LESON 52

Wat Nao Tingting blo Jehovah Abaotem Hao Iumi Dressap?

Lo Printed Buk

Hao iumi evriwan dressap hem no semsem. If iumi followim olketa Bible principle lo hao iumi dressap, datwan bae mekem Jehovah hapi. Bae iumi storyim samfala principle hia.

1. Wat nao olketa principle wea shud helpem iumi lo hao iumi dressap?

Iumi shud chusim “kaleko wea fitim and wea showimaot respect and gudfala tingting,” and evritaem luk klin for showim iumi “worshipim God.” (1 Timothy 2:9, 10) Tingim fofala principle hia: (1) Kaleko wea iumi werem shud “fitim” wanfala Christian. Lo olketa meeting, iu lukim hao pipol blo Jehovah garem olketa difren wei for dressap, bat evritaem kaleko and hairstyle blo olketa showim olketa respectim God. (2) Taem iumi werem kaleko wea showim “respect,” datwan bae mekem pipol for no garem rong tingting abaotem iumi or for lukluk strong lo iumi. (3) Iumi showim iumi garem “gudfala tingting” taem iumi no followim eni niu fashion distaem wea Jehovah no acceptim. (4) Dressap blo iumi shud evritaem showim iumi pipol wea “worshipim God.”—1 Corinth 10:31.

2. Why nao iumi shud tingim olketa brata and sista taem iumi disaedem kaleko for werem?

Iumiseleva savve chusim kaleko wea iumi laek for werem, bat iumi shud tingim tu tingting blo olketa narawan. Iumi no laek for mekem narawan stambol, bat evritaem laek ‘duim samting wea strongim narawan.’—Readim Rome 15:1, 2.

3. Hao nao kaleko wea iumi werem savve mekem pipol laek lane abaotem Jehovah?

Iumi laek for werem kaleko wea fitim evri difren samting wea iumi duim, especially taem iumi attendim olketa meeting, and duim ministry. Iumi laekem pipol for herem gud nius wea iumi preachim winim for olketa lukluk lo kaleko blo iumi. Iumi laekem kaleko wea iumi werem for mekem pipol laek for lane abaotem God, and “barava tinghae long teaching bilong God wea sevem iumi.”—Titus 2:10.

DIG GO MOA

Bae iumi lanem hao iumi dressap bae showim if iumi olketa Christian.

Tufala man standap front lo judge. Wanfala man werem suit, and nara man werem jean wea kat kat lelebet and hat. — Dressap blo iumi savve showim if iumi respectim olketa wea garem paoa. Nomata Jehovah savve wat nao lo heart blo iumi, hao iumi dressap shud showim iumi respectim hem

4. Taem iumi klin datwan showim iumi respectim Jehovah

Why nao hem important for iumi mas klin? Readim Sams 47:2, then discussim tugeta olketa kwestin hia:

From iumi worshipim Jehovah, hao nao pipol bae ting lo hem from kaleko wea iumi werem?
Iu tingse hem important for dressap gud taem iumi go lo olketa meeting and duim ministry? Why nao olsem?

5. Hao for chusim gudfala kaleko

Pleim VIDEO.

VIDEO: “Evri Samting wea Iufala Duim Mas Givim Glory Long God” (10:18)

Nomata kaleko blo iumi expensive or nomoa, hem shud klin and fitim samting wea iumi duim. Readim 1 Corinth 10:24 and 1 Timothy 2:9, 10. Then discussim tugeta why iumi no laek for werem kaleko wea . . .

no neat, no klin, and baggy.
taet tumas and transparent.

Nomata olketa Christian no followim Law blo Moses, datfala Law helpem olketa for savve lo tingting blo Jehovah abaotem kaleko. Readim Diutronomi 22:5, then discussim tugeta disfala kwestin:

Why nao woman mas no dressap olsem man and man mas no dressap olsem woman?

Readim 1 Corinth 10:32, 33 and 1 John 2:15, 16, then discussim tugeta olketa kwestin hia:

Why nao iumi shud no werem kaleko wea bae spoelem tingting blo pipol lo community or lo kongregeson?
Hao nao pipol lo ples wea iu stap savve dressap?
Iu tingse samfala kaleko wea olketa werem hem no fitim wanfala Christian? Why nao olsem?