Olketa Showimaot Gudfala Example Bilong Faithful Fasin
1 Start long year 1937, wanfala niu waka saed long full-taem service hem start, hem nao spesol pioneer waka. Olketa man and woman wea fit and garem gudfala savve long Christian ministry, willing for acceptim olketa assignment for serve long eni ples wea organization assignim olketa. Distaem, olketa spesol pioneer gohed for showimaot gudfala example bilong faithful fasin for iumi followim.—Heb. 6:12.
2 Olketa Leadim Preaching Waka: Long firstaem, olketa spesol pioneer leadim preaching waka thru long wei for pleim for haosholder olketa Bible tok wea olketa recordim. Olketa iusim tu olketa Bible tok hia for startim story abaotem Bible taem olketa duim return visit. Olketa duim diswan long olketa bigfala taon wea olketa kongregeson stap finis. Bihaen, organization sendem olketa spesol pioneer long olketa ples wea garem bigfala need for olketa Kingdom pablisa. Olketa visitim evriwan wea showimaot interest long Kingdom message and conductim olketa Bible study. From olketa barava waka hard, plande handred niu kongregeson kamap. Wei wea olketa gohed for talemaot gud nius hem helpem organization wea iumi lukim distaem for barava kamap moa big. (Isa. 60:22) Olketa spesol pioneer gohed for duim bigfala part insaed disfala waka for talemaot gud nius “evriwea anda long heven.”—Col. 1:23.
3 Example Bilong Olketa wea Iumi Fit for Followim: Samfala spesol pioneer serve insaed full-taem ministry for staka year finis. Insaed olketa year wea go pas, faith bilong olketa loyal man and woman hia kamap moa strong taem olketa kasem olketa difren kaen samting long laef. (1 Pet. 1:6, 7) Olketa willing for sakrifaesim olketa material samting mekem olketa serve long olketa ples wea garem spesol need. Distaem samfala long olketa hia kamap olo nao and garem nogud health, or feisim olketa nara hard samting. (2 Cor. 4:16, 17) Nomata olsem, olketa “gohed strong nomata olketa garem gray hair.” (Ps. 92:14) Olketa barava trustim Jehovah and hem blessim olketa.—Ps. 34:8; Prov. 10:22.
4 Olketa spesol pioneer barava fit for kasem praise from iumi. Sapos hem privilege bilong iu for garem olketa spesol pioneer long kongregeson bilong iu, iusim datfala chance for kaban witim olketa and kasem gud samting from savve wea olketa garem. Showimaot iu tinghae long faithful service bilong olketa for talemaot Kingdom. Kasem encouragement from wei wea olketa gohed strong and no givap. Evriwan wea followim faith bilong olketa savve kasem tu blessing from Jehovah bikos “hem hapi long olketa wea gohed for showimaot faith.”—Prov. 12:22.