Why Nao Hem Gud for Savve Abaotem Kingdom Bilong God?

Staka pipol raonem world sei Kingdom bilong God mekem olketa garem hope for gudfala future. Olketa followim wanem Jesus talem olketa disaepol bilong hem for duim long wei for prea for ‘Kingdom bilong God for kam, and for God duim samting wea hem laek for duim long earth.’—Matthew 6:10.

Maet iu tingse from staka pipol interest tumas long Kingdom bilong God, bae olketa religion story abaotem datwan, bat staka no duim datwan. Herbert Wells, man for raetem history, sapraes long diswan tu. Hem sei nomata Jesus barava mekhae long Kingdom bilong God, staka church bilong olketa Christian no storyim datwan tumas.

Bat Olketa Jehovah’s Witness no olsem. Olketa barava mekhae long Kingdom bilong God. Tingim, magasin wea iu readim distaem hem nao main magasin bilong mifala, and mifala pablisim datwan long 220 languis. Mifala printim klosap 46 million copy bilong disfala magasin evri month, and datwan minim staka pipol kasem disfala magasin winim eni nara magasin long world. And wanem nao main samting disfala magasin storyim? Lukim title bilong hem wea sei: Wastaoa wea Talemaot Kingdom Bilong Jehovah.a

Why nao Olketa Jehovah’s Witness duim staka samting olsem for talemaot Kingdom bilong God? Wanfala reason hem bikos mifala luksavve Kingdom bilong God nao hem main message long Bible. And tu, mifala barava sure Kingdom bilong God nomoa bae stretem evri problem bilong olketa man.

Olketa Jehovah’s Witness followim example bilong Jesus for helpem pipol savve abaotem Kingdom bilong God. Taem Jesus stap long earth, hem showimaot datfala Kingdom hem barava important long hem, and Kingdom nao main samting wea hem storyim long preaching waka bilong hem. (Luke 4:43) Why nao Kingdom bilong God hem important long Jesus? And wanem gud samting nao iu savve kasem from Kingdom bilong God? Iu savve readim ansa wea kam from Bible for tufala kwestin hia long next tufala article long disfala magasin.