Nomata Olketa Stap Seleva Iumi No Forgetim Olketa

APOSOL Paul hem talem olsem long olketa Christian: “Iumi shud duim gudfala samting long evriwan, . . . bat big samting nao hem for duim olsem long olketa wea garem sem biliv olsem iumi.” (Gal. 6:​10) Distaem iumi tu followim datfala toktok and duim olketa gudfala samting for helpem olketa brata and sista bilong iumi. Samfala wea needim love and help bilong iumi insaed Christian kongregeson nao hem olketa olo brata and sista wea stap long olketa nursing hom (haos wea olketa olo stap wea olketa nurse lukaftarem olketa).

Hem tru, long samfala kantri famili nao lukaftarem dadi and mami taem tufala olo. Bat long olketa nara kantri, staka olo savve stap insaed long nursing hom. So waswe long olketa olo Christian wea stap insaed long olketa nursing hom? Wanem hard samting nao olketa feisim? Wanem nao olketa savve duim sapos famili bilong olketa no tingim olketa? Wanem nao Christian kongregeson savve duim for helpem olketa? And wanem gud samting nao iumi savve kasem taem iumi go lukim olketa evritaem?

Olketa Hard Samting wea Olketa Olo Feisim Long Nursing Hom

Taem olketa olo Christian go stap long nursing hom, maet datfala haos hem long territory bilong narafala kongregeson, and from olketa long datfala kongregeson no savve long olketa olo hia, maet olketa no savve go lukim olketa evritaem. Nara samting tu, long datfala nursing hom olketa olo brata and sista stap witim pipol bilong religion. Maet datwan mekem samfala problem kamap for olketa olo bilong iumi wea stap long there.

Long samfala ples, olketa talem olketa man bilong religion for kam tekem service insaed long olketa nursing hom. Wanfala nurse hem talem diswan: “Olketa savve tekem samfala olo Witness wea no savve toktok gud long wheelchair for go long olketa service hia nomata olketa no askem olketa olo hia firstaem.” And tu, for mekem olketa olo no feel boring, plande taem olketa wakman long nursing hom savve celebratem birthday, Christmas, and Easter. Olketa savve laek givim tu kaen kaikai long olketa Witness wea spoelem conscience bilong olketa. (Acts 15:29) Sapos iumi go lukim olketa olo brata and sista bilong iumi evritaem, bae iumi savve helpem olketa for feisim olketa hard samting olsem.

Help From Kongregeson

Olketa Christian bifor luksavve hao olketa mas helpem olketa olo wea no garem famili. (1 Tim. 5:⁠9) Semsem tu distaem, olketa elder tingim and helpem olketa olo wea stap insaed olketa nursing hom long territory bilong olketa.a Robert, wanfala elder hem sei: “Sapos olketa Christian elder go lukim olketa olo for mek sure olketa nurse keepim olketa gud and for prea witim olketa, datwan bae barava helpem olketa olo. Olketa long kongregeson savve duim plande samting for helpem olketa.” Sapos iumi markem taem for go lukim olketa olo, datwan showimaot iumi garem sem tingting olsem Jehovah for lukaftarem olketa wea needim help.​—Jas. 1:⁠27.

Taem need hem kamap, olketa elder mekem arrangement for helpem olketa brata and sista wea stap insaed olketa nursing hom. Robert hem talem wanfala samting wea maet olketa needim help long hem. Hem sei: “Iumi mas encouragem olketa olo brata and sista for kam long olketa Christian meeting sapos olketa fit for duim.” Bat sapos hem no fitim for olketa go long Kingdom Hall, olketa elder savve arrangem nara samting for olketa. Jacqueline wea winim 80 year finis and wea garem sik osteoarthritis, hem savve herem olketa meeting long telephone. Hem sei: “Mi barava kasem gud samting taem mi herem olketa meeting taem olketa gohed, winim wei for herem recording bilong olketa. Mi nating laek for missim eni meeting!”

Sapos hem hard for wanfala olo Christian for herem olketa meeting long telephone, olketa elder savve recordim olketa meeting for hem. Datwan wea tekem olketa recording hia long olo brata or sista long nursing hom savve iusim datfala taem for story witim hem. Wanfala elder hem sei: “Iumi savve mekem olketa olo brata and sista hia feel olsem olketa stap yet long kongregeson taem iumi story abaotem olketa narawan long kongregeson.”

Story Witim Olketa Olo Evritaem

Hem tru, staka olo wea muv go long nursing hom olketa savve feel nogud and barava stragol. From datwan, samfala no savve laek story witim eniwan. Bat sapos iumi stretawe go lukim olketa olo brata and sista bilong iumi taem olketa muv go long nursing hom and talem olketa bae iumi helpem olketa, datwan bae barava helpem olketa for garem peace long mind and for hapi.​—Prov. 17:22.

Maet samfala tingse iumi weistim taem nomoa for go lukim olketa olo brata or sista wea start for forgetim samting, or wea no savve herehere gud, or wea nara samting mekem olketa no savve story gud witim iumi. Bat sapos iumi no givap for go lukim olketa nomata olketa no savve story gud witim iumi, iumi showimaot iumi ‘tinghae’ long olketa brata and sista bilong iumi. (Rom. 12:10) Sapos wanfala olo savve rememberim nomoa olketa samting wea happen taem hem young, iumi savve askem hem for storyim long iumi hao hem lanem truth long Bible and olketa samting wea happen taem hem young. Wanem nao iumi savve duim sapos hem stragol for talem wanfala word? Lisin gud long hem, and sapos hem stragol for talem wanfala word, talem datfala word for hem, or talem moa samting wea hem storyim and encouragem hem for gohed story. Sapos hem konfius or no savve story gud and iumi no savve minim hem, iumi bae trae for herem saond bilong voice bilong hem for minim story bilong hem.

Sapos hem hard for story nao, iu savve duim nara samting. Laurence, wanfala pioneer sista, hem evritaem go lukim Madeleine, wanfala olo Christian sista wea 80 year wea no savve toktok nao. Laurence hem talem hao nao tufala savve story. Hem sei: “Mi holem hand bilong Madeleine and mi prea for mitufala. Taem mi prea hem skwisim hand bilong mi and sat eye long mi for showimaot hem tinghae long samting wea mi talem.” Iumi savve strongim olketa olo fren bilong iumi taem iumi holem hand bilong olketa and huggim olketa.

Wanem Iumi Duim Hem Important

Sapos iumi olowe go lukim olketa olo, maet datwan savve mekem olketa nurse lukaftarem olketa gud. Danièle, wea go lukim olketa nara Witness wea stap long olketa nursing hom for samting olsem 20 year finis hem sei: “Taem olketa wakman long nursing hom lukim pipol kam lukim wanfala olo evritaem, olketa savve lukaftarem hem gud.” Robert wea iumi storyim finis hem sei: “Maet olketa nurse willing for herem idea bilong samwan wea kam lukim wanfala olo evritaem. Bat maet olketa no olsem long man wea kam samfala taem nomoa for lukim wanfala olo.” Plande taem olketa famili bilong olketa olo savve askem tumas samting long olketa nurse, so olketa nurse tinghae taem pipol wea kam lukim olketa olo talem thankiu long olketa. And tu, sapos iumi fren gud witim olketa nurse, maet olketa respectim tingting and biliv bilong olketa olo Witness wea olketa lukaftarem.

Sapos iumi ask for helpem olketa wakman long nursing hom witim eni smol samting, datwan savve mekem iumi fren gud witim olketa tu. Long samfala ples wea olketa no garem inaf nurse, olketa no savve keepim gud olketa olo. Rébecca, wea hem wanfala nurse hem sei: “Taem bilong kaikai nao hem taem wea evriwan barava busy. So maet datfala taem nao hem gudfala taem for kam lukim olketa olo and helpem olketa for kaikai.” Iumi mas no hol bak for askem olketa wakman long nursing hom for helpem olketa long eni samting wea fitim iumi for duim.

Taem iumi go evritaem long sem nursing hom, iumi savve lukim samting wea olo brata or sista bilong iumi needim and iumi savve askem olketa wakman for iumi helpem olketa olo long datwan. Maet iumi savve putim piksa bilong famili bilong olketa long rum bilong olketa or eni piksa wea olketa pikinini drawim. Iumi savve tekem kam kaleko or samting olsem soap wea wanfala olo hem needim. Sapos haos hia hem garem wanfala garden flaoa, iumi savve tekem hem aotsaed for fresh air. Laurence wea iumi storyim finis hem sei olsem: “Madeleine hem luk forward long day wea mi savve go lukim hem evri week. Taem mi tekem olketa pikinini tu for go lukim hem, stretawe hem smile and eye bilong hem shaen!” Olketa difren kaen samting olsem savve barava mekem olketa olo wea stap insaed nursing hom for feel hapi.​—Prov. 3:​27.

Evriwan Kasem Gud Samting

For go lukim wanfala olo evritaem hem savve showimaot sapos “love bilong [iumi] hem tru wan” or nomoa. (2 Cor. 8:⁠8) Long wanem wei? Taem iumi lukim body bilong wanfala fren hem gogo daon, datwan savve mekem iumi sorre tumas. Laurence hem sei: “Taem mi lukim body bilong Madeleine hem gogo daon, mi savve krae bihaen mi go lukim hem. Bat taem mi prea strong, datwan helpem mi for no fraet and hem helpem mi tu for strongim olketa wea mi go lukim.” For plande year Robert hem go lukim Larry, wanfala Christian brata wea garem sik Parkinson’s disease. Robert hem sei: “Datfala sik barava spoelem Larry gogo mi no savve heresavve wanem nao hem talem. Bat taem mifala prea, mi savve hem garem faith.”

Taem iumi go lukim olketa olo brata and sista, iumi helpem olketa bat long semtaem iumi tu kasem gud samting. Nomata olketa stap witim pipol bilong religion, olketa nating lusim Jehovah. Diswan lanem iumi for garem faith and for no fraet. From olketa laekem tumas spiritual kaikai nomata olketa no herehere gud or eye bilong olketa hem dark, datwan showimaot “samting wea mekem man laef nao, hem no bred nomoa, bat hem evri toktok wea kamaot from mouth bilong Jehovah.” (Matt. 4:⁠4) Taem iumi lukim hao smol samting nomoa savve mekem olketa olo hapi, olsem taem pikinini hem smile or taem iumi kaikai tugeta, datwan savve helpem iumi tu for hapi nomoa long wanem iumi garem. Taem iumi lukim olketa fren gud witim God, datwan savve helpem iumi for tingim wanem nao hem important long laef.

Tru tumas, evriwan long kongregeson savve kasem gudfala samting taem iumi helpem olketa olo. Hao nao olsem? From olketa olo needim love, kongregeson garem chance for showimaot olketa tingim olketa. Dastawe nomata sapos iumi lukaftarem olketa olo for lelebet taem or longtaem lelebet, iumi evriwan mas ting long datwan olsem waka wea iumi duim for narawan. (1 Pet. 4:​10, 11) Sapos olketa elder nao leadim iumi long diswan, olketa insaed kongregeson bae luksavve disfala waka for lukaftarem olketa olo hem wanfala waka wea olketa Christian mas duim. (Ezek. 34:​15, 16) Taem iumi lovem olketa olo Christian and willing for helpem olketa, iumi showim long olketa hao iumi no forgetim olketa!

[Footnote]

[Blurb long page 28]

“Taem olketa wakman long nursing hom lukim pipol kam lukim wanfala olo evritaem, olketa savve lukaftarem hem gud”

[Piksa long page 26]

Olketa prea bilong iumi savve helpem wanfala olo Witness for garem peace long mind

[Piksa long page 26]

Love wea iumi showim long olketa olo brata and sista bae strongim olketa