Jehovah Lukluk Long Iumi for Helpem Iumi
“Jehovah lukluk gud long evri samting long world, mekem hem savve givim paoa long olketa wea lovem hem long full heart.”—2 CHRON. 16:9.
1. Why nao Jehovah lukluk gud long iumi?
JEHOVAH hem nambawan Dadi bilong iumi. Hem savve gud long iumi dastawe hem savve long “tingting bilong [iumi] tu.” (1 Chron. 28:9) Bat hem no lukluk for olketa mistek wea iumi duim. (Ps. 11:4; 130:3) Hem laek protectim iumi mekem no eni samting savve spoelem wei wea iumi fren witim hem and hope bilong iumi for laef olowe.—Ps. 25:8-10, 12, 13.
2. Jehovah givim paoa long hu?
2 Jehovah nomoa garem bigfala paoa and hem savve lukim evri samting. Taem pipol wea faithful long hem prea long hem, hem savve helpem olketa long hard taem wea kasem olketa. Long 2 Chronicles 16:9, hem sei: “Jehovah lukluk gud long evri samting long world, mekem hem savve givim paoa long olketa wea lovem hem long full heart.” Toktok hia showimaot Jehovah givim paoa bilong hem long olketa wea worshipim hem long full heart bilong olketa. Bat hem no tingim pipol wea laea or raverave.—Josh. 7:1, 20, 21, 25; Prov. 1:23-33.
Wakabaot Witim God
3, 4. Long wanem wei nao iumi savve ‘wakabaot witim God’? Hu nao samfala wea Bible storyim wea helpem iumi for minim diswan?
3 Maet staka pipol tingse hem hard tumas for God letem iumi for wakabaot witim hem. Bat hem nao wanem Jehovah laekem iumi for duim. Long bifor, Enoch and Noah ‘wakabaot witim God.’ (Gen. 5:24; 6:9) Moses “gohed for stand strong olsem hem lukim God finis nao.” (Heb. 11:27) King David wakabaot witim Dadi bilong hem wea stap long heven. Hem sei: “From [Jehovah] stap long raet saed bilong mi, no eni samting savve spoelem mi.”—Ps. 16:8.
4 Hem tru, iumi no savve barava holem hand bilong Jehovah and wakabaot witim hem. Bat iumi savve wakabaot witim God long tokpiksa wei. Hao nao olsem? Asaph hem sei: “Evritaem iu mekem mi for stap klosap long iu. Iu holem nao raet hand bilong mi. Toktok bilong iu hem leadim mi.” (Ps. 73:23, 24) So taem iumi followim toktok bilong Jehovah wea stap long Bible and samting wea “wakman wea faithful and wise” hem talem, iumi wakabaot witim Jehovah nao.—Matt. 24:45; 2 Tim. 3:16.
5. Wanem nao Jehovah duim wea showimaot hem tingim pipol wea faithful long hem? Wanem tingting nao iumi mas garem long Jehovah?
5 Jehovah tingim olketa wea wakabaot witim hem. Olsem wanfala dadi, hem lukaftarem olketa, protectim olketa, and lanem olketa. God hem sei: “Bae mi teachim iu olketa stretfala wei for iu followim and bae mi givim gudfala tingting long iu. Bae mi givim advaes long iu and gohed for lukaftarem iu.” (Ps. 32:8) Hem gud for iu tingim olketa kwestin hia: ‘Waswe, mi herem toktok bilong Jehovah and luksavve hem lukluk long mi from hem lovem mi? Waswe, tingting bilong mi, samting wea mi talem and duim hem showimaot mi luksavve Jehovah lukluk long mi? And taem mi duim mistek, waswe, mi luksavve Jehovah hem wanfala kaenfala Dadi wea laek helpem pipol wea repent for fren gud moa witim hem?’—Ps. 51:17.
6. Wanem nao Jehovah savve duim wea winim dadi and mami bilong iumi?
6 Maet samfala taem Jehovah helpem iumi bifor iumi duim mistek. Maet taem hem lukim heart bilong iumi, hem luksavve iumi start for laekem olketa samting wea no stret. (Jer. 17:9) Hem savve helpem iumi kwiktaem winim dadi and mami bilong iumi bikos hem savve lukim wanem nao stap insaed heart bilong iumi. (Ps. 11:4; 139:4; Jer. 17:10) Tingim wanem God duim for Baruch, wanfala fren and secretary bilong profet Jeremiah.
Jehovah Barava Gudfala Dadi Long Baruch
7, 8. (a) Hu nao Baruch? Wanem samting nao maet hem start for laekem wea no stret? (b) Wanem nao Jehovah duim wea showimaot hem tingim Baruch?
7 Baruch faithful for waka witim Jeremiah for talemaot judgment bilong Jehovah long Judah nomata datwan hem no isi. (Jer. 1:18, 19) Wanfala taem Baruch laek kasem “olketa big samting” for hemseleva. Maet hem kam from famili wea garem bignem dastawe hem duim olsem. Maet hem tingim olowe olketa samting wea hemseleva laek duim or hem laek kasem staka material samting. Iumi no savve wanem big samting nao Baruch laekem, bat iumi savve Jehovah lukim hao tingting bilong Baruch hem no stret. Kwiktaem nomoa Jehovah talem Jeremiah for story olsem long Baruch: “[Baruch] iu nao iu tok olsem: ‘Sorre long mi, from Jehovah mekem pain bilong mi big go moa! Mi wiki nao from mi sorre tumas, and mi no garem ples for rest.’” Then God hem sei: “Iu aftarem olketa big samting for iuseleva. No duim datwan nao.”—Jer. 45:1-5.
8 Jehovah no tok stret long Baruch from hem kros long hem, bat hem tingim hem olsem pikinini bilong hem. God luksavve samting wea mekem Baruch laekem olketa samting hia, hem no from rabis tingting stap long heart bilong hem. Jehovah savve tu hao Jerusalem and Judah bae finis, and hem no laekem Baruch for dae long datfala taem. Dastawe for mekem Baruch stretem tingting bilong hem, God talem Baruch moa hao bae Hem “mekem bigfala trabol kasem evri man.” Sapos hem duim olsem, bae hem no dae. (Jer. 45:5) Hem olsem God sei long Baruch: ‘Iu tingting gud firstaem. Tingim wanem nao bae klosap kasem pipol long Judah and Jerusalem wea no faithful. Iu faithful long mi, mekem iu no dae! Mi nao bae protectim iu.’ Baruch barava herem toktok bilong Jehovah, bikos taem Jerusalem hem finis 17 year bihaen, hem no dae.
9. Wanem nao ansa bilong iu long olketa kwestin long paragraf?
9 Taem iu ting raonem story bilong Baruch, tingim olketa kwestin and scripture hia: Wanem nao iu lanem abaotem Jehovah from samting wea hem duim for Baruch? Diswan showimaot God hem ting hao long pipol wea worshipim hem? (Readim Hebrews 12:9.) From iumi stap long taem wea laef hem no isi, wanem nao iumi lanem from kaonsel wea God givim long Baruch? Wanem nao iumi lanem from samting wea Baruch duim bihaen? (Readim Luke 21:34-36.) Olsem Jeremiah duim, wanem nao olketa elder savve duim for showimaot olketa tingim pipol bilong God olsem Jehovah?—Readim Galatians 6:1.
Son Showimaot Love Olsem Dadi
10. Wanem nao mekem Jesus fit for Hed bilong Christian kongregeson?
10 Long bifor, Jehovah iusim olketa profet and olketa nara faithful man for showimaot love bilong hem long pipol bilong hem. Bat distaem Hed bilong Christian kongregeson nao showimaot diswan, wea hem nao Jesus Christ. (Eph. 1:22, 23) Dastawe buk bilong Revelation hem storyim Jesus olsem pikinini sheepsheep wea garem “sevenfala eye. Olketa eye hia minim sevenfala spirit bilong God wea hem sendem go aot long full world.” (Rev. 5:6) From Jesus kasem full paoa bilong holy spirit bilong God, hem barava luksavve long evri samting. Hem savve gud long iumi and hem savve long evri samting wea happen.
11. Wanem waka nao Jesus duim? Long wanem wei nao hem garem semkaen tingting olsem Dadi bilong hem long iumi?
11 Jesus hem no olsem policeman wea lukluk kam daon from heven. Bat olsem Jehovah, hem lukluk long iumi olsem wanfala dadi wea lovem iumi. Wanfala title bilong Jesus hem “Dadi for Olowe.” Datwan showimaot hao long future hem bae givim laef olowe long pipol wea showimaot faith long hem. (Isa. 9:6) And from Jesus hem Hed bilong Christian kongregeson, hem savve mekem olketa strongfala Christian, main wan nao olketa elder, for strongim iumi or for kaonselem iumi.—1 Thess. 5:14; 2 Tim. 4:1, 2.
12. (a) Wanem nao olketa leta wea sevenfala kongregeson kasem hem showimaot abaotem Jesus? (b) Long wanem wei nao olketa elder savve showimaot olketa garem sem tingting olsem Jesus long kongregeson?
12 Jesus barava tingim kongregeson and datwan showaot long olketa leta wea olketa elder long sevenfala kongregeson long first century kasem. (Rev. 2:1–3:22) Olketa leta hia showimaot Jesus luksavve long wanem hem gohed long kongregeson and hem barava tingim olketa wea followim hem. Hem barava tingim iumi distaem tu bikos samting wea datfala vision long Revelation storyim, hem kamap tru long “Day bilong Lord.”a (Rev. 1:10) Jesus iusim olketa elder long kongregeson for showimaot love bilong hem. Hem iusim olketa man hia for strongim iumi or kaonselem iumi. (Eph. 4:8; Acts 20:28; readim Isaiah 32:1, 2.) Taem olketa elder helpem iu, waswe, iu ting long datwan olsem Jesus nao barava tingim iu?
Kasem Help Long Barava Taem
13-15. God savve ansarem prea bilong iumi long wanem wei? Storyim samfala example.
13 Waswe, enitaem iu barava prea long God for helpem iu and then samwan long kongregeson nao encouragem iu? (Jas. 5:14-16) Or maet wanfala tok long meeting or samting wea iu readim long olketa buk bilong iumi nao helpem iu long datfala problem. Plande taem Jehovah ansarem prea bilong iumi long wei olsem. Tingim wanfala sista wea barava nogud samting kasem hem. Bihaen hem herem tok bilong wanfala elder, hem go story witim brata hia. Hem no storyim problem wea kasem hem, bat hem talem hem tinghae long samfala scripture wea brata hia mekhae long hem. Olketa scripture barava fitim problem bilong hem and helpem hem. Hem hapi tumas from hem go long datfala meeting!
14 Jehovah savve helpem iumi taem iumi prea long hem. Tingim thrifala man wea stap long prison. Olketa lanem truth and kamap anbaptaes pablisa. From wanfala nogud samting hem happen insaed datfala prison, olketa bigman long prison stopem evri prisoner for duim staka samting. Olketa prisoner kros tumas long datwan, so olketa planim hao bihaen olketa kaikai long next morning, bae olketa no givim bak pleit bilong olketa. So wanem nao thrifala anbaptaes pablisa hia bae duim? Sapos olketa saedem olketa prisoner, olketa no followim nao toktok bilong Jehovah long Romans 13:1. Bat sapos olketa no saedem olketa prisoner, olketa nara prisoner bae kros tumas long thrifala.
15 From thrifala man hia no savve story tugeta abaotem diswan, olketa prea long God for olketa garem gudfala tingting. Long datfala morning, thrifala evriwan disaedem sem samting. Olketa no laek for kaikai. Taem olketa gard kam for kolektem olketa pleit, thrifala man hia no garem eni pleit. Olketa hapi tumas bikos Jehovah “herem prea” bilong olketa!—Ps. 65:2.
No Warim Tumas Future
16. Hao nao preaching waka showimaot Jehovah tingim pipol?
16 Disfala preaching waka wea gohed long full world tu showimaot Jehovah tingim pipol nomata wea nao olketa stap. (Gen. 18:25) Plande taem Jehovah iusim olketa angel for leadim pipol bilong hem long olketa wea laek savve long God, nomata sapos olketa hia stap long ples wea iumi no preach yet long hem. (Rev. 14:6, 7) Tingim Philip, wanfala man long first century wea preachim gud nius. God iusim wanfala angel for leadim hem long wanfala man from Ethiopia and storyim olketa Scripture long hem. Wanem nao happen bihaen? Datfala man herem gud nius and hem baptaes.b—John 10:14; Acts 8:26-39.
17. Why nao iumi mas no warim tumas future?
17 From disfala world hem gogo for finis, “hard taem wea mekem pipol wari tumas” bae gohed. (Matt. 24:8) Maet price bilong kaikai hem hae tumas distaem, weather hem nogud, or selen hem hard tumas. Maet hem no isi for kasem waka for selen, and maet olketa wea waka mas waka staka hour moa. Nomata wanem samting nao kasem iumi, olketa wea tingim Jehovah firstaem no warim tumas olketa samting hia. Olketa savve God lovem olketa and hem bae lukaftarem olketa. (Matt. 6:22-34) Tingim wanem Jehovah duim for Jeremiah taem Jerusalem hem finis long 607 B.C.E.
18. Wanem nao Jehovah duim for Jeremiah wea showimaot hem lovem hem?
18 Taem army bilong Babylon raonem Jerusalem, Jeremiah hem prisoner long Courtyard Bilong Gard. Hao nao bae hem kasem kaikai? Sapos hem no prisoner, hemseleva savve go lukaotem kaikai. Bat from hem prisoner, hem mas weitim nara pipol nao for givim kaikai long hem. Staka pipol hia heitim hem! Nomata olsem, Jeremiah trustim God from hem nao promis for lukaftarem hem. Waswe, Jehovah duim wanem hem promisim? Barava nao! Evriday Jeremiah kasem “wanfala raon bred . . . go kasem taem bred hem finis long datfala taon.” (Jer. 37:21) Jeremiah, Baruch, Ebed-melech, and olketa narawan no dae long datfala taem wea pipol hangre tumas, kasem sik, and dae.—Jer. 38:2; 39:15-18.
19. Nomata wanem samting maet happen long future, iumi mas gohed for duim wanem samting?
19 Tru tumas, “Jehovah hem lukluk long olketa gudfala pipol, and hem herem prea bilong olketa.” (1 Pet. 3:12) Waswe, iu hapi tumas from Jehovah lukluk kam long iu? Waswe, iu no fraet bikos iu savve hem lukluk long iu for helpem iu? Sapos olsem, gohed wakabaot witim God nomata wanem samting maet happen long future. Iumi savve Jehovah bae lukaftarem olketa wea faithful long hem.—Ps. 32:8; readim Isaiah 41:13.
[Olketa Footnote]
a Nomata olketa leta hia hem for olketa anointed Christian, hem savve helpem tu evriwan wea worshipim God.
b Acts 16:6-10 hem storyim nara wei wea God savve leadim pipol bilong hem. Datfala scripture hem sei “holy spirit stopem” Paul and olketa wea go witim hem for no preach long Asia and Bithynia. Bat God leadim olketa for go preach long Macedonia, bikos staka pipol long there nao laek herem gud nius.
Waswe, Iu Savve Minim Kam?
• Wanem nao iumi savve duim wea showimaot iumi ‘wakabaot witim God’?
• Wanem nao Jehovah duim for Baruch wea showimaot hem lovem hem?
• From Jesus hem Hed bilong Christian kongregeson, hao nao hem showimaot olketa wei bilong Dadi bilong hem?
• Wanem nao olketa samting wea iumi savve duim wea showimaot iumi trustim God?
[Piksa long page 9]
Olsem Jeremiah tingim Baruch, olketa elder tingim narawan olsem Jehovah tu
[Piksa long page 10]
Long wanem wei nao Jehovah savve helpem iumi long barava taem?