Followim Jesus for No Fraet Taem Iumi Preach
“Mifala no fraet for talemaot gud nius . . . long iufala.”—1 THESS. 2:2.
1. Why nao gud nius abaotem Kingdom hem nambawan?
HEM naes tumas taem iumi herem gud nius! Gud nius abaotem Kingdom bilong God nao hem nambawan nius. Disfala Kingdom bae finisim wei for safa, sik, pain, sorre, and dae. Man wea lisin long gud nius savve kasem laef olowe, lanem plan bilong God for olketa man, and savve wanem nao hem mas duim for fren witim God. Maet iu tingse evriwan bae hapi tumas for herem disfala nius wea Jesus talem long pipol. Bat hem no olsem.
2. Minim kam disfala toktok bilong Jesus: “Mi kam for mekem pipol no stap gud tugeta.”
2 Jesus talem olketa disaepol: “No tingse mi kam for mekem evriwan long earth stap long peace. Mi kam for mekem pipol no stap gud tugeta. Mi kam for mekem son hem againstim dadi bilong hem, dota hem againstim mami bilong hem, and dota-in-law hem againstim mami-in-law bilong hem. Tru tumas, bae enemy bilong man nao olketa wea stap long sem haos witim hem.” (Matt. 10:34-36) Maet iu tingse pipol bae laek herem gud nius bat staka no laekem datwan. Samfala againstim olketa wea talemaot gud nius, nomata sapos olketa long sem famili.
3. Wanem nao iumi mas garem mekem iumi savve duim preaching waka?
3 Iumi tu talemaot olketa tru samting wea Jesus talemaot, and pipol distaem duim sem samting long iumi olsem pipol long bifor duim long Jesus. Iumi savve hem bae olsem nao. Jesus hem sei long olketa disaepol: “Wakaman hem no winim boss bilong hem. Sapos olketa spoelem mi, bae olketa spoelem iufala tu.” (John 15:20) Long staka kantri pipol no duim samting for spoelem iumi, bat olketa no laekem iumi and no interest long gud nius. Dastawe iumi mas garem faith and gohed strong mekem iumi no fraet taem iumi preachim gud nius.—Readim 2 Peter 1:5-8.
4. Why nao Paul mas “no fraet” for preach?
4 Maet samfala taem hem no isi for iu duim preaching waka, or maet iu fraet for preach long olketa difren wei. Sapos olsem, iu semsem tu witim staka faithful pablisa. Nomata aposol Paul hem man wea no fraet for preach and hem savve gud long truth, samfala taem hem no isi tu for hem preach. Paul hem sei olsem long olketa Christian long Thessalonica: “Iufala savve taem mifala stap long Philippi, pipol barava spoelem mifala tumas and tok nogud long mifala. Bat nomata plande pipol againstim mifala, God bilong iumi nao hem strongim mifala mekem mifala no fraet for talemaot gud nius abaotem hem long iufala.” (1 Thess. 2:2) Taem Paul and Silas stap long Philippi, olketa police whipim tufala long stik, putim olketa long prison, and lokim leg bilong tufala long tufala big timba. (Acts 16:16-24) Nomata olsem, God strongim Paul and Silas mekem olketa “no fraet” for gohed preach. Wanem nao bae helpem iumi for duim olsem tu? Bae iumi storyim wanem nao mekem olketa man long bifor no fraet for talemaot tru samting abaotem Jehovah, and wanem iumi savve duim for followim wei bilong olketa.
Pipol Bilong God Bifor Mas No Fraet Nomata Pipol Heitim Olketa
5. Why nao olketa wea faithful long Jehovah mas evritaem garem disfala wei for no fraet?
5 Jesus Christ hem barava showimaot hem no fraet. Start kam long taem God wakem olketa man, olketa man wea faithful long Jehovah mas evritaem garem disfala wei for no fraet. Why nao olsem? Bihaen nogud samting happen long garden bilong Eden, Jehovah talem hao pipol wea worshipim God and olketa wea worshipim Satan bae heitim each other. (Gen. 3:15) Diswan hem happen nao taem Cain killim dae brata bilong hem Abel, wea hem raeteous man. Pipol heitim Enoch tu, wea hem nara faithful man wea stap bifor Flood. Enoch talemaot hao God bae kam witim staka thousand holy angel bilong hem for judgem olketa wea no followim God. (Jude 14, 15) Staka pipol no laek herem disfala message wea Enoch talemaot. Pipol heitim Enoch and sapos Jehovah no tekem laef bilong hem firstaem, luk olsem bae pipol hia killim hem dae. Enoch barava showimaot hem no fraet!—Gen. 5:21-24.
6. Why nao Moses mas no fraet taem hem go story long Pharaoh?
6 Tingim tu Moses. Taem hem mas story long Pharaoh hem no fraet, nomata Pharaoh hem man wea pipol ting long hem olsem wanfala god, son bilong datfala sun god Ra. Maet Pharaoh hem olsem olketa nara Pharaoh bifor tu wea worshipim olketa seleva. Eni samting wea Pharaoh talem, pipol mas followim nao. Pharaoh hem garem bigfala paoa, hem praod, strong long tingting bilong hem, and no laekem narawan for talem hem wanem for duim. Moses hem hambol man nomoa wea lukaftarem olketa sheepsheep. Hem mas go lukim Pharaoh no wanfala taem nomoa bat staka taem, and man hia no laekem Moses tu for kam lukim hem. Wanem nao Moses talem long hem wea bae happen? Olketa nogud trabol. And wanem nao hem talem Pharaoh for duim? Hem laekem Pharaoh for letem samting olsem 3 million slave bilong Pharaoh for lusim Egypt! Waswe, Moses mas garem wei for no fraet? Barava nao!—Num. 12:3; Heb. 11:27.
7, 8. (a) Wanem nao kasem olketa faithful man long bifor? (b) Wanem nao helpem olketa for no fraet for saedem tru worship?
7 Insaed staka handred bihaen, olketa profet and olketa nara faithful man no fraet for saedem tru worship. Pipol long world bilong Satan duim olketa nogud samting long olketa. Paul hem sei: “Olketa sutim olketa long ston, testim faith bilong olketa, katem body bilong olketa long tufala haf, busarem olketa dae long naef for faet, olketa werem skin bilong sheepsheep and goat, olketa poor tumas, kasem trabol, and pipol spoelem olketa.” (Heb. 11:37) Wanem nao mekem olketa faithful man hia for gohed strong? Long samfala verse bifor datwan, aposol Paul storyim wanem nao mekem Abel, Abraham, Sarah, and olketa narawan for gohed strong. Hem sei: “Nomata olketa no lukim olketa promis bilong God kamap tru long taem bilong olketa, olketa garem faith long olketa and luk forward long taem wea olketa promis hia bae kamap tru.” (Heb. 11:13) From profet Elijah, Jeremiah, and olketa narawan trustim hao Jehovah bae mekem olketa promis bilong hem kamap tru, datwan helpem olketa tu for gohed strong and no fraet for saedem tru worship.—Titus 1:2.
8 Olketa hia tingim nambawan future wea olketa bae kasem. Taem olketa laef bak moa long future, olketa bae isisi kamap perfect and Christ Jesus witim 144,000 wea rul witim hem bae mekem olketa “kamap free from sin.” (Rom. 8:21) Nara samting wea mekem Jeremiah and olketa narawan long bifor no fraet hem bikos olketa trustim wanem Jehovah talem long Jeremiah. Hem sei: “Olketa bae faetem iu, bat olketa bae no winim iu bikos mi nao stap witim iu and sevem iu.” (Jer. 1:19) Taem iumi tingim olketa gud samting wea God promisim for iumi and hao Jehovah bae no letem eni samting spoelem wei wea iumi fren witim hem, datwan strongim iumi tu.—Prov. 2:7; readim 2 Corinthians 4:17, 18.
Love Mekem Jesus No Fraet for Preach
9, 10. Wanem nao Jesus duim wea showimaot hem no fraet long (a) olketa bigman bilong religion, (b) olketa soldia, (c) hae priest, (d) Pilate?
9 Jesus duim staka difren samting wea showimaot hem no fraet. Nomata olketa wea garem paoa and bignem heitim Jesus, Jesus talem stret message wea God laekem pipol for savve long hem. Hem tok againstim olketa bigman bilong religion bikos olketa tingse olketa seleva nao raeteous. Hem tok againstim olketa from olketa teachim olketa laea samting tu. Jesus talem stret God bae judgem olketa. Wanfala taem hem sei long olketa: “Iufala man wea teachim law and olketa Pharisee, iufala laea tumas! Barava nogud samting nao bae kasem iufala bikos iufala olsem olketa grev wea olketa paintim white wea luk naes tumas, batawea, insaed olketa fulap long bon bilong man wea dae and evrikaen samting wea no klin. So iufala olsem ia. Pipol tingse iufala gud tumas, batawea, iufala savve laea tumas and duim enikaen rabis samting nomoa.”—Matt. 23:27, 28.
10 Taem olketa soldia kam long garden wea nem bilong hem Gethsemane, Jesus no fraet for talem olketa hu nao hem. (John 18:3-8) Olketa tekem Jesus go long Hae Kot bilong olketa Jew and hae priest kwestinim hem. Nomata Jesus savve hae priest hem laek faendem eni samting mekem hem savve accusim hem and killim hem dae, Jesus no fraet bat hem talem stret Hem nao Christ and Son bilong God. Hem talem olketa tu: “Iufala bae lukim Son bilong man hem sidaon long raet saed bilong God wea garem paoa ovarem evri samting. And bae iufala lukim Son bilong man hem kakam long olketa cloud long skae.” (Mark 14:53, 57-65) No longtaem bihaen datwan, olketa taemapem hand bilong Jesus and tekem hem go long Pilate. Pilate savve mekem hem kamap free. Bat Jesus no laek talem eni samting moa long Pilate nomata olketa hed priest accusim hem. (Mark 15:1-5) Jesus barava needim wei for no fraet taem evri samting hia happen.
11. Wanem nao bae mekem iumi no fraet for preach?
11 Bat Jesus hem sei long Pilate: “Mi born kam long disfala world for talem olketa tru samting.” (John 18:37) Jehovah talem Jesus for preachim gud nius, and Jesus hapi for duim datwan bikos hem lovem Dadi bilong hem long heven. (Luke 4:18, 19) Jesus lovem pipol tu. Hem savve olketa kasem hard taem. Iumi tu no fraet for preach bikos iumi lovem God and lovem pipol.—Matt. 22:36-40.
Holy Spirit Strongim Iumi for No Fraet for Preach
12. Wanem nao mekem olketa firstfala disaepol hapi?
12 Samfala week bihaen Jesus dae, olketa disaepol hapi bikos Jehovah helpem samfala pipol moa for kamap disaepol. Long wanfala day nomoa, samting olsem 3,000 Jew and pipol wea followim religion bilong olketa Jew olketa baptaes long Jerusalem long taem bilong Pentecost! Masbi evriwan long Jerusalem storyim nao datfala samting wea happen! Bible hem sei: “Olketa aposol duim staka mirakol and saen. Evriwan lukim diswan and hem mekem olketa barava respectim God.”—Acts 2:41, 43.
13. Why nao olketa brata askem Jehovah for mekem olketa no fraet, and wanem nao happen?
13 From olketa bigman bilong religion kros tumas, olketa putim Peter and John long cell go kasem next day and talem olketa for no story moa abaotem Jesus. Taem tufala kamaot from prison, tufala storyim long olketa brata wanem nao happen, and evriwan prea long Jehovah abaotem wei wea pipol againstim olketa and askem God: “Jehovah, . . . mekem olketa wakaman bilong iu no fraet for talemaot message bilong iu.” Wanem nao happen? “God givim holy spirit long evriwan and olketa nating fraet nao for talemaot message bilong God.”—Acts 4:24-31.
14. Long wanem wei nao holy spirit helpem iumi long preaching waka?
14 Iumi luksavve holy spirit bilong Jehovah nao helpem olketa disaepol for no fraet for talemaot message bilong God. Iumi no depend long strong bilong iumiseleva bat Jehovah nao mekem iumi no fraet for talemaot truth long pipol and long olketa wea againstim datfala message. Hem bae givim holy spirit long iumi sapos iumi askem hem. Jehovah savve helpem iumi for gohed strong and no fraet taem pipol againstim iumi tu.—Readim Psalm 138:3.
Olketa Christian Distaem No Fraet for Preach
15. Wanem nao tingting bilong pipol abaotem truth?
15 Long bifor and distaem tu, samfala pipol laek herem truth bat samfala no minim or no tinghae long wei wea iumi worshipim God. Samfala pipol tok daonem iumi, tok spoelem iumi, or heitim iumi olsem Jesus talem finis. (Matt. 10:22) Samfala taem pipol talem olketa laea story long radio, television, or long niuspepa for spoelem iumi. (Ps. 109:1-3) Nomata olsem, pipol bilong Jehovah evriwea long world no fraet for talemaot gud nius.
16. Wanem experience nao showimaot pipol savve changem tingting bilong olketa taem olketa lukim iumi no fraet for preach?
16 Taem pipol lukim iumi no fraet, datwan savve mekem olketa changem tingting bilong olketa abaotem Kingdom message wea iumi preachim. Wanfala sista long Kyrgyzstan hem sei: “Taem mi go preach, wanfala man hem sei long mi: ‘Mi biliv long God bat mi no bilivim God bilong olketa Christian. Sapos iu kam long haos bilong mi enitaem moa, mi bae talem dog bilong mi for baetem iu!’ Mi lukim wanfala big bulldog wea olketa taengem witim chain standap bihaen long hem. Bat from hem taem for givimaot Kingdom Nius namba 37, ‘Klosap Nao False Religion Bae Finis!,’ mi go bak moa long sem haos bikos mi tingse maet mi meetim narawan long famili. Batawea, sem man nomoa mi meetim. Semtaem nomoa mi prea long Jehovah and then mi sei long man hia: ‘Hello, mi no forgetim story bilong iumi tufala thrifala day go finis, and mi no forgetim dog bilong iu tu. Bat mi laek tumas for givim iu disfala tract bikos mi tu biliv long wanfala tru God olsem iu. Klosap nao God bae judgem olketa religion wea no mekhae long hem. Iu savve lanem samfala samting moa abaotem diswan taem iu readim disfala tract.’ Mi sapraes tumas man hia tekem datfala Kingdom Nius. Then mi go long nara haos. Tu-thri minute bihaen, man hia ran kam long mi witim datfala Kingdom Nius. Hem sei: ‘Mi readim finis nao. Wanem nao mi mas duim mekem God no judgem mi?’ ” Man hia start for study and hem kam long olketa Christian meeting.
17. From wanfala sista no fraet, hao nao datwan helpem Bible study bilong hem?
17 Taem iumi no fraet for preach, datwan savve strongim olketa narawan tu for no fraet. Wanfala sista long Russia hem offerim magasin long wanfala woman long bas. Then nomoa wanfala man standap kam and hem pullim datfala magasin, skwisim, and torowem long floor. Hem tok swear long datfala sista and talem sista hia for givim kam address bilong hem and for no preach long vilij. Sista hia prea long Jehovah for helpem hem and hem tingim disfala toktok bilong Jesus: “No fraetem olketa wea savve killim iufala dae.” (Matt. 10:28) Sista hia no fraet bat hem standap and hem sei long datfala man: “Bae mi no givim iu address bilong mi and bae mi gohed preach long vilij.” Then sista hia go aot from bas. Hem no savve wanfala Bible study bilong hem insaed long datfala bas. Datfala study bilong hem no go long olketa meeting bikos hem fraetem man. Bat taem hem lukim sista hia no fraet, Bible study hia disaed for go long olketa meeting.
18. Wanem nao bae helpem iu for olsem Jesus and no fraet for preach?
18 From staka pipol long world no followim God, iumi mas olsem Jesus and garem wei for no fraet taem iumi preach. Wanem nao bae helpem iu for no fraet? Tingim future bilong iu. Gohed lovem God and pipol. Prea long Jehovah for helpem iu for no fraet. Tingim evritaem iu no stap seleva bat Jesus stap witim iu. (Matt. 28:20) Holy spirit bae strongim iu. And Jehovah bae blessim and helpem iu. So no fraet bat tingim disfala toktok: “Jehovah nao helpem mi. Bae mi no fraet. Wanem nao man savve duim long mi?”—Heb. 13:6.
[Piksa long page 21]
Jesus no fraet for tok againstim olketa bigman bilong religion
[Piksa long page 23]
Jehovah helpem iumi for no fraet for preach
[Piksa long page 23]
Wanem Nao Ansa Bilong Iu?
• Why nao olketa wea worshipim God mas garem wei for no fraet?
• Wanem nao iumi lanem abaotem wei for no fraet from . . .
olketa faithful man bifor?
Jesus Christ?
olketa firstfala Christian?
olketa Christian distaem?