“Mifala Laekem Kingdom bilong Iu for Kam”—Staka Million Pipol Talem Disfala Prea Evritaem
Waswe, enitaem iu prea for Kingdom blo God for kam? For staka handred year, staka million pipol talem olketa sem toktok hia, “Mifala laekem kingdom bilong iu for kam.” Why nao olketa talem olketa toktok hia evritaem? Bikos Jesus nao talem olketa follower blo hem for prea for Kingdom blo God.
Firstaem olketa follower blo Jesus no minim evri samting hem talem abaotem Kingdom. Wantaem olketa askem hem: “Hao Lord, distaem nao bae iu mekem rul bilong God kamap moa long Israel?” Olketa maet sapraes taem Jesus no talem stret ansa for datfala kwestin. (Acts 1:6, 7) So waswe, datwan minim bae hem hard for savve lo wanem nao Kingdom blo God, and wanem taem nao bae hem kam? Nomoa!
Disfala Wastaoa bae helpem iu for savve lo ansa for olketa kwestin hia:
Why nao iumi needim Kingdom blo God?
Hu nao King lo Kingdom blo God?
Wanem taem nao Kingdom blo God bae rul ovarem earth?
Wanem nao Kingdom blo God bae duim?
Why nao hem important for iumi chus for sapotim Kingdom blo God distaem?
Wanem nao Kingdom blo God?