Famili Worship—Mas Duim for Sevem Laef!
TINGIM hao “war bilong bigfala day bilong God Olmaeti” bae mekem man fraet tumas! (Rev. 16:14) Profet Micah storyim day bilong Jehovah olsem: “Olketa maunten mas melt . . . olsem kandol wea hem laet. And olketa flat ples bae open long tufala haf olsem wata hem ran kam daon long wanfala hill.” (Mic. 1:4) Wanem nogud samting nao bae kasem pipol wea no worshipim Jehovah? Bible hem sei: “Long datfala day, Jehovah bae killim dae pipol from wansaed long earth go kasem narasaed long earth.”—Jer. 25:33.
From Jehovah talem firstaem long iumi olketa samting hia, hem gud for olketa wea hed long famili and olketa mami long famili wea dadi no stap for tingim diswan abaotem pikinini bilong olketa wea fit for ting raonem samting: ‘Waswe, bae olketa stap laef bihaen Armageddon?’ Bible showimaot sapos olketa pikinini fren gud finis witim Jehovah fitim age bilong olketa, olketa bae no dae.—Matt. 24:21.
Why Hem Important for Markem Taem for Famili Worship
Iufala dadi or mami, waka hard for trainim pikinini bilong iufala mekem iufala “lanem olketa long wei bilong Jehovah.” (Eph. 6:4) Hem important tumas for studyim Bible witim olketa pikinini. Iumi laekem olketa young wan for olsem olketa Christian long Philippi. Paul tok hae abaotem olketa bikos olketa hapi tumas for obeyim Jehovah. Hem sei: “Olketa wea mi lovem, iufala obeyim God evritaem taem mi stap witim iufala. So iufala mas gohed for duim diswan tu nomata mi no stap witim iufala. Gohed duim olketa samting for sevem iufala bat duim long wei for fraet long God.”—Phil. 2:12.
Waswe, olketa pikinini bilong iu obeyim law bilong Jehovah taem iu no stap witim olketa? Waswe taem olketa long skul? Wanem nao iu savve duim mekem olketa pikinini luksavve olketa bae kasem gud samting taem olketa obeyim law bilong Jehovah nomata taem iu no stap?
Sapos iufala duim Famili Worship evritaem, diswan savve helpem pikinini bilong iu for obeyim Jehovah nomata taem iu no stap witim olketa. So iumi bae storyim thrifala important samting wea iu savve duim for mekem famili Bible study gohed gud.
Duim Famili Worship Evritaem
Bible storyim hao God talem olketa angel for go lukim hem long olketa taem wea hem markem. (Job 1:6) Hem gud for iu duim olsem tu for olketa pikinini bilong iu. Markem day and taem for Famili Worship, and duim long taem hia wea iu markem. Nara samting tu, markem nara day and taem mekem sapos eni samting happen and iufala no savve duim long day wea iufala markem finis, iufala savve duim long nara day hia.
No garem wei for tingse hem olraet for duim Famili Worship samfala taem nomoa. No forgetim hao olketa pikinini bilong iu nao important Bible study bilong iu. Satan laek kaikaim olketa. (1 Pet. 5:8) Sapos iu iusim taem for Famili Worship for lukluk movie or duim nara samting wea no important, Satan hem win nao.—Eph. 5:15, 16; 6:12; Phil. 1:10.
Storyim Samting wea Helpem Evriwan
Famili Worship hem no taem nomoa for lanem olketa tru samting. Trae hard for storyim samting wea bae helpem evriwan. Wanem nao iu savve duim? Samfala taem hem gud for storyim samting wea bae happen long pikinini. Waswe sapos iu lanem pikinini hao for story long preaching waka? Olketa young wan savve hapi tumas for duim samting wea olketa savve duim gud. Lane hao for story long preaching waka and wanem iumi savve talem sapos eni man talem toktok for againstim wanem iumi preachim. Diswan bae helpem olketa for no fraet for duim olketa difren wei for preachim Kingdom.—2 Tim. 2:15.
Iufala savve practicem tu wanem olketa pikinini savve duim taem olketa nara pikinini switim olketa for duim samting wea no stret. Famili bilong iufala savve storyim tugeta Chapter 15 long buk Questions Young People Ask—Answers That Work, Volume 2. Long page 132 and 133 hem garem title “Peer Pressure Planner.” Hem talem samfala idea wea pikinini savve followim and pikinini savve raetem wanem hem bae duim taem wanfala samting happen. Toktok wea stap long botom long page 133 hem garem disfala naes toktok for olketa young wan: “Lanem toktok wea iu bae talem witim mami or dadi or mature fren.” Waswe sapos samfala taem iufala duim diswan long Famili Worship?
Long taem for Famili Worship, mami and dadi savve mekhae long wei for olketa pikinini garem goal wea bae mekem olketa fren gud witim Jehovah and busy for duim olketa samting for worshipim hem. Disfala buk Young People Ask, Volume 2, chapter 38 wea garem title “What Will I Do With My Life?” hem storyim olketa nambawan samting abaotem diswan. Taem iufala storyim disfala chapter, helpem pikinini luksavve wei for worshipim Jehovah hem nambawan samting. Helpem pikinini for laek pioneer, waka long Bethel, go long Ministerial Training Skul, or duim nara samting long full-taem service.
Tingim disfala samting. Samfala mami and dadi wea laekem tumas for pikinini kasem gudfala samting, olketa no praisem pikinini for gudfala samting wea hem duim distaem. Hem tru, hem gud for encouragem pikinini for garem goal for waka long Bethel, or duim missionary waka. Bat taem iu encouragem hem, no mekem hem feel nogud and sorre bikos iu laekem hem for duim samting wea iuseleva nao laekem. (Col. 3:21) Hem gud for iu tingim evritaem pikinini bilong iu hem lovem Jehovah bikos hemseleva laek duim olsem bat no from iu nao laekem hem for lovem Jehovah. (Matt. 22:37) So praisem pikinini long samting wea hem duim gud and no tingim tumas samting wea hem no duim. Helpem hem for tinghae long evri samting wea Jehovah duim finis. Then pikinini bilong iuseleva nao bae laek duim samting from hem savve long gudfala wei bilong Jehovah.
Mekem Hem Interesting
Mek-thri samting for mekem Famili Worship gohed gud nao hem for mekem hem interesting. Wanem nao iu savve duim? Maet samfala taem iufala savve herehere long drama or lukim video bilong Olketa Jehovah’s Witness and story abaotem datwan. Or iufala savve readim Bible tugeta, bat markem firstaem hu nao bae readim toktok bilong wanem man long datfala reading.
Olketa Wastaoa and Awake! garem olketa article wea hem gud for famili storyim tugeta. Maet iu savve iusim article long page 31 long Awake! wea garem title “How Would You Answer?” Long pablik Wastaoa magasin hem garem article “For Young Pipol.” Samfala taem hem garem article “Lanem Pikinini Bilong Iu,” for olketa smol pikinini.
Mami and dadi wea garem olketa teenage pikinini savve iusim article “Young People Ask” long Awake! and long buk Young People Ask, Volume 2. Storyim tu box “What Do You Think?” wea stap long end long evri chapter long datfala buk. Olketa kwestin long box hem no for review nomoa, bat iu savve iusim olsem aotlaen for famili story tugeta.
No askem tumas kwestin long olketa pikinini long taem for Famili Worship. No talem pikinini for readim big wanem hem raetem long page wea garem title “My Journal” or long eni nara page long buk wea talem for pikinini raetem tingting bilong hemseleva. Long ples wea hem sei “A Note to Parents” long page 3, hem talem disfala toktok: “No poke-nose long wanem olketa teenage pikinini raetem mekem olketa savve raetem evri samting wea olketa tingim. Bae gogo olketa seleva storyim olketa samting wea olketa raetem.”
Sapos iu duim Famili Worship evritaem, storyim samting wea helpem evriwan, and mekem hem interesting, Jehovah bae blessim hard waka bilong iu. Disfala spesol taem bae mekem famili bilong iu fren gud witim Jehovah and gohed strong.
[Box long page 31]
Duim Samting wea Difren Lelebet
“Taem mi and hasband bilong mi duim famili study witim olketa smol gele bilong mifala, mitufala storyim tugeta firstaem olketa samting wea mifala bae lanem long meeting and then mifala talem olketa gele for drawim piksa abaotem wanem olketa lanem. Samfala taem mifala actim olketa story long Bible or lanem wanem for talem taem mifala go preach. Mifala storyim nomoa wanem hem fitim for olketa lanem, hem interesting, hem helpem olketa, and olketa laekem tumas.”—J.M., America.
“Mi laek helpem boy bilong Bible study bilong mi for tinghae long wei for iusim scroll. So mifala aotem olketa namba for chapter and verse long Bible buk bilong Isaiah then mifala printim. Mifala joinim olketa page and putim stik long tufala saed. Then boy hia trae duim wanem Jesus duim long sinagog long Nazareth. Luke 4:16-21 storyim Jesus ‘openem scroll [bilong Isaiah] and faendem’ ples wea hem laek readim. (Isa. 61:1, 2) Bat taem boy hia trae duim sem samting, hem no savve faendem Isaiah 61 from hem iusim longfala scroll wea no garem namba bilong olketa chapter and olketa verse. Hem tinghae tumas hao Jesus barava savve wea for faendem ples wea hem lukaotem long scroll. Hem sei: ‘Jesus narawe nao!’”—Y.T., Japan.
[Piksa long page 30]
Practice staka taem witim olketa pikinini mekem olketa savve wanem for duim taem nara pikinini switim olketa for duim nogud samting
[Piksa long page 31]
Waka hard for mekem Famili Worship interesting