2009 Distrik Convention Bilong Olketa Jehovah’s Witness
1. (a) Wanem blessing nao iumi bae kasem sapos iumi kam long thrifala day long distrik convention? (b) Wanem nao iumi shud plan for duim distaem?
1 Distaem iumi luk forward long 2009 distrik convention. Hem wanfala chance for hipap tugeta witim olketa brata and sista wea worshipim Jehovah, wea ‘olketa luksavve olketa needim God.’ (Matt. 5:3) From day bilong Jehovah barava kam klosap tumas, mifala askem iufala evriwan for kam long thrifala day hia for kasem gud samting long wei for hipap tugeta and enjoyim nambawan spiritual kaikai for helpem and strongim faith bilong iumi. (Zeph. 1:14) Talem olketa teacher and olketa boss, wei for go long convention hem barava important samting long worship bilong iu. Sapos iu trustim Jehovah and no fraet for mekem plan distaem for go long convention, bae hem barava helpem iu.—Isa. 50:10.
2. Hao nao iumi savve showimaot Christian love long samfala long kongregeson bilong iumi?
2 Helpem Olketa Narawan for Kam: Waswe, samfala long kongregeson needim help for go long convention? Taem iu helpem olketa narawan, datwan showimaot iu ‘no tingim nomoa samting wea iu laekem, bat iu tingim tu samting wea olketa narawan laekem.’—Phil. 2:4.
3. Taem wanfala pablisa wea garem spesol need askem help abaotem ples for stap, wanem nao Kongregeson Service Komiti savve duim?
3 Spesol Need: Taem wanfala pablisa askem help for kasem Special Needs Room Request form, Kongregeson Service Komiti shud disaedem sapos datfala pablisa fit for kasem or nomoa. Olketa shud lukluk long datfala leta for evri elder wea garem date December 14, 2008, bifor kongregeson secretary sendem leta long Rooming Deparment.
4. Wanem nao samfala important samting for tingim taem iumi redi for 2009 distrik convention?
4 Olketa Samting wea Iumi Savve Duim for Praisem God: Taem iumi showimaot olketa wei bilong spirit long laef bilong iumi, datwan bae helpem iumi for tingting gud long toktok and long wei bilong iumi long ples wea convention kamap. Taem iumi duim olsem, iumi showimaot gudfala wei bilong pipol bilong Jehovah and bae iumi no mekem eniwan stambol. (1 Cor. 10:31; 2 Cor. 6:3, 4) So taem iu kam long 2009 distrik convention, gohed showimaot gudfala wei for praisem God!—1 Pet. 2:12.