Kamap Wanfala Witness wea Gohed Gud
1 Dadi bilong iumi long heven hem hapi long olketa wakman bilong hem taem olketa gohed gud long truth. Diswan minim tu wei for gohed gud olsem strongfala witness bilong gud nius. Paul hem strongim Timothy wea hem wanfala overseer for gohed waka hard “mekem evriwan lukim hao [hem] gohed gud.” (1 Tim. 4:13-15) Iumi evriwan mas trae for kamap gudfala moa long preaching waka, nomata sapos iumi savve tumas hao for preach or nomoa.
2 Markem Samting for Iu Duim: For iu gohed gud iu mas markem olketa samting for duim. Wanem samting nao iumi savve markem for duim? Maet iumi trae for savve gud long hao for iusim Bible wea hem olsem naef for faet. (Eph. 6:17) Maet iumi savve kamap gudfala moa long preaching waka, olsem long wei for duim street witnessing, telephone witnessing, or for duim bisnis territory. Maet iumi savve duim samfala samting for kamap gudfala moa long hao iumi duim olketa return visit. Narafala nambawan samting wea iumi savve markem for duim, hem for kamap gudfala moa long wei for startim and duim olketa Bible study.
3 Olketa Samting for Helpem Iumi: Theocratic Ministry Skul, Service Meeting and olketa nara kongregeson meeting barava helpem iumi for kamap gudfala moa for duim preaching waka. Sapos iumi barava redi gud and iumi trae for kam evritaem long olketa meeting and obeyim olketa samting wea iumi herem, diswan bae mekem iumi kasem staka gudfala samting.—2 Cor. 9:6.
4 Iumi mas helpem evriwan for kamap gudfala moa. (Prov. 27:17) Taem iumi waka witim wanfala pablisa long preaching waka, herehere gud long hao hem story mekem iumi kamap gudfala moa. And tu, buk study overseer savve markem samwan for helpem iumi. Iumi savve kamap gudfala moa and barava hapi long preaching waka taem wanfala pioneer wea savve hao for preach or narafala pablisa hem helpem iumi. Waswe, eni niu pablisa hem stap long buk study bilong iumi? Iumi savve askem hem for waka witim iumi long preaching waka.
5 Christian preaching waka wea gohed distaem hem barava nambawan waka wea winim eni narafala waka. Taem iumi mekhae long Jehovah, iumi laek for givim barava gudfala samting long hem. (Heb. 13:15) Sapos iumi trae for gohed kamap gudfala moa long preaching waka, iumi bae kamap olketa witness “wea no shame long eni samting, wea iusim word bilong truth long stretfala wei.”—2 Tim. 2:15.