2005 “Obeyim God” Distrik Convention Bilong Olketa Jehovah’s Witness
1 From Jehovah God hem Nambawan Teacher bilong iumi, hem mekem wei kamap for iumi hipap for lane abaotem olketa samting wea hem laekem iumi for duim. (Isa. 30:20, 21; 54:13) Hem duim diswan thru long faithful and wise slave class, wea mekem wei kamap for iumi garem olketa distrik convention evri year. (Matt. 24:45-47) Iumi garem sem tingting olsem datfala man for raetem psalm, David, wea hem sing olsem: “Midolwan long staka pipol wea hipap tugeta mi bae blessim Jehovah.” (Ps. 26:12) David barava minim hao wei for lane from Jehovah hem important and hem disaed strong for stap midolwan long pipol bilong Jehovah taem olketa hipap tugeta.
2 Waswe, bae iu stap “midolwan long staka pipol wea hipap tugeta for datfala “Obeyim God” Distrik Convention? Sapos olsem, information wea iumi bae storyim bae helpem iu for redi for diswan.
3 Mekem Plan Distaem for No Missim Eni Day: “Samting wea man planim gud fastaem bae kasem reward.” (Prov. 21:5) Toktok hia barava strongim hao hem important for mekem plan distaem for convention. For mek sure iu no missim eni samting long disfala program wea hem for strongim iu long spiritual wei, iu mas start distaem for mek redi for no missim eni day. Sapos iu need for askem boss for no waka long olketa day hia, duim datwan distaem nao. Sapos iu need for story witim hasband or waef bilong iu wea no wanfala Witness, no weit kasem taem wea convention klosap. Nomata iu feisim eni hard samting, prea long Jehovah abaotem datwan and trustim hao hem bae helpem iu for mekem ‘olketa plan bilong iu win.’ (Prov. 16:3) And tu, bae hem gud for iu helpem Bible student bilong iu mek redi tu for no missim eni part long program.
4 Needim Olketa Volunteer: Jesus showim perfect example saed long wei for hambol for tingim need bilong olketa narawan. (Luke 9:12-17; John 13:5, 14-16) Olketa wea volunteer for duim waka long convention showimaot hao olketa ting olsem tu. Saed long olketa waka long convention, olketa long Convention Komiti bae askem samfala for duim waka for helpem olketa. Bigfala need stap for olketa elder volunteer and acceptim olketa assignment. Wei wea olketa willing for duim diswan hem nambawan example for evriwan insaed kongregeson.—1 Pet. 5:2, 3.
5 Thru long “datfala faithful wakman,” Jehovah God hem mekem wei for pipol bilong hem for hipap for kasem spiritual instruction long olketa convention dis year. (Luke 12:42) Wei for mek redi for diswan hem bigfala waka, bat iumi bae kasem plande gud samting from diswan. Olketa “Obeyim God” Distrik Convention bae barava strongim iumi for gohed servem Jehovah distaem and for olowe. Iumi mas disaed strong for followim disfala toktok bilong man wea raetem psalm, wea sei: “Evriwan mas hipap and blessim God.”—Ps. 68:26.
[Box long page 5]
Friday and Saturday
9:30 a.m. - 5:05 p.m.
Sunday
9:30 a.m. - 4:10 p.m.
[Box on page 6]
Hao Iumi Savve Sapotim Accommodation Arrangement
◼ Long Wei for Preparem Accommodation: Iumi klinfala pipol wea waka hard. Hem gud for olketa kongregeson repairim accommodation haos bilong olketa bifor Distrik Convention. Hem tru, iumi needim staka volunteer and material for preparem accommodation, bat sapos iumi redim gud accommodation iumi fit for invaetem olketa Bible student and interest wan long Distrik Convention! Sapos tufala kongregeson sharem sem accommodation, hem gud for body of elders or substitute story tugeta abaotem hao for redim and iusim accommodation. Saed long wei for evriwan sharem accommodation haos, hem gud for no tingim iumiseleva nomoa, bat tingim gud samting for narawan.—Phil 2:4
◼ Long Accommodation: Taem iumi stap long accommodation iumi gohed for keepim klin, insaed and aotsaed. Hem gud evritaem for klinim rum bihaen kaikai and bifor iumi attendim Distrik Convention session. Hem gud for trainim pikinini for klinim rum. Sapos kitchen hem smol bat plande laek for iusim, iumi need for showim kaenfala and patient fasin. (Gal. 5:22, 23) Taem iumi weit for iusim kitchen, hem gudfala taem for story tugeta witim olketa brata long difren kongregeson mekem iumi kamap moa klos. Waswe, iumi and olketa pikinini bilong iumi tu savve hao for iusim gud toilet and ples for swim? Plis followim instruction wea olketa provaedem for diswan.
◼ Taem Iumi Stap Long Haos Bilong Brata: Iumi need for respectim famili wea offerim haos long taem bilong Distrik Convention. Sapos iumi laek for iusim eni samting bilong olketa, iumi mas ask fastaem. Plis remember hao disfala arrangement hem for taem bilong Distrik Convention nomoa. Taem Distrik Convention finis, iumi shud faendem transport kwiktaem and go bak long hom. Iu savve stap long accommodation go kasem taem wea iu savve kasem next ship or transport for go bak long hom. Sapos iu laek for stap for lelebet longtaem winim datwan, maet iuseleva nao shud faendem nara ples for stap.
◼ Olketa Brata wea Stap Long Distrik Convention Ples: Iumi laek for welkamim olketa brata wea travel kam from farawe. Waswe, iumi savve provaedem accommodation? Sapos olsem, plis talem diswan long Ruming Department. Nomata iumi no garem eni spes for accommodation, waswe, iumi savve givim firewood or kaikai for olketa brata? Taem kongregeson bilong iu announcem samting wea olketa brata needim, iu savve talem long wanfala elder samting wea iu fit for duim for helpem olketa hia. Iumi duim evri samting for glory bilong Jehovah.—1 Cor. 10:31.