Helpem Pikinini Bilong Iu Laek for Read and Study

WEI for lanem pikinini bilong iu for read and study savve barava helpem olketa long future. Taem dadi and mami duim olsem, evriwan savve hapi! Samfala tinghae tumas long dadi and mami wea read long olketa taem olketa smol. Hem naes tumas for read and hem savve helpem iumi for lanem staka samting. Olketa wea worshipim God luksavve olketa mas studyim Bible for fren gud witim God. Wanfala Christian dadi sei: “Olketa samting wea mifala tinghae long hem nao, mifala lanem taem mifala read and study.”

Taem pikinini savve hao for study gud, datwan savve helpem hem for fren gud witim God. (Ps. 1:​1-3, 6) Iumi bae no kasem laef olowe from iumi savve read, bat Bible showimaot iumi savve kasem staka blessing from datwan. Revelation 1:3 sei: “Man wea readim big olketa toktok long disfala profesi and olketa wea herem, bae hapi.” Dastawe aposol Paul sei long Timothy: “Ting raonem evri samting hia and tingting strong long olketa.” Why nao hem mas duim olsem? “Hem bae showaot long evriwan [hem] kamap strongfala Christian.”​—⁠1 Tim. 4:​15.

Sapos man savve hao for read and study, hem no minim hem bae kasem gud samting from datwan. Staka wea savve read gud and study aftarem nomoa olketa samting wea no important tumas. So wanem nao dadi and mami savve duim for helpem pikinini barava laek for read and study?

Love and Gudfala Example

Olketa pikinini barava enjoyim taem for study sapos dadi and mami showimaot olketa lovem olketa. Owen and Claudia, wanfala Christian hasband and waef, wea garem tufala pikinini sei: “Tufala pikinini barava laekem taem for study bikos tufala feel sef and spesol. Tufala savve taem for study hem taem wea tufala kasem love.” Taem olketa pikinini kamap big samfala savve kasem hard taem. Bat sapos famili showimaot love taem olketa duim Bible study tugeta, datwan nao savve helpem olketa laek for study. Tufala pikinini bilong Owen and Claudia pioneer distaem and gohed for kasem blessing bikos olketa laek for read and study.

Example bilong dadi and mami barava important tu. Pikinini wea lukim dadi and mami read and study evritaem savve followim wei bilong olketa. Bat sapos iu no savve read gud, hao nao iu savve showimaot gudfala example for pikinini bilong iu? Maet iu need for changem tingting bilong iu abaotem wanem nao hem important long iu. (Rom. 2:​21) Sapos iu readim Bible evriday, prepare for olketa meeting, and duim famili study, olketa pikinini bae luksavve olketa samting hia important.

Dastawe iu mas showimaot love and gudfala example for helpem pikinini laek for read and study. Bat waswe, iumi savve duim eni samting moa for helpem olketa?

Helpem Pikinini Laek for Read

Wanem nao bae helpem pikinini bilong iu laek for read? Givim olketa buk taem olketa smol. Wanfala elder wea dadi and mami bilong hem helpem hem laek for read sei: “Letem pikinini lane hao for holem buk. Olketa buk bae kamap samting wea olketa laekem tumas.” Olketa Bible buk olsem Lane From Datfala Nambawan Teacher savve kamap olsem fren bilong olketa bifor olketa savve read. Taem iu readim buk olsem witim pikinini, olketa lane hao for story and lanem “olketa samting abaotem God.”​—⁠1 Cor. 2:​13.

Read big evritaem. Mekem schedule for read witim pikinini evriday. Datwan teachim olketa hao for toktok long stretfala wei and helpem olketa for laek for read. Hao iu read hem important tu. Showimaot feeling and olketa bae interest long datwan. Maet olketa askem iu for readim moa sem story staka taem. Sapos olsem, duim datwan! Gogo bae olketa laekem iu for readim niu samting. Bat keakea iumi no forcem olketa for read witim iumi. Jesus showimaot gudfala example taem hem teachim pipol “fitim wanem olketa savve minim.” (Mark 4:​33) Sapos iu no forcem pikinini, olketa bae barava hapi for read witim iu, and bae olketa laek for read.

Askem olketa kwestin, and storyim wanem iu readim. Bae iu hapi tumas for lukim olketa smol pikinini bilong iu kwiktaem start for minim staka word and luksavve hao for talem. Taem iu storyim samting wea iu readim, olketa bae lane kwiktaem. Wanfala buk for helpem pikinini read gud sei, wei for story witim pikinini helpem olketa “lanem olketa word wea olketa bae need for luksavve and minim for read gud.” “Hem barava important for story witim olketa for helpem olketa lane hao for read.”

Askem pikinini for read kam long iu, and encouragem olketa for askem kwestin. Iuseleva savve askem kwestin tu and talem samfala ansa for hem chusim. Sapos olsem, pikinini bae luksavve hem savve lanem and minim staka samting from olketa buk wea olketa readim. Taem iu readim Bible, iu mas encouragem olketa for askem kwestin.​—⁠Heb. 4:​12.

No forgetim tu, wei for lane for read hem no isi samting. Pikinini needim taem and hem mas practice for read gud.a Dastawe hem gud for praisem pikinini for helpem hem laek for read. Diswan bae encouragem olketa for laek for read evritaem.

Staka Blessing and Hapi

Taem iu lanem pikinini hao for study, olketa luksavve why olketa mas read gud. Olketa mas luksavve long olketa main point long wanem olketa studyim and hao olketa join witim olketa nara main point. Olketa mas lane hao for organize gud, for no forgetim samting, and for followim wanem olketa lanem. Taem pikinini savve hao for study and followim wanem olketa lanem, olketa bae kasem staka blessing and hapi.​—⁠Eccl. 10:⁠10.

Showim pikinini hao for study. Taem famili duim Famili Worship, storyim text evriday, and long narataem olsem, hem gudfala taem for lanem pikinini hao for study. Taem pikinini sidaon kwaet and tingim wanfala idea for lelebet taem, olketa lane hao for lisin gud, wea olketa mas duim for lane gud. Iu savve askem pikinini for markem samting hem just lanem witim samting wea hem savve finis. Waswe, iu savve askem pikinini for talem main point long samting hem just readim? Pikinini need for lane hao for talem moa olketa main point bikos datwan bae helpem olketa minim and no forgetim. Nomata smol pikinini savve lane for raetem lelebet samting wea olketa lanem taem olketa study and long meeting. Diswan bae helpem olketa for lisin gud! Olketa simpol teknik hia bae mekem iu and pikinini bilong iu interest for lane.

Redyim ples wea naes for study. Hem mas garem fresh air, no dark tumas, and hem mas kwaet mekem man isi for ting raonem wanem hem studyim. Dadi and mami mas tinghae long wei for study. Wanfala mami sei: “Iu mas read and study evritaem bikos diswan helpem pikinini for organize gud. Olketa bae luksavve olketa mas markem taem for study.” Staka mami and dadi no letem pikinini duim difren samting long taem wea olketa markem for study. Wanfala savveman sei datwan nao barava important for helpem pikinini lane hao for study gud.

Mekhae long why hem important for study. Helpem pikinini for kasem gud samting from wanem olketa lanem. Main reason why iumi study nao hem for mekem iumi followim samting wea iumi lanem. Wanfala young brata sei: “Sapos mi studyim samting wea mi no savve kasem gud samting from hem, mi no laek studyim datwan. Bat sapos mi lanem samting wea savve helpem mi, mi laek for minim datwan.” Taem young pipol luksavve olketa savve lanem staka gud samting bae olketa barava interest for study. Olketa bae laekem tumas for study olsem hao firstaem wea olketa laekem tumas for read.

Nambawan Blessing

Staka gud samting nao olketa pikinini savve kasem taem iu helpem olketa laek for read. Hem savve helpem olketa long skul, long waka, for fren witim pipol, for minim staka samting long world, and for dadi, mami, and pikinini fren gud tugeta. Wei for read gud and study savve mekem man hapi tumas.

Nambawan blessing nao, taem pikinini laek for study, datwan savve helpem olketa for worshipim Jehovah. Taem olketa laek for study, olketa bae fit for lanem “waed, long, hae, and deep” bilong savve bilong God. (Eph. 3:​18) Staka samting nao dadi and mami mas lanem long pikinini. Dadi and mami mas markem taem for duim evri samting wea olketa fit for lanem pikinini for helpem olketa laek worshipim Jehovah. Taem iu lanem pikinini hao for study gud, iu helpem olketa for savve hao for fren gud witim God. Taem iu helpem pikinini laek for read and study, askem Jehovah for blessim iu.​—⁠Prov. 22:⁠6.

[Footnote]

[Box and Piksa long page 26]

Helpem Pikinini for Read . . .

• Givim olketa buk

• Read big

• Askem olketa kwestin

• Storyim wanem iu readim

• Askem pikinini for read kam long iu

• Encouragem pikinini for askem kwestin

Helpem Pikinini for Study . . .

• Dadi and mami mas showim gud example

• Showim pikinini hao for . . .

○ lisin gud

○ markem samting

○ talem moa olketa main point

○ raetem lelebet samting

• Redyim ples wea naes for study

• Mekhae long why hem important for study