Gohed for Talemaot Toktok Bilong God Witim Fasin for No Fraet
1 Iumi olketa Christian minister savve hao no evriwan bae lisin taem iumi preach. (Matt. 10:14) Nomata olsem, iumi no letem datwan for stopem iumi for talemaot gud nius. (Prov. 29:25) Wanem nao helpem iumi for gohed talemaot toktok bilong God witim fasin for no fraet?
2 Aposol Paul barava tinghae ‘long nambawan savve abaotem Christ Jesus.’ Diswan muvim hem for toktok witim “strongfala biliv.” (Phil. 3:8; 1 Thess. 1:5) Nomata samfala ting message wea hem preach abaotem hem wik and krangge samting, Paul luksavve hao datfala message hem “paoa bilong God for givim salvation long evriwan wea garem faith.” (Rom. 1:16) Dastawe, nomata pipol againstim hem, hem gohed for “toktok witim fasin for no fraet thru long paoa bilong Jehovah.”—Acts 14:1-7; 20:18-21, 24.
3 Man wea Givim Strong Long Iumi: Wei wea Paul no fraet for witness no kam from strong bilong hemseleva. Hem story olsem abaotem hemseleva and Silas: “Firstaem bihaen mifala safa and olketa duim nogud samting long mifala . . . long Philippi, mifala kasem strong from God bilong iumi for no fraet for talem iufala gud nius bilong God witim bigfala wei for stragol.” (1 Thess. 2:2; Acts 16:12, 37) And tu, taem Paul prisoner long Rome, hem askem olketa narawan for prea for hem mekem hem gohed for talemaot gud nius ‘witim fasin for no fraet, wea datwan nao samting wea hem mas duim.’ (Eph. 6:18-20) From hem depend long Jehovah and no long hemseleva, Paul fit for gohed story abaotem toktok bilong God witim fasin for no fraet.—2 Cor. 4:7; Phil. 4:13.
4 Datwan hem semsem distaem tu. Wanfala brata wea faendem hem hard tumas for talem olketa long wakples hem wanfala Jehovah’s Witness and for duim enitaem witnessing, hem prea abaotem datwan and hem start for witness. Firstaem, wanfala wakfren bilong hem no laek for lisin, bat taem brata hia storyim resurrection hope, datwan lead go long wei for man hia studyim Bible. Start long datfala taem brata hia mekius long evri chance for givim witness. Long narafala ples wea hem waka, hem helpem 34 pipol insaed 14-fala year gogo olketa fit for baptaes. Iumi savve trustim hao Jehovah bae strongim iumi long sem wei ‘for talemaot toktok bilong God witim fasin for barava no fraet.’—Acts 4:29.