
3 For story long pipol and trae helpem olketa worshipim tru God, iumi mas barava lovem Jehovah. Olketa Israelite savve showimaot olketa lovem God long wei for obeyim olketa komandment bilong hem witim full heart, givim olketa sakrifaes wea hem acceptim, and singim olketa song for praisem hem. (Deuteronomy 10:12, 13; 30:19, 20; Psalm 21:13; 96:1, 2; 138:5) Iumi wea helpem nara pipol kamap disaepol, iumi tu obeyim olketa law bilong God, bat nara wei wea iumi showimaot iumi lovem Jehovah hem long wei for talem nara pipol abaotem hem and olketa plan bilong hem. Iumi mas story long wei wea showimaot iumi barava bilivim samting iumi talem, and iusim naesfala toktok wea showimaot really feeling bilong iumi abaotem hope wea God givim long iumi.—1 Thessalonians 1:5; 1 Peter 3:15.
4. Why nao Jesus hapi tumas for teachim pipol abaotem Jehovah?
4 From Jesus barava lovem Jehovah, hem hapi tumas for story abaotem Kingdom bilong God, olketa plan bilong hem, and for mekhae long tru worship. (Luke 8:1; John 4:23, 24, 31) Jesus hem sei olsem: “Kaikai bilong mi hem for duim will bilong datwan wea sendem mi kam, and for finisim waka bilong hem.” (John 4:34) Disfala toktok bilong man wea raetem psalm hem fitim Jesus: “Mi barava hapi tumas for duim will bilong iu, O God bilong mi, and law bilong iu hem stap deep insaed long mi. Mi storyim gud nius abaotem raeteous fasin insaed long bigfala kongregeson. Mi no stopem mouth bilong mi for story. O Jehovah, iu nao savve gud long datwan.”—Psalm 40:8, 9; Hebrews 10:7-10.
5, 6. Wanem nao main fasin wea olketa wea laek helpem nara pipol kamap disaepol mas garem?
5 From love for God muvim olketa niu wan, samfala taem wei wea olketa hia wea just lanem truth insaed Bible story abaotem Jehovah and Kingdom showimaot olketa barava bilivim samting olketa storyim, and diswan muvim samfala narawan for studyim Bible. (John 1:41) Love for God nao hem main fasin wea muvim iumi for helpem pipol kamap disaepol. Dastawe iumi traem best for gohed strongim datfala love long wei for readim and ting raonem Word bilong hem evritaem.—1 Timothy 4:6, 15; Revelation 2:4.
6 Wei for lovem Jehovah nao barava helpem Jesus Christ for kamap man wea strong for teach. Bat hem no datwan nomoa wea mekem hem savve tumas hao for preach abaotem Kingdom. So, wanem nao narafala fasin wea mekem Jesus savve tumas for helpem pipol kamap disaepol?
Showimaot Wei for Kea and Interest Long Pipol
7, 8. Hao nao Jesus ting long pipol?
7 Jesus hem tingim pipol and hem barava interest long olketa. Nomata taem hem stap long heven yet olsem “nambawan wakman” bilong God, hem interest tumas long olketa man. (Proverbs 8:30, 31) Taem Jesus kam long earth, hem garem wei for kea long pipol, and hem strongim olketa wea kam long hem. (Matthew 11:28-30) Jesus hem kea and showimaot love olsem Jehovah, and diswan mekem pipol laek for worshipim tru God. Evri difren kaen pipol nao lisin long Jesus bikos hem kea and showimaot interest long olketa and samting wea kasem olketa.—Luke 7:36-50; 18:15-17; 19:1-10.
8 Taem wanfala man askem Jesus wanem hem mas duim for kasem laef olowe, “Jesus luk long hem and garem love for hem.” (Mark 10:17-21) Bible sei olsem abaotem thrifala from Bethany wea Jesus teachim olketa: “Jesus lovem Martha and sista bilong hem and Lazarus.” (John 11:1, 5) From Jesus barava tingim pipol, samfala taem hem no rest mekem hem savve teachim olketa. (Mark 6:30-34) From diskaen wei wea Jesus hem barava kea and interest long pipol, hem winim eni narawan for mekem pipol interest long tru worship.
9. Hao nao Paul ting long pipol wea hem helpem for kamap disaepol?
9 Aposol Paul tu hem barava interest long pipol wea hem preach long olketa. Example bilong diswan nao disfala toktok wea hem talem for olketa wea kamap Christian long Thessalonica: “From mifala garem feeling for iufala, mifala hapi for talem long iufala, no gud nius abaotem God nomoa, bat for givim soul bilong mifala tu, from mifala lovem iufala.” From love hem muvim Paul for waka hard olsem, samfala long Thessalonica ‘lusim wei for worshipim olketa idol mekem olketa savve slave for datfala tru God wea laef.’ (1 Thessalonians 1:9; 2:8) Sapos iumi barava interest long pipol, olsem Jesus and Paul, iumi tu savve hapi for lukim wei wea gud nius savve muvim heart bilong olketa “wea garem fasin fitim laef olowe.”—Acts 13:48.
Showimaot Fasin for Sakrifaesim Seleva
10, 11. Why nao iumi needim fasin for sakrifaesim seleva taem iumi trae for helpem nara pipol kamap disaepol?
10 Olketa Christian wea laek helpem narawan kamap disaepol mas willing for sakrifaesim seleva. Wei for kasem riches hem samting wea no important long olketa. Tru nao, Jesus sei olsem long olketa disaepol bilong hem: “Hem samting wea barava no isi for olketa wea rich for go insaed long kingdom bilong God!” Bat datfala toktok mekem olketa disaepol sapraes. So Jesus sei moa: “Olketa pikinini, for go insaed long Kingdom bilong God hem samting wea barava no isi! Hem moa isi for wanfala camel go insaed long hol bilong nila winim for wanfala rich man go insaed long kingdom bilong God.” (Mark 10:23-25) Jesus hem encouragem olketa follower bilong hem for garem living wea simpol mekem olketa savve busy for helpem nara pipol kamap disaepol. (Matthew 6:22-24, 33) Why nao fasin for sakrifaesim seleva hem helpem iumi for duim disfala waka?
11 For teachim evri samting wea Jesus komandim long narawan hem minim iumi mas waka hard. Christian wea laek for helpem nara pipol kamap disaepol hem traem best for conductim wanfala Bible study witim man wea interest evri week. From olketa laek garem moa chance for faendem pipol wea garem gudfala heart, samfala pablisa finis from full-taem waka and waka tu-thri day nomoa. Staka thousand Christian lanem difren languis mekem olketa savve preach long pipol wea iusim datfala languis wea stap long territory bilong olketa. Olketa narawan lusim ples bilong olketa and muv go long difren ples or difren kantri for duim moa samting long disfala harvest waka. (Matthew 9:37, 38) Iumi needim fasin for sakrifaesim seleva for duim kaen samting olsem. Bat iumi needim samfala nara samting for helpem pipol kamap disaepol.
Patient, Bat No Weistim Taem
12, 13. Why nao hem important tumas for garem patient fasin taem iumi helpem nara pipol kamap disaepol?
12 Wei for patient hem narafala fasin iumi needim for helpem pipol kamap disaepol. Hem important tumas distaem for pipol herem disfala message, bat for helpem olketa kamap disaepol hem tek longtaem lelebet and man needim patient fasin. (1 Corinthians 7:29) Jesus hem patient witim James, haf brata bilong hem. Nomata James hem savve gud long preaching waka wea Jesus duim, from wanfala samting mekem hem hol bak longtaem lelebet, hem no kwiktaem kamap wanfala disaepol. (John 7:5) Bihaen Christ hem dae, bat bifor Pentecost 33 C.E., luk olsem James hem kamap wanfala disaepol bikos maet hem nao stap taem mami and olketa brata bilong Jesus hipap tugeta for prea witim olketa aposol. (Acts 1:13, 14) James hem muv ahed gud and kasem samfala big responsibility insaed long Christian kongregeson.—Acts 15:13; 1 Corinthians 15:7.
13 Wanfala farmer hem plantim garden and hem mas patient for datwan hem grow. Long sem wei tu, Christian mas patient for helpem samwan for kamap wanfala disaepol. Hem tek taem for minim Word bilong God, for lovem Jehovah, and garem fasin olsem Christ. James hem sei olsem: “Showimaot patient fasin, olketa brata, go kasem taem wea Lord hem stap moa. Farmer hem gohed for weitim gudfala frut bilong graon, and hem showimaot patient fasin go kasem taem hem kasem firstfala rain and lastfala rain. Iufala tu showimaot patient fasin; strongim heart bilong iufala from taem wea Lord bae stap moa hem klosap nao.” (James 5:7, 8) James hem encouragem olketa nara disaepol for ‘showimaot patient fasin go kasem taem wea Lord hem stap moa.’ Sapos olketa disaepol no minim samting, Jesus patient for explainim datwan or iusim tokpiksa for helpem olketa. (Matthew 13:10-23; Luke 19:11; 21:7; Acts 1:6-8) From distaem Lord hem stap moa, wea minim hem start for rul finis, iumi mas patient tu taem iumi traem best for helpem nara pipol kamap disaepol. Iumi mas patient taem iumi teachim pipol distaem for kamap olketa follower bilong Jesus.—John 14:9.
14. Nomata iumi patient, wanem nao iumi savve duim for iusim gud taem bilong iumi for helpem nara pipol kamap disaepol?
14 Nomata iumi patient, staka wea iumi startim Bible study witim olketa no kamap disaepol. (Matthew 13:18-23) So bihaen iumi duim best for helpem olketa olsem, iumi stop for study witim olketa and trae for faendem olketa narawan wea maet tinghae long truth from Bible. (Ecclesiastes 3:1, 6) Bat nomata pipol wea tinghae long truth insaed Bible tu maet needim plande help for changem tingting bilong olketa and samting wea olketa markem olsem important long laef bilong olketa. So, iumi mas patient olsem Jesus hem patient witim olketa disaepol wea needim moa taem for kasem stretfala tingting.—Mark 9:33-37; 10:35-45.
Waka Hard for Kamap Gudfala Teacher
15, 16. Why nao wei for teach long simpol wei and for prepare gud hem important taem iumi helpem samwan for kamap disaepol?
15 For helpem narawan kamap disaepol hem important for barava lovem God, interest long pipol, and garem fasin for sakrifaesim seleva. Iumi mas mekem kamap moabeta wei bilong iumi for teach, bikos diswan mekem iumi fit for explainim samting long klia and simpol wei. Olsem example, samting wea mekem toktok bilong datfala Nambawan Teacher, Jesus Christ, muvim staka pipol hem bikos hem iusim toktok wea simpol. Maet iu tingim samfala toktok bilong Jesus olsem: “Hipimap olketa riches long heven.” “No givim samting wea holy long olketa dog.” “Samting wea kamaot from wisdom hem showimaot datfala wisdom hem raeteous.” “Peim bak olketa samting bilong Caesar long Caesar, bat olketa samting bilong God long God.” (Matthew 6:20; 7:6; 11:19; 22:21) Jesus no talem olketa shortfala toktok nomoa, bat hem teach long kliafala wei and explainim samting moa long taem wea hem need for duim datwan. Hao nao iu savve followim wei bilong Jesus for teach?
16 Main samting wea savve helpem iumi for teach long wei wea klia and simpol nao hem for prepare gud. Pablisa wea no prepare bae toktok tumas, and bikos hem talem evri samting wea hem savve abaotem datfala subject, evri story bilong hem haedem main point nao. Bat pablisa wea prepare gud hem tingim datfala student wea hem teachim, hem ting raonem datfala subject, and hem storyim nomoa wanem student hem need for savve long datfala taem. (Proverbs 15:28; 1 Corinthians 2:1, 2) Hem tingim savve wea student garem finis abaotem datfala subject and wanem kaen point nao for mekhae long hem taem tufala study. Datfala pablisa maet savve long staka interesting point abaotem datfala subject, bat for teach long kliafala wei hem mas aotem information wea no important.
17. Hao nao iumi savve helpem pipol for ting raonem olketa point long Bible?
17 Jesus no just talem ansa nomoa bat hem helpem pipol for ting raonem samting tu. Olsem example, wantaem hem ask olsem: “Simon, wanem nao tingting bilong iu? Olketa king bilong earth kasem selen or hed tax from hu nao? From olketa son bilong olketa or from difren pipol?” (Matthew 17:25) Maet iumi enjoyim tumas for explainim Bible long pipol, bat iumi mas letem student for talem tingting bilong hem and explainim samting wea iumi storyim insaed long Bible study. And tu, iumi shud no askem pipol staka kwestin tumas. Bat iumi mas tingim feeling bilong man, iusim olketa gudfala tokpiksa and olketa kwestin wea bae helpem hem for minim olketa point from Bible wea stap insaed olketa pablikeson bilong iumi.
18. For mekem iumi “savve hao for teach gud,” wanem nao iumi mas duim?
18 Bible hem story abaotem ‘savve bilong man for teach gud.’ (2 Timothy 4:2; Titus 1:9) For savve hao for teach gud hem no minim for helpem samwan for rememberim nomoa information wea tru. Iumi shud trae for helpem Bible student for luksavve hao samting wea tru hem difren from samting wea no tru, samting wea gud hem difren from samting wea nogud, and wisdom hem difren from krangge fasin. Taem iumi duim diswan and traem best for mekem love wea man garem for Jehovah insaed heart bilong hem kamap moa big, maet hem luksavve why hem shud obeyim Hem.
Strong for Share Long Waka for Mekem Pipol Kamap Disaepol
19. Long wanem wei nao evri Christian share for helpem samwan kamap disaepol?
19 Christian kongregeson hem wanfala organization for helpem pipol kamap disaepol. Taem wanfala niu wan hem kamap disaepol, evriwan insaed kongregeson hapi, no datfala Witness nomoa wea faendem hem and helpem hem for lanem samting wea Bible teachim. Taem wanfala pikinini hem lus, maet full community nao lukaotem hem, bat maet gogo wanfala man nomoa hem faendem datfala pikinini. Bat taem hem tekem pikinini hia kam bak long parents bilong hem, evriwan wea lukaotem hem nao hapi. (Luke 15:6, 7) Semsem tu witim waka for helpem narawan kamap disaepol. Evri Christian nao share for lukaotem olketa wea maet kamap disaepol bilong Jesus. And taem wanfala niu wan start for attendim olketa meeting long Kingdom Hall, evri Christian wea stap share for helpem hem tinghae long tru worship. (1 Corinthians 14:24, 25) So, evri Christian fit for hapi bikos evri year plande handred thousand pipol kamap niu disaepol.
20. Wanem nao iu shud duim sapos iu laek for teachim nara pipol abaotem truth insaed Bible?
20 Plande faithful Christian hapi tumas for teachim samwan abaotem Jehovah and tru worship. Bat nomata olketa traem best, maet olketa no duim datwan yet. Sapos iu tu wanfala olsem, gohed for strongim love bilong iu for Jehovah, showimaot interest long pipol, garem fasin for sakrifaesim seleva, showimaot patient fasin, and traem best for mekem savve bilong iu for teach hem kamap moabeta. Winim evri samting, prea abaotem wei wea iu barava laek teachim pipol abaotem truth. (Ecclesiastes 11:1) Iu savve hapi taem iu savve hao evri samting wea iu duim for servem Jehovah hem join insaed long datfala waka wea givim glory long God, hem nao for helpem pipol kamap disaepol.
Waswe, Iu Savve Explainim?
• Hao nao waka for helpem narawan kamap disaepol hem showimaot iumi lovem God?
• Wanem nao olketa fasin wea iumi needim for helpem nara pipol kamap disaepol?
• For “savve hao for teach gud” wanem nao iumi mas duim?
[Piksa long page 12]
Olketa Christian showimaot olketa barava lovem God taem olketa helpem narawan kamap disaepol
[Piksa long page 14]
Why nao iumi mas interest long pipol for helpem olketa kamap disaepol?
[Piksa long page 15]
Wanem nao samfala fasin iumi mas garem for helpem nara pipol kamap disaepol?
[Piksa on page 16]
Evri Christian hapi tumas for lukim gudfala samting wea kamaot from wei for helpem pipol kamap disaepol