Kwestin Box

◼ Wanem kaleko nao fitim iumi for werem taem iumi go lukim olketa ples wea dedicate long Jehovah?

Evriwea long world olketa Kingdom Hall, olketa Assembly Hall, olketa Bethel, and olketa branch building hem olketa spesol ples wea dedicate long Jehovah. Olketa ples hia no ova tumas, luk klin, and olketa lukaftarem gud wea diswan mekem olketa ples hia luk naes tumas. Olketa barava luk difren from staka ples wea iumi lukim long world bilong Satan. And tu, pipol mas luksavve long olketa wea kam for lukim olketa ples hia wea dedicate long Jehovah olsem pipol wea worshipim Jehovah.

For “showimaot hao [iumi] olketa wakman bilong God,” iumi mas werem gudfala kaleko, garem lukluk wea fitim and wei bilong iumi mas gud tu. (2 Cor. 6:​3, 4) Kaleko and lukluk bilong iumi mas evritaem luk fitim olketa wakman bilong Jehovah God. Fitim iumi for obeyim evri toktok hia taem iumi go for lukim Branch long Honiara and eni nara branch long world.

Disfala buk, Organized to Do Jehovah’s Will hem talem hao iumi mas klin long body, klin long kaleko, and garem lukluk wea fitim taem iumi preach and taem iumi go long olketa Christian meeting. Long page 138, paragraf 3, hem read olsem: “No forgetim hao disfala nem Bethel, hem minim ‘Haos bilong God.’ Dastawe, kaleko, lukluk, and wei bilong iumi mas semsem olsem taem iumi go long olketa meeting for worship long Kingdom Hall.” Evri Kingdom pablisa wea kam for lukim Bethel nomata hem kam from ples wea klosap or farawe, mas followim datfala toktok. Taem man followim datwan, hem showimaot hao hem tinghae long olketa ples hia and respectim tu.​—Ps. 29:2.

Kaleko wea iumi werem mas showimaot iumi pipol wea “respectim God.” (1 Tim. 2:​10) Kaleko and lukluk bilong iumi wea fitim, hem mekem olketa narawan for tinghae long tru worship bilong Jehovah. Bat samfala brata and sista werem kaleko wea barava no fitim or wea olobaot nomoa taem olketa go for lukim olketa ples wea dedicate long Jehovah. Hem no fitim olketa Christian for werem datkaen kaleko long enitaem or long eni ples. Evri samting wea iumi olketa Christian duim, mas showimaot hao iumi pipol bilong God wea difren from disfala world. Iumi laek for duim evri samting for mekhae long God.​—Rom. 12:2; 1 Cor. 10:31.

Taem iu go lukim branch long Honiara or eni nara ples wea dedicate long Jehovah, askem iuseleva: ‘Waswe, kaleko and lukluk bilong mi showimaot respect, luk klin, and fitim datfala ples wea bae mi go for lukim? Waswe, hem mekhae long God wea mi worshipim? Waswe, bae olketa narawan lukluk strong or no hapi long lukluk bilong mi?’ Bae hem gud tumas sapos kaleko wea iumi werem and lukluk bilong iumi evritaem “mekem teaching bilong God, wea hem Man for sevem iumi, luk naes tumas long evri samting”!​—Titus 2:​10.