Branch Letter

Dear Kingdom Pablisa:

Iumi barava hapi tumas long nambawan wei wea Jehovah lukaftarem and blessim pipol bilong hem distaem. Taem pipol bilong world joinim wei for stealim and bonem staka stoa long Honiara long April, pipol luksavve hao iumi no teksaed long eni raoa and stap separate from disfala world. Olketa luksavve hao iumi no garem truth nomoa bat iumi live followim truth tu, and iumi hope diswan bae muvim pipol for laek worshipim Jehovah. Iumi gohed for helpem 7,629 wea attendim Memorial long 2006.—1 Cor. 15:58.

Long Panatina branch project distaem 17 international servant and 30 construction brata and sista waka hard witim wan mind and hapi spirit. Maet taem iumi readim disfala leta, olketa gohed for putim faondeson for Service Building. Olketa nara branch and pablisa long nara kantri givim kam olketa machine for dig, olketa tul, and olketa material. Nomata samfala taem hem luk olsem hem bae hard bikos long wei wea kantri hem brekdaon, holy spirit muvim pipol long bisnis and long gavman tu for sapotim disfala project and mekem wei for hem gohed gud. Iumi tu savve showimaot iumi tinghae long diswan thru long wei for sapotim disfala project long eni wei wea heart muvim iumi for duim.—2 Cor. 9:7.

Kingdom Hall construction team bilong iumi buildim and repairim fofala Kingdom Hall long Solomon Islands long 2006 service year. Diswan hem mekhae long nem bilong Jehovah and helpem pipol for lanem truth long Kingdom Hall. Waswe, iumi attendim Christian meeting evritaem?

Iumi gohed long thrifala goal bilong iumi. (1) Text evriday, (2) Bible reading evriday, and (3) Famili study evri week. Iumi luk forward long Distrik Convention, and mifala encouragem evriwan for plan gud for attend. Taem iumi lukaotem Kingdom firstaem, Jehovah bae blessim iumi.—Matt. 6:33.

Olketa brata bilong iufala,

Solomon Islands Branch Office