KWESTIN FROM READER
Wanem nao iumi savve duim for helpem olketa brata and sista wea barava nogud long smel bilong perfume?
Hem no isi for olketa wea savve nogud long smel bilong perfume bikos pipol wea olketa meetim evriday savve iusim perfume. Samfala laek savve sapos mifala savve askem olketa brata and sista for no iusim perfume or spray taem olketa kam long meeting, assembly, and convention.
No eni Christian laek duim eni samting for spoelem eniwan wea kam long meeting. Hem barava important for kam long olketa meeting, bikos olketa meeting savve encouragem iumi. (Heb. 10:24, 25) Dastawe, eniwan wea no kam long olketa meeting bikos hem barava nogud long smel bilong perfume wea olketa narawan iusim, maet laek for storyim datwan long olketa elder. Bible no sei hem rong for man iusim perfume, and hem no fitim for iumi putim eni rul for stopem olketa wea kam long meeting for iusim perfume. Bat olketa elder savve helpem olketa long kongregeson for minim disfala problem wea samfala garem. From evri ples no semsem, olketa elder maet disaed for storyim diswan long wanfala need bilong kongregeson wea savve kamap long Service Meeting, or maet olketa savve talem wanfala announcement abaotem datwan wea no mekem eniwan feel nogud. Bat olketa elder bae no evritaem mekem announcement abaotem diswan. Olketa niu wan wea interest savve kam long olketa meeting bilong iumi wea olketa no savve abaotem disfala problem, and iumi laek for welkamim olketa. No eniwan shud feel nogud bikos hem iusim perfume.
Maet olketa elder long kongregeson savve markem wanfala difren rum long Kingdom Hall for olketa wea nogud long smel bilong perfume for sidaon long hem. Olsem example, maet wanfala rum hem garem speaker wea olketa savve sidaon and herehere long meeting. Sapos datwan still no helpem olketa, maet olketa elder savve arrangem for samwan recordim meeting for olketa hia, or arrange for olketa herehere long olketa meeting long telephone, wea hem nao samting wea samfala kongregeson duim finis for samfala wea no fit for kam long Kingdom Hall.
Long olketa year wea go pas, olketa brata and sista long samfala kantri kasem encouragement for tingim diswan taem olketa attendim regional convention bilong olketa. From staka convention kamap long olketa building wea iusim air-condition, olketa wea kam long olketa convention hia kasem instruction for iusim lelebet nomoa long perfume wea smel strong tumas, bikos maet olketa building hia no garem ples wea olketa wea smel bilong perfume savve spoelem olketa savve sidaon insaed. Bat olketa instruction hia no wanfala rul wea kongregeson mas followim long taem bilong olketa kongregeson meeting.
From iumi stap long disfala nogud world, iumi safa from olketa nogud samting wea kamaot from iumi no perfect. Iumi tinghae long olketa narawan wea helpem iumi long olketa hard samting wea kasem iumi. Maet diswan minim for no iusim perfume or spray mekem brata or sista wea savve nogud long kaen samting olsem hem savve kam long olketa meeting. Nomata olsem, sapos iumi lovem brata or sista bilong iumi, bae iumi willing for duim datwan.
Waswe, eni nara buk storyim Pontius Pilate?
Ston wea nem bilong Pilate stap long hem, wea olketa raetem long Latin languis
Pipol wea readim Bible savve long datfala nem Pontius Pilate, bikos Bible sei hem nao man wea kotem Jesus and givim order for olketa killim hem dae. (Matt. 27:1, 2, 24-26) Bat nem bilong hem stap tu long samfala nara history buk. The Anchor Bible Dictionary sei olketa history buk storyim ‘staka information abaotem hem winim eni nara bigman bilong Rome wea rul long Judea.’
Josephus, man wea raetem history bilong olketa Jew, hem story abaotem Pilate staka taem insaed long olketa buk bilong hem. Hem raet abaotem thrifala samting wea happen taem Pilate rulim Judea. Philo, narafala man wea raetem history bilong olketa Jew, hem tu storyim nara samting wea happen long datfala taem. Tacitus, wea raetem history bilong olketa king long Rome hem sei long taem wea Tiberius hem rulim Rome, Pontius Pilate nao givim order for olketa killim dae Jesus.
Long 1961, olketa savveman wea digdig long graon, digim wanfala old theater wea olketa bilong Rome wakem wea stap long Caesarea, long Israel. Olketa faendem wanfala ston wea nem bilong Pilate stap long hem, wea olketa raetem long Latin languis. Olsem disfala piksa hem showim, from datfala ston hem brek, samfala raeting long datfala ston hem nomoa nao, bat olketa tingse maet datfala full raeting hem read olsem: “Pontius Pilate wea hem Prefect bilong Judea nao hem dedicatem disfala building for honorim datfala god Tiberius.” Building hia maet hem wanfala temple wea olketa buildim for mekhae long Tiberius, wea hem king bilong Rome.
Sapos wanfala brata joinim Bible study wea sista conductim, waswe, sista mas kavarem hed?
Long “Kwestin From Reader” wea stap long Wastaoa bilong July 15, 2002, hem sei sista mas kavarem hed sapos brata wea baptaes or man wea anbaptaes pablisa hem joinim Bible study wea sista hia conductim. Bat bihaen datfala wakaman wea faithful and wise lukluk moa long diswan, hem luksavve iumi mas changem hao iumi minim diswan.
Hem fitim sista for kavarem hed sapos brata wea baptaes hem joinim Bible study wea hem conductim. Taem sista hia duim datwan, hem respectim arrangement bilong hedship insaed kongregeson, bikos waka for teach insaed kongregeson hem responsibility bilong olketa brata. (1 Cor. 11:5, 6, 10) Nara samting tu, datfala sista savve askem brata for conductim study sapos hem fit for duim.
Bat sapos man wea anbaptaes pablisa hem joinim Bible study wea sista conductim, for followim Bible principle, hem no need for kavarem hed. Bat sapos datfala man hem hasband bilong hem, sista hia mas kavarem hed. Nomata olsem, konsens bilong samfala sista maet mekem olketa laek for kavarem hed taem man wea anbaptaes pablisa hem joinim Bible study wea olketa conductim.