Kwestin Box

◼ Waswe, hem olraet nomoa for wanfala Jehovah’s Witness for kasem treatment long hospital bilong wanfala church?

Staka difren church nao ranem olketa hospital wea savve givim medical treatment. Klosap evritaem, olketa no wakem olketa hospital olsem for mekhae long Bigfala Babylon. (Rev. 18:​2, 4) Maet firstaem wanfala church hem wakem olketa hospital olsem for kasem selen nomoa. Distaem, samfala hospital garem nem nomoa wea wanfala church nao givim, bat long samfala nara hospital samfala wakman bilong church nao waka long hem.

Sapos wanfala Jehovah’s Witness hem laek for go long hospital, hemseleva nao mas disaed sapos hem bae go long hospital olsem or nomoa. Maet long tingting bilong wanfala Witness hem olraet nomoa for hem go, bat maet long tingting bilong narawan hem no olraet. (1 Tim. 1:5) Hem gud for iumi ting raonem samfala samting wea bae helpem iumi for disaedem olketa samting olsem.

Tingim diswan, maet wanfala hospital wea garem nem wea wanfala church nao givim hem stap klosap. Or maet wanfala hospital hem stap klosap, bat narafala hospital wea maet join witim wanfala church nao hem garem olketa gudfala treatment. Datkaen hospital wea garem nem wea wanfala church nao givim maet hem nomoa garem olketa gudfala treatment, or maet doctor bilong iu or man for givim treatment hem waka long datfala hospital. And tu, samfala taem olketa hospital wea join witim wanfala church maet respectim tingting bilong iu abaotem blood from iu wanfala Christian, bat maet samfala nara hospital no respectim. So olketa samting olsem nao iu mas ting raonem gud firstaem bifor iu disaed for go long wanfala hospital.

Sapos iu tingting for go long hospital wea join witim wanfala church, maet iu tingim datfala hospital olsem wanfala bisnis wea waka for kasem selen. From iu tingim datwan olsem wanfala bisnis wea wanfala church nao hem ranem and iu baem man wea duim datfala waka, diswan hem minim iu no tingting for givim selen for sapotim false religion. Hem olsem iu baem nomoa treatment wea iu kasem.

Hem tru, from iu wanfala Christian, iu mas no tekpart long eni samting bilong false worship. And tu, bae iu no iusim olketa nem olsem, “Father” or “Sista,” long olketa wea waka long datfala hospital or eni narawan wea kam. (Matt. 23:9) Iu stap long datfala hospital for kasem medical treatment nomoa, no eni nara samting moa.

Taem iu admit long hospital, iu savve talem hao iu wanfala Jehovah’s Witness and iu laekem olketa elder for kam lukim iu. Diswan hem minim iu bae kasem gudfala spiritual help taem iu stap long hospital.​—1 Thess. 5:​14.

Iumi wanwan nao mas ting raonem evri samting hia and samfala nara samting wea savve kamap, and disaed seleva wanem hospital nao hem fitim iumi for go long hem.​—Gal. 6:5.