Talemaot Glory Bilong Jehovah
1 Man wea raetem psalm hem sei: “Singsing long Jehovah iufala evri pipol long earth. . . . Talemaot glory bilong hem long olketa nation, talem pipol abaotem olketa nambawan waka bilong hem.” Taem iumi ting raonem wanem Jehovah duim finis, wanem hem duim distaem, and wanem bae hem duim for iumi long future, datwan muvim heart bilong iumi for talemaot glory bilong hem!—Ps. 96:1, 3.
2 Long Ministry Bilong Iumi: Hem privilege bilong Olketa Jehovah’s Witness for garem datfala nem and for praisem hem long pablik evriwea long earth. (Mal. 1:11) Hem samting wea barava difren from olketa bigman bilong Christendom wea bighed for aotem nem bilong God from olketa Bible transleison bilong olketa! Disfala waka for talemaot nem bilong God hem barava important, from pipol mas singaot long nem bilong Jehovah mekem olketa sev taem datfala bigfala trabol hem kam. (Rom. 10:13-15) And tu, only wei for full universe garem peace, wea insaed diswan hem peace midolwan olketa pipol long earth tu, hem for evriwan wea laef mas ting long nem bilong hem olsem holy. Tru tumas, samting wea joinim evri waka bilong God hem nem bilong hem.
3 “Jehovah hem nambawan and barava fit for kasem praise.” Bat for mekem pipol “givim Jehovah glory wea fitim nem bilong hem,” olketa mas savve long truth abaotem hem. (Ps. 96:4, 8) Nomata olsem, samfala denyim hao God hem really stap. (Ps. 14:1) Olketa narawan spoelem God taem olketa sei hem wik, or talem hao hem no interest long olketa man. Taem iumi helpem olketa wea garem honest heart for kasem stretfala savve abaotem Creator bilong iumi, olketa plan bilong hem, and olketa loving wei bilong hem, iumi givim glory long Jehovah.
4 Thru Long Fasin Bilong Iumi: Wei wea iumi duim evri samting followim olketa raeteous standard bilong God hem givim honor long hem. Pipol lukim gudfala fasin bilong iumi. (1 Pet. 2:12) Olsem example, klinfala lukluk bilong iumi savve mekem nara pipol talem gudfala toktok abaotem iumi, wea givim iumi chance for story abaotem olketa gud samting wea iumi kasem taem iumi followim olketa principle long Bible. (1 Tim. 2:9, 10) Hem barava hapi samting taem olketa narawan ‘lukim olketa gudfala waka bilong iumi and givim glory long Dadi bilong iumi wea stap long heven’!—Matt. 5:16.
5 Thru long toktok and samting wea iumi duim, iumi mas praisem nambawan God bilong iumi each day, and taem iumi duim datwan iumi followim disfala hapi toktok: “Singsing long Jehovah, blessim nem bilong hem. Long evriday talemaot gud nius bilong salvation wea kam thru long hem.”—Ps. 96:2